സുരക്ഷാ പ്രതിസന്ധി മൂലം സൗദി, യുഎഇ അടക്കമുള്ള വിപണികളിലേക്ക് അരിയെത്തുന്നത് കുറഞ്ഞു. 2026-ലെ ആദ്യ നാല് മാസങ്ങളില്‍ ഇന്ത്യയുടെ മൊത്തം അരി കയറ്റുമതിയില്‍ ഇടിവ് രേഖപ്പെടുത്തിയത്.

യുഎസ് - ഇസ്രയേല്‍ - ഇറാൻ സംഘർഷം ഗള്‍ഫ് രാജ്യങ്ങളിലെ ഭക്ഷ്യ ഇറക്കുമതി മേഖലയില്‍ ആശങ്ക വർദ്ധിപ്പിക്കുന്നു. യുദ്ധത്തെ തുടർന്ന് ഹോർമുസ് കടലിടുക്കിലൂടെയുള്ള ചരക്കുനീക്കം തടസ്സപ്പെട്ടതാണ് ഗള്‍ഫ് വിപണികളിലെ പ്രിയങ്കരമായ ഇന്ത്യൻ ബസുമതി അരിയുടെ വരവ് കുറയാൻ കാരണമായത്. ഈ വർഷം ജനുവരി മുതല്‍ ഏപ്രില്‍ വരെയുള്ള ആദ്യ നാല് മാസങ്ങളില്‍ ഇന്ത്യയില്‍ നിന്നുള്ള ബസുമതി അരി കയറ്റുമതിയില്‍ ഏഴ് ശതമാനത്തിന്റെ ഇടിവാണ് രേഖപ്പെടുത്തിയത്. അതായത് കഴിഞ്ഞ വർഷത്തെ അപേക്ഷിച്ച്‌ ബസുമതി കയറ്റുമതി 2.3 ദശലക്ഷം ടണ്ണായി ചുരുങ്ങി.

സംഘർഷ സാഹചര്യം കാരണം സൗദി അറേബ്യ, യുഎഇ, ഇറാഖ്, ഖത്തർ തുടങ്ങിയ ഗള്‍ഫ് രാജ്യങ്ങളിലേക്കുള്ള ചരക്കുകപ്പലുകള്‍ വൈകുന്നതായാണ് റിപ്പോർട്ടുകള്‍. സുരക്ഷാ ഭീഷണിയും ചരക്കുകൂലി വർദ്ധനവും കാരണം ഗള്‍ഫിലെ പ്രമുഖ വ്യാപാരികളും വാങ്ങലുകാരും പുതിയ വ്യാപാര കരാറുകള്‍ താല്‍ക്കാലികമായി നിർത്തിവെച്ചിരിക്കുകയാണ്. ഇന്ത്യൻ ബസുമതി അരിയുടെ ഏറ്റവും വലിയ വിപണിയായ സൗദി അറേബ്യയെയും യുഎഇയെയുമാണ് ഇത് കാര്യമായി ബാധിച്ചിരിക്കുന്നത്. ഒരുകാലത്ത് ഏറ്റവും കൂടുതല്‍ ബസുമതി വാങ്ങിയിരുന്ന ഇറാനെ മറികടന്ന് കഴിഞ്ഞ വർഷം സൗദി അറേബ്യ ഇന്ത്യൻ അരിയുടെ ഒന്നാമത്തെ വിപണിയായി മാറിയിരുന്നു.

യാത്രാ നിരക്കുകളില്‍ 50 ശതമാനം കുറവ്; വലിയ ഓഫറുമായി എയർ ഇന്ത്യ എക്സ്പ്രസ്

അതേസമയം ഗള്‍ഫ് രാജ്യങ്ങളിലേക്ക് പോകുന്ന പ്രീമിയം ബസുമതിക്ക് തിരിച്ചടി നേരിട്ടെങ്കിലും ബംഗ്ലാദേശ്, ആഫ്രിക്കൻ രാജ്യങ്ങള്‍ എന്നിവടങ്ങളിലേക്ക് പോകുന്ന ബസുമതി ഇതര അരിയുടെ കയറ്റുമതിയില്‍ നേരിയ വർദ്ധനവുണ്ടായിട്ടുണ്ട്. ആഭ്യന്തര വിപണിയില്‍ ഇന്ധനച്ചെലവ് വർദ്ധിച്ചതിന് പുറമെ, ഏറ്റവും വലിയ പ്രവാസി വിപണിയായ ഗള്‍ഫിലേക്കുള്ള കയറ്റുമതി മന്ദഗതിയിലായത് ഇന്ത്യൻ വ്യാപാരികള്‍ക്കും വലിയ പ്രതിസന്ധിയാണ് സൃഷ്ടിക്കുന്നത്.

Content Highlights: Disruptions in the Hormuz Strait are affecting the export of Indian basmati rice to Gulf countries. Exporters fear delays and increased transportation challenges could impact trade and supply chains.