കാറിന്റെ മൈലേജ് പെട്ടെന്ന് കുറഞ്ഞാല് പലരുടെയും സംശയം ആദ്യം എത്തുന്നത് എത്തനോളിലേക്കായിരിക്കും. എത്തനോള് കലര്ന്ന ഇന്ധനം ചില സാഹചര്യങ്ങളില് കാറിന്റെ മൈലേജ് കുറയാന് കാരണമാകാം.
എന്നാല് മൈലേജ് കുറയുന്നതിന് എല്ലായ്പ്പോഴും എത്തനോള് മാത്രമാകണമെന്നില്ല കാരണം. മറ്റ് പല കാരണങ്ങളുമുണ്ടാകാം. നിങ്ങളുടെ കാറിന്റെ മൈലേജ് പെട്ടെന്ന് കുറഞ്ഞിട്ടുണ്ടോ? എങ്കില് ശ്രദ്ധിക്കേണ്ട ചില കാര്യങ്ങള് എന്തൊക്കെയാണെന്ന് നോക്കാം…
ടയറിന്റെ മര്ദ്ദം പരിശോധിക്കുക
മൈലേജ് പെട്ടെന്ന് കുറയുന്ന സാഹചര്യത്തില് ആദ്യം പരിശോധിക്കേണ്ടത് വാഹനത്തിന്റെ നാല് ടയറുകളിലെയും വായുമര്ദ്ദമാണ്. ടയറുകളില് ആവശ്യത്തിന് വായു ഇല്ലെങ്കില് റോഡുമായുള്ള ഘര്ഷണം വര്ധിക്കും. ഇതോടെ വാഹനം മുന്നോട്ട് നീക്കാന് എഞ്ചിന് കൂടുതല് ശക്തി പ്രയോഗിക്കേണ്ടിവരും. സ്വാഭാവികമായും ഇന്ധന ഉപഭോഗം കൂടുകയും മൈലേജ് കുറയുകയും ചെയ്യും. അതിനാല് ടയറുകളില് ആവശ്യത്തിന് വായുമര്ദ്ദമുണ്ടെന്ന് ഉറപ്പാക്കുക.
എയര് ഫില്റ്റര്
കാറിന്റെ എയര് ഫില്റ്റര് ഒരു പരിധിവരെ എഞ്ചിന്റെ 'ശ്വാസകോശം' പോലെയാണ്. എഞ്ചിന് ശരിയായി പ്രവര്ത്തിക്കാന് വായുവിന്റെയും ഇന്ധനത്തിന്റെയും ശരിയായ അനുപാതം ആവശ്യമാണ്. എന്നാല് എയര് ഫില്റ്റര് പൊടിയും അഴുക്കും അടിഞ്ഞ് അടഞ്ഞുപോയാല് എഞ്ചിനിലേക്ക് ആവശ്യത്തിന് വായു എത്തില്ല. ഇത് ഇന്ധന ഉപഭോഗം വര്ധിപ്പിക്കുകയും മൈലേജ് കുറയ്ക്കുകയും ചെയ്യും. അതിനാല് കൃത്യമായ ഇടവേളകളില് എയര് ഫില്റ്റര് പരിശോധിച്ച് വൃത്തിയാക്കുകയോ ആവശ്യമായാല് മാറ്റിസ്ഥാപിക്കുകയോ ചെയ്യണം.
സ്പാര്ക്ക് പ്ലഗ്
പഴകിയതോ അഴുക്കുപിടിച്ചതോ ആയ സ്പാര്ക്ക് പ്ലഗുകളും മൈലേജ് കുറയാന് കാരണമാകാം. ഇത്തരം സ്പാര്ക്ക് പ്ലഗുകള് ഇന്ധനം ശരിയായി കത്തുന്നതിനെ ബാധിക്കും. ഇതോടെ എഞ്ചിന്റെ പ്രവര്ത്തനക്ഷമത കുറയുകയും ഇന്ധന ഉപഭോഗം കൂടുകയും ചെയ്യും. അതിനാല് സ്പാര്ക്ക് പ്ലഗുകള് കൃത്യമായ ഇടവേളകളില് പരിശോധിച്ച് വൃത്തിയാക്കുകയോ ആവശ്യമായാല് മാറ്റിസ്ഥാപിക്കുകയോ ചെയ്യുക.
അമിതഭാരവും എ.സി. ഉപയോഗവും
കാറില് അനാവശ്യമായി അധികഭാരം കയറ്റിവയ്ക്കുന്നതും മൈലേജിനെ ബാധിക്കും. വാഹനത്തിന്റെ ഭാരം കൂടുന്തോറും അത് മുന്നോട്ട് നീക്കാന് എഞ്ചിന് കൂടുതല് ഊര്ജം ആവശ്യമായി വരും. അതിനാല് ഡിക്കിയിലും കാറിനുള്ളിലും ആവശ്യമില്ലാത്ത സാധനങ്ങള് സ്ഥിരമായി സൂക്ഷിക്കുന്നത് ഒഴിവാക്കുക.
അതുപോലെ ദീര്ഘനേരം എ.സി. ഉപയോഗിക്കുന്നതും ഇന്ധന ഉപഭോഗം വര്ധിപ്പിക്കാം. പ്രത്യേകിച്ച് വാഹനം നിര്ത്തിയിട്ടിരിക്കുമ്പോള് അനാവശ്യമായി എ.സി. പ്രവര്ത്തിപ്പിക്കുന്നത് ഒഴിവാക്കുന്നതാണ് നല്ലത്.
എഞ്ചിന് ഓയില്
എഞ്ചിന് ഓയില് കൃത്യസമയത്ത് മാറ്റാത്തതും മൈലേജ് കുറയാന് കാരണമാകാം. പഴകിയതോ വാഹനത്തിന് അനുയോജ്യമല്ലാത്തതോ ആയ എഞ്ചിന് ഓയില് ഉപയോഗിച്ചാല് എഞ്ചിനിലെ ഘര്ഷണം വര്ധിക്കാം. ഇതോടെ എഞ്ചിന് കൂടുതല് ജോലി ചെയ്യേണ്ടിവരികയും ഇന്ധന ഉപഭോഗം കൂടുകയും ചെയ്യും. അതിനാല് വാഹന നിര്മാതാവ് നിര്ദേശിക്കുന്ന നിലവാരത്തിലുള്ള എഞ്ചിന് ഓയില് മാത്രം ഉപയോഗിക്കുകയും കൃത്യമായ ഇടവേളകളില് അത് മാറ്റുകയും ചെയ്യുക.
Content Highlights :A sudden drop in mileage while driving can lead to serious issues. Instead of panicking in such a situation, immediately check these 5 things in your car.