ഗള്‍ഫ് മേഖലയില്‍ വീണ്ടും യുദ്ധഭീതി ഉയർത്തി കുവൈറ്റിന് നേരെ ഇറാന്റെ മിസൈല്‍, ഡ്രോണ്‍ ആക്രമണം. ശത്രുതാപരമായ നീക്കങ്ങളെ കുവൈറ്റ് വ്യോമ പ്രതിരോധ സേന ശക്തമായി പ്രതിരോധിക്കുന്നതായി സൈന്യം അറിയിച്ചു.

മേഖലയില്‍ സംഘർഷം കടുക്കുന്നതിനിടെ കുവൈറ്റിന് നേരെയുണ്ടായ ഈ ഭീകരാക്രമണത്തെ യുഎഇയും ജിസിസിയും ശക്തമായി അപലപിച്ചു.

വ്യാഴാഴ്ച പുലർച്ചെയോടെയാണ് കുവൈറ്റിനെ ലക്ഷ്യമാക്കി ഇറാന്റെ ഭാഗത്തുനിന്ന് മിസൈല്‍, ഡ്രോണ്‍ ആക്രമണങ്ങള്‍ ഉണ്ടായത്. ശത്രുതാപരമായ ഈ നീക്കങ്ങളെ കുവൈറ്റ് വ്യോമ പ്രതിരോധ സേന ശക്തമായി പ്രതിരോധിച്ചതായി സൈന്യം അറിയിച്ചു. രാജ്യത്ത് കേള്‍ക്കുന്ന സ്ഫോടന ശബ്ദങ്ങള്‍ ശത്രുക്കളുടെ മിസൈലുകള്‍ തകർക്കുന്നതിന്റെ ഭാഗമാണെന്ന് അധികൃതർ വ്യക്തമാക്കി. അടിയന്തിര സാഹചര്യം കണക്കിലെടുത്ത് സുരക്ഷാ നിർദ്ദേശങ്ങള്‍ പാലിക്കാൻ പൊതുജനങ്ങളോട് സൈന്യം അഭ്യർത്ഥിച്ചിട്ടുണ്ട്. ഇറാനില്‍ യുഎസ് ആക്രമണം നടത്തുകയും ഹോർമുസ് കടലിടുക്കില്‍ കപ്പലുകള്‍ക്ക് നേരെ വെടിയുതിർക്കുകയും ചെയ്തതിന് പിന്നാലെയാണ് സംഭവം.

കുവൈറ്റിന്റെ പരമാധികാരത്തിന്മേലുള്ള കടന്നുകയറ്റത്തെ യുഎഇ വിദേശകാര്യ മന്ത്രാലയം ശക്തമായി അപലപിച്ചു. ഈ പ്രതിസന്ധി ഘട്ടത്തില്‍ സഹോദര രാജ്യമായ കുവൈത്തിന് യുഎഇയുടെ പൂർണ്ണ ഐക്യദാർഢ്യം പ്രഖ്യാപിക്കുന്നതായും മന്ത്രാലയം വ്യക്തമാക്കി. ആക്രമണത്തിന് പിന്നാലെ കുവൈറ്റിനോട് പൂർണ്ണ ഐക്യദാർഢ്യം പ്രഖ്യാപിച്ച്‌ സൗദി അറേബ്യയും രംഗത്തെത്തി. മേഖലയുടെ സുരക്ഷ തകർക്കാനുള്ള ഏതൊരു ശ്രമത്തെയും ശക്തമായി നിരാകരിക്കുന്നതായി സൗദി വിദേശകാര്യമന്ത്രാലയം പറഞ്ഞു. കുവൈറ്റിനെ ലക്ഷ്യമിട്ടുണ്ടായ മിസൈല്‍ ആക്രമണത്തെ ഖത്തറും കടുത്ത ഭാഷയില്‍ അപലപിച്ചു. പ്രാദേശിക സുരക്ഷ മുൻനിർത്തി മേഖലയിലെ സംഘർഷങ്ങള്‍ അടിയന്തിരമായി ലഘൂകരിക്കണമെന്ന് ഖത്തർ ആവശ്യപ്പെട്ടു.