യുവതാരനിരയെ അണിനിരത്തി സജില്‍ മമ്പാട്ട് സംവിധാനം ചെയ്ത സിനിമയാണ് ഡർബി. സോഷ്യല്‍ മീഡിയയില്‍ കസറിയ താരങ്ങളും മലയാളത്തിലെ യുവ താരങ്ങളും ഒത്തുചേരുന്ന ഡർബി തിയേറ്ററില്‍ ഭേദപ്പെട്ട വിജയം കാഴ്ചവെച്ചിരുന്നു.

ഇപ്പോഴിതാ സിനിമ ഒടിടിയിലേക്ക് എത്തുകയാണ്.

ആമസോണ്‍ പ്രൈം വീഡിയോ, മനോരമ മാക്സ് എന്നീ സ്ട്രീമിംഗ് പ്ലാറ്റ്ഫോമുകളിലൂടെ ആണ് സിനിമ സ്ട്രീമിങ്ങിന് ഒരുങ്ങുന്നത്. മെയ് 15 ന് ആണ് സിനിമ ഒടിടിയിലേക്ക് എത്തുന്നത്. മൂന്ന് വർഷത്തെ ക്യാംപസ് ജീവിതത്തെ ആസ്‌പദമാക്കി ഒരുങ്ങിയ ചിത്രത്തില്‍ ഇന്നത്തെ യുവത്വത്തിന്റെ പ്രണയവും സൗഹൃദവും പിണക്കവും ഇണക്കവും ഒക്കെ ഗംഭീര രീതിയില്‍ ഒരു കംപ്ലീറ്റ് എന്റർടൈനറായി സജില്‍ മമ്പാട്ട് അവതരിപ്പിക്കുന്നു.ഡർബിയുടെ ഛായാഗ്രഹണം ആമേൻ , ഗുഡ് ബാഡ് അഗ്ലി, മാർക്ക് ആന്റണി തുടങ്ങി മുപ്പതില്പരം തെന്നിന്ത്യൻ സിനിമകള്‍ക്ക് ക്യാമറ ചലിപ്പിച്ച അഭിനന്ദ് രാമാനുജനാണ്.

ഡിമാൻസ് ഫിലിം ഫാക്ടറിയുടെ ബാനറില്‍ മൻസൂർ അബ്ദുല്‍ റസാഖാണ് ഡർബിയുടെ നിർമ്മാണം നിർവഹിക്കുന്നത്. ഗംഭീര പ്രകടനമാണ് ഡർബിയില്‍ ഓരോ യുവതാരങ്ങളും സമ്മാനിച്ചത്. ആദം സാബിക്ക്,സാഗർ സൂര്യ, അമീൻ, ഹരി ശിവറാം, റിഷ് എൻ. കെ, അനു, ജസ്‌നിയ ജയദീഷ്, ശിവരാജ്, പ്രവീണ്‍, ആൻ മെർലറ്റ്, ഫ്രാങ്കോ ഫ്രാൻസിസ്, ഹിഫ്രാസ്, സുപർണ്ണ എസ്, ജോണി ആന്റണി, അബു സലിം, ശബരീഷ് വർമ്മ, ദിവ്യ എം നായർ, സന്തോഷ് കീഴാറ്റൂർ, പ്രദീപ് ബാലൻ, കൊല്ലം ഷാഫി, സിനോജ് വർഗ്ഗീസ്, ആർ.ജെ അന്തു, ഷിക്കു നസീർ, ഹബീബ് ഷാജഹാൻ, ഫാഹിസ് ബിൻ റിഫാഹി, മനൂപ് എലമ്പ്ര എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ഷൈൻ ടോം ചാക്കോ ചിത്രത്തിലെ ഒരു പ്രധാന റോളില്‍ എത്തുന്നു.