മജാനിലെ ഒരു ആഭ്യന്തര റോഡില്‍ ബൈക്ക് യാത്രികൻ തെറ്റായ ദിശയിലൂടെ സഞ്ചരിച്ചതിനെ തുടർന്ന് കാറുമായി കൂട്ടിയിടിക്കുകയായിരുന്നു എന്ന് ദുബായ് പോലീസ് അറിയിച്ചു. അപകടത്തില്‍ ഗുരുതരമായി പരിക്കേറ്റ ബൈക്ക് യാത്രികനെ ഉടൻ തന്നെ ചികിത്സയ്ക്കായി ആശുപത്രിയിലേക്ക് മാറ്റി.

ട്രാഫിക് ദിശയ്ക്ക് വിപരീതമായി വാഹനമോടിക്കുന്നത് റോഡ് ഉപയോക്താക്കളുടെ ജീവന് നേരിട്ടുള്ള ഭീഷണിയാണെന്നും, മരണകാരണമാകുന്ന അപകടങ്ങളുടെ പ്രധാന കാരണങ്ങളിലൊന്ന് ഇതാണെന്നും ദുബായ് പോലീസ് ട്രാഫിക് ജനറല്‍ ഡിപ്പാർട്ട്‌മെന്റ് ഡയറക്ടർ ബ്രിഗേഡിയർ ജുമാ സലേം ബിൻ സുവൈദാൻ പറഞ്ഞു. അപകടത്തെക്കുറിച്ചുള്ള വിവരം ലഭിച്ചയുടൻ ട്രാഫിക് പട്രോളിംഗും ആംബുലൻസ് സംഘവും സംഭവസ്ഥലത്തേക്ക് കുതിച്ചതായും അദ്ദേഹം വ്യക്തമാക്കി.

തെറ്റായ ദിശയിലുള്ള ഡ്രൈവിംഗ്, വാഹനങ്ങള്‍ നേർക്കുനേർ കൂട്ടിയിടിച്ചുള്ള (head-on collisions) വൻ അപകടങ്ങളുടെ സാധ്യത വർദ്ധിപ്പിക്കുന്നുവെന്നും, ഇത് ഡ്രൈവർമാരുടെയും കാല്‍നടയാത്രക്കാരുടെയും ജീവൻ അപകടത്തിലാക്കുമെന്നും ദുബായ് പോലീസ് ഓർമ്മിപ്പിച്ചു. കൂടാതെ ഇത് ഗതാഗത തടസ്സത്തിനും വലിയ തോതിലുള്ള നാശനഷ്ടങ്ങള്‍ക്കും കാരണമാകുന്നു.

റോഡ് ഉപയോക്താക്കള്‍ എല്ലാവരും തങ്ങള്‍ക്കായി നിശ്ചയിച്ചിട്ടുള്ള ലെയിനുകളില്‍ മാത്രം വണ്ടിയോടിക്കണമെന്നും, സ്വന്തം സുരക്ഷയും മറ്റുള്ളവരുടെ സുരക്ഷയും ഉറപ്പാക്കാൻ ട്രാഫിക് നിയമങ്ങള്‍ കർശനമായി പാലിക്കണമെന്നും ബ്രിഗേഡിയർ ബിൻ സുവൈദാൻ അഭ്യർത്ഥിച്ചു.