അതേസമയം, ദമ്മാം വിമാനത്താവളത്തിലേക്കും അരാംകോയുടെ ശൈബ എണ്ണപ്പാടത്തേക്കും മുൻ ദിവസങ്ങളില്‍ നടത്തിയ ആക്രമണങ്ങളില്‍ മരിച്ചവരുടെ എണ്ണം നാലായി ഉയർന്നു. ആക്രമണങ്ങളില്‍ ഒരു ഇന്ത്യക്കാരനടക്കം പത്ത് പേർക്ക് പരിക്കേറ്റിട്ടുണ്ട്. സൗദിയില്‍ കുടുങ്ങിയ ഇന്ത്യൻ ഉംറ തീർത്ഥാടകരെ സുരക്ഷിതമായി നാട്ടിലെത്തിക്കാൻ വേണ്ട എല്ലാ സഹായങ്ങളും നല്‍കുന്നുണ്ടെന്ന് കേന്ദ്ര വിദേശകാര്യ മന്ത്രാലയം അറിയിച്ചു.

ദമ്മാം വിമാനത്താവളത്തിലുണ്ടായ ആക്രമണത്തില്‍ മരിച്ച രണ്ട് പേരില്‍ ഒരാള്‍ ഇന്ത്യക്കാരനാണ്. ശൈബ എണ്ണപ്പാടത്ത് കൊല്ലപ്പെട്ട രണ്ട് പേരും വിദേശ പൗരന്മാരാണ്. അബഹ വിമാനത്താവളം, ദമ്മാം വിമാനത്താവളം, അരാംകോ റിഫൈനറി എന്നിവയ്ക്ക് നേരെ നടത്തിയ ആക്രമണങ്ങളുടെ ഉത്തരവാദിത്തം ഹൂതികള്‍ സ്ഥിരീകരിച്ചിട്ടുണ്ട്. റിയാദിലെ സൗദി പ്രതിരോധ മന്ത്രാലയത്തിന് നേരെയും ആക്രമണം നടത്തിയതായി ഹൂതികള്‍ അവകാശപ്പെട്ടു. സൗദി നടത്തിയ തിരിച്ചടിയില്‍ 562 പേർ കൊല്ലപ്പെട്ടതായും അവർ വാദിക്കുന്നു.

വിമാനത്താവളങ്ങള്‍ക്ക് നേരെ തുടർച്ചയായി ഉണ്ടാകുന്ന ആക്രമണങ്ങള്‍ കാരണം ഉംറ തീർത്ഥാടകർ ഉള്‍പ്പെടെയുള്ള പ്രവാസികളുടെ മടക്കയാത്ര പ്രതിസന്ധിയിലായിട്ടുണ്ട്. എന്നാല്‍ ഇന്ത്യൻ യാത്രാക്കാരുടെയും തീർത്ഥാടകരുടെയും സുരക്ഷ ഉറപ്പാക്കാൻ വിദേശകാര്യ മന്ത്രാലയം നിരന്തരം ഇടപെടുന്നുണ്ട്. കഴിഞ്ഞ ആഴ്ചകളില്‍ 13,000-ത്തിലധികം തീർത്ഥാടകരെ സുരക്ഷിതമായി നാട്ടിലെത്തിച്ചതായി മന്ത്രാലയം വ്യക്തമാക്കി.