പ്രതികൂല കാലാവസ്ഥയും കനത്ത മഴയും കണക്കിലെടുത്ത് സംസ്ഥാനത്തെ 10 ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ജില്ലാ കളക്ടർമാർ നാളെ (ബുധനാഴ്ച) അവധി പ്രഖ്യാപിച്ചു.
കാസർകോട്, കണ്ണൂർ, വയനാട്, കോഴിക്കോട്, തൃശ്ശൂർ, എറണാകുളം, ഇടുക്കി, ആലപ്പുഴ, കോട്ടയം, പത്തനംതിട്ട എന്നീ ജില്ലകളിലാണ് അവധി പ്രഖ്യാപിച്ചിട്ടുള്ളത്.
അങ്കണവാടികള്, പ്രൊഫഷണല് കോളേജുകള്, സി.ബി.എസ്.ഇ, ഐ.സി.എസ്.ഇ സ്കൂളുകള്, മദ്രസകള്, ട്യൂഷൻ സെന്ററുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധി ബാധകമാണ്. എന്നാല് കണ്ണൂർ, കോഴിക്കോട് ജില്ലകളില് പ്രൊഫഷണല് കോളേജുകള്ക്ക് അവധി ഉണ്ടായിരിക്കില്ല. സർവകലാശാല പൊതുപരീക്ഷകള്ക്കും അഭിമുഖങ്ങള്ക്കും മാറ്റമുണ്ടാകില്ലെന്ന് അധികൃതർ അറിയിച്ചു.
മഴ കനത്തതോടെ വയനാട്ടിലെ ടൂറിസം കേന്ദ്രങ്ങള് അടച്ചു. ചുരം റോഡുകളില് യാത്രാ നിയന്ത്രണവും ഏർപ്പെടുത്തിയിട്ടുണ്ട്. താഴ്ന്ന പ്രദേശങ്ങളില് വെള്ളക്കെട്ട് രൂപപ്പെട്ടതിനാലും പലയിടത്തും ദുരിതാശ്വാസ ക്യാമ്പുകള് പ്രവർത്തിക്കുന്നതിനാലും പൊതുജനങ്ങള് അതീവ ജാഗ്രത പാലിക്കണമെന്ന് ജില്ലാ ഭരണകൂടങ്ങള് നിർദ്ദേശിച്ചു.