ബുധനാഴ്ച പുലർച്ചെ കുവൈത്തിന് നേരെയുണ്ടായ ശക്തമായ വ്യോമാക്രമണ നീക്കത്തെ രാജ്യം വിജയകരമായി പ്രതിരോധിച്ചു. കുവൈത്തിനെ ലക്ഷ്യമിട്ടെത്തിയ രണ്ട് ബാലിസ്റ്റിക് മിസൈലുകളും 13 ഡ്രോണുകളും വ്യോമാതിർത്തിയില് വെച്ചുതന്നെ തകർത്തതായി കുവൈത്ത് സായുധ സേന അറിയിച്ചു.
ആക്രമണത്തില് എവിടെയും ആളപായമോ നാശനഷ്ടങ്ങളോ റിപ്പോർട്ട് ചെയ്തിട്ടില്ല.
രാവിലെ ആറ് മണിയോടെയാണ് രാജ്യത്തിന് നേരെ വീണ്ടും ആക്രമണമുണ്ടായത്. ഏത് സാഹചര്യത്തെയും നേരിടാൻ സൈന്യം പൂർണ്ണ സജ്ജരാണെന്നും പൗരന്മാരുടെയും താമസക്കാരുടെയും സുരക്ഷ ഉറപ്പാക്കാൻ ജാഗ്രത തുടരുകയാണെന്നും പ്രതിരോധ മന്ത്രാലയ വക്താവ് കേണല് സ്റ്റാഫ് സൗദ് അല് ഉതൈബി വ്യക്തമാക്കി. കഴിഞ്ഞ ഫെബ്രുവരി 28-ന് മേഖലയില് സംഘർഷം ആരംഭിച്ചതു മുതല് കുവൈത്തിന് നേരെ നിരന്തരമായ ആക്രമണശ്രമങ്ങള് ഉണ്ടാകുന്നുണ്ട്. ഇതുവരെ 15 ക്രൂയിസ് മിസൈലുകളും 383 ബാലിസ്റ്റിക് മിസൈലുകളും 906 ഡ്രോണുകളുമാണ് കുവൈത്ത് പ്രതിരോധ സംവിധാനങ്ങള് തകർത്തത്.