അതിവേഗം മാറിക്കൊണ്ടിരിക്കുന്ന ഒരു ലോകത്താണ് നാം ജീവിക്കുന്നത്. ആരോഗ്യരംഗത്ത് നാം കൈവരിച്ച പുരോഗതിയിലൂടെ മനുഷ്യരുടെ ആയുർദൈർഘ്യം വർധിക്കുകയും വയോജനങ്ങളുടെ എണ്ണം ക്രമാതീതമായി കൂടുകയും ചെയ്യുന്നു എന്നുള്ളത് ഒരു യാഥാർഥ്യമാണ് .
ഒരു ഭാഗത്ത് ഈ മാറ്റം അഭിമാനകരമാണെങ്കിലും, മറുഭാഗത്ത് ഏകാന്തത, അവഗണന, ഒറ്റപ്പെടല് എന്നീ പുതിയ വെല്ലുവിളികള് മുതിർന്ന പൗരന്മാരുടെ ജീവിതം ദുസ്സഹമാക്കുന്നു. ഈ സാമൂഹിക യാഥാർത്ഥ്യത്തെ നാം എങ്ങനെ കൈകാര്യം ചെയ്യുന്നു എന്നതിലാണ് ഒരു സമൂഹത്തിന്റെ സംസ്കാരത്തിൻ്റെ യഥാർത്ഥ മൂല്യം അടങ്ങിയിരിക്കുന്നത്.
35-ാമത് ഐക്യരാഷ്ട്രസഭയുടെ അന്താരാഷ്ട്ര വയോജന ദിനം 2025-ലെ പ്രമേയം, "പ്രാദേശികവും ആഗോളവുമായ പ്രവർത്തനങ്ങള്ക്ക് ചുക്കാൻ പിടിക്കുന്ന വയോജനങ്ങള്: ഞങ്ങളുടെ അഭിലാഷങ്ങള്, ഞങ്ങളുടെ ക്ഷേമം, ഞങ്ങളുടെ അവകാശങ്ങള്" (Older Persons Driving Local and Global Action: Our Aspirations, Our Well-Being, and Our Rights) എന്നതാണ്. ഈ തത്വങ്ങള് മുന്നോട്ട് വെക്കുന്നതിലൂടെ ഉദ്ദേശിക്കുന്നത് വയോജനങ്ങളെ പൊതുചർച്ചകളുടെയും അവരുടെ സാധ്യതകള്ക്കുള്ളിലെ ശ്രമങ്ങളുടെയും ഒരു വിശാലമായ തലത്തിലേക്ക് എത്തിക്കുക എന്നതാണ്. വയോജനങ്ങള് എന്നാല് കേവലം ഈ സമൂഹത്തിന്റെ സഹതാപവും പിന്തുണയും സ്വീകരിക്കുന്നവർ മാത്രമല്ല മറിച്ച്, പല സാമൂഹിക മാറ്റങ്ങള്ക്കും നേതൃത്വം നല്കാൻ കഴിയുന്ന ശക്തികേന്ദ്രങ്ങള് കൂടിയാണെന്ന് നാം തിരിച്ചറിയേണ്ടതുണ്ട്.
'പവർഫുള് വണ്ടർ വിമൻസ്'; സ്ത്രീകളുടെ ആയുർദൈർഘ്യത്തിന് പിന്നില് 'X'
ലോകമെമ്ബാടുമുള്ള സമൂഹങ്ങളുടെ ഭാവിയെ രൂപപ്പെടുത്തുന്നതില് വയോജനങ്ങളുടെ കൂടുതല് ഉള്പ്പെടുത്തല് (inclusion), ദൃശ്യത നല്കല് (visibility) പങ്കാളിത്തം (participation) എന്നിവ പ്രോത്സാഹിപ്പിക്കുകയാണ് ഈ വർഷത്തെ വയോജന ദിനാചരണത്തിന്റെ ലക്ഷ്യം.
വയോജനക്ഷേമത്തിനു വേണ്ടി പ്രവർത്തിക്കുന്ന 'യംഗ് സീനിയേഴ്സ്' ഭാവിയില് നടപ്പിലാക്കാൻ ഉദ്ദേശിക്കുന്ന ചില പദ്ധതികളുടെ ആവശ്യാർഥം കഴിഞ്ഞ ദിവസം കേരള സർക്കാരിന്റെ കീഴില് Social Justice Department നടത്തുന്ന കാസർഗോഡ് പരവനടുക്കം ഓള്ഡ് ഏജ് ഹോം സന്ദർശിച്ചിരുന്നു . ഒരു വയോജന മന്ദിരം എങ്ങനെയായിരിക്കണം എന്നതിന്റെ ഏറ്റവും മികച്ച മാതൃകകളിലൊന്നാണ് ഈ ഓള്ഡ് ഏജ് ഹോം. ഈ സന്ദർശനം ഉയർത്തിയ ചില ചിന്തകള് പങ്കുവെക്കുകയാണ്.
പ്രായമാകുന്നതോടുകൂടി മുഖ്യധാരയില് നിന്നും മാറ്റിനിർത്തപ്പെട്ട് ഉപേക്ഷിക്കപ്പെടേണ്ടവരാണോ വയോജനങ്ങള് ?
ഉപേക്ഷിക്കുക എന്ന് പറയുമ്ബോള് എവിടെയെങ്കിലും പുറന്തള്ളുക എന്നത് മാത്രമല്ല അർത്ഥമാക്കുന്നത്! അവർക്ക് അവരുടേതായ ഇടം ഉപയോഗിക്കാനുള്ള അവസരങ്ങള് നഷ്ട്ടപ്പെടുമ്ബോഴെല്ലാം അവർ ഉപേക്ഷിക്കപ്പെടുക തന്നെയാണ്. അവരെ ഒരു ബാധ്യതയായി കരുതുമ്ബോഴെല്ലാം അവർ കൂടുതല് ഇടുങ്ങിയ ഒരു ഇടത്തേക്ക് ഒതുങ്ങിക്കൂടേണ്ടിവരികയാണ്. അവർക്ക് അവരുടേതായ സാധ്യതകളുടെ ഒരു വാതില് തുറന്നുകൊടുക്കുക എന്നതാണ് അവരോട് നമുക്ക് ചെയ്യാനുള്ള ഏറ്റവും വലിയ കടമയും ഉത്തരവാദിത്തവും. പരിചരണം ആവശ്യമുള്ളവർക്ക് അത് നല്കണം. എന്നാല് വയോജനങ്ങള്ക്ക് വേണ്ടത് സ്വാതന്ത്ര്യമാണ്. അവരെക്കൊണ്ടാകുന്ന പലതും അവരില് ഇനിയും ബാക്കിയുണ്ട് എന്ന് നാം മനസ്സിലാക്കണം. അവരുടെ സംതൃപ്തിയെന്തെന്ന് തിരിച്ചറിയണം. അവരുടെ കഴിവുകള് ഉപയോഗിക്കാനുള്ള സാഹചര്യങ്ങളിലേക്ക് അവരെ വഴിനടത്തണം അതുമാത്രം മതി. വീടിനകത്തായാലും വീടിനു പുറത്ത് സമാന മനസ്കരായ സമപ്രായക്കാരായ ആളുകള് ഒത്തുകൂടുന്ന ഇടങ്ങളിലായാലും അവർക്ക് സ്വാതന്ത്ര്യത്തിന്റെ ശുദ്ധവായു ലഭിക്കേണ്ടതുണ്ട്.
അത്തരം ഒരുപാട് അന്തേവാസികളെ ഇവിടെ കാണാൻ കഴിയും. അവരൊക്കെ യഥാർത്ഥത്തില് ഒരു പുതിയ ജീവിതം ആസ്വദിക്കുകയാണ് ഇവിടെ. അവരുടെ കുടുംബവും കളിചിരികളും മറ്റു വിനോദങ്ങളും സുരക്ഷിതത്വവും എല്ലാം അടങ്ങുന്ന ഒരു ലോകം തന്നെയാണിത് ! ഇത്തരം കൂട്ടായ്മകളും സംവിധാനങ്ങളും സുരക്ഷിത സങ്കേതങ്ങളും ഈ കാലത്ത് ഒരു ആവശ്യം തന്നെയാണ് എന്ന് നിസംശയം പറയാം. ലോകം മാറുന്നതിനനുസരിച്ച് സാമൂഹികമായും കാലത്തിനനുസരിച്ചും നമ്മളും മാറണം! നമ്മുടെ മനോഭാവങ്ങള് മാറണം! മനസ്സുകള് കൂടുതല് വിശാലമാകണം. വയോജനങ്ങളുടെ അഭിലാഷങ്ങളും അവകാശങ്ങളും തിരിച്ചറിയാതെ പോകരുത്. അങ്ങനെയൊരു ഓർമ്മപ്പെടുത്തല് കൂടിയായി മാറട്ടെ ഈ ദിനം നമ്മെ ഓർമിപ്പിക്കുന്ന ചിന്തകള്.
വയോജനങ്ങളുടെ ആരോഗ്യം, അവരുടെ ക്ഷേമം എന്നതെല്ലാം ഈ സമൂഹത്തിന്റെ തന്നെ ക്ഷേമവും ആരോഗ്യവുമാണ്. അവരുടെ ആഗ്രഹങ്ങളെ മാനിക്കുകയും അവകാശങ്ങളെ അനുവദിച്ചുകൊടുക്കുകയും ചെയ്യുന്ന ഒരു സമൂഹമായി നാം മാറേണ്ടതുണ്ട്.
വയോജനക്ഷേമം സമൂഹത്തിന്റെ പ്രധാന ഉത്തരവാദിത്തമായി മാറുന്ന ഈ കാലഘട്ടത്തില്, കേരളത്തില് ഈ വിഷയത്തില് പൊതുസമൂഹത്തെ ബോധവല്ക്കരിക്കാൻ സാധിക്കുന്ന ക്രിയാത്മകമായ ചില നിർദേശങ്ങള് പങ്കുവെക്കാൻ ആഗ്രഹിക്കുകയാണ്.
വയോജനക്ഷേമം: സമൂഹത്തെ ബോധവല്ക്കരിക്കാനുള്ള വഴികള്
- വയോജനക്ഷേമം വിദ്യാഭ്യാസ പാഠ്യപദ്ധതിയില് ഉള്പ്പെടുത്തുക
അന്തർ-തലമുറ വിദ്യാഭ്യാസം (Inter-generational Education): സ്കൂള്-കോളേജ് പാഠ്യപദ്ധതികളില് വയോജന പരിചരണത്തിൻ്റെ പ്രാധാന്യം, വാർദ്ധക്യകാലത്തെ വെല്ലുവിളികള്, മുതിർന്നവരോടുള്ള ആദരം എന്നിവ വിഷയങ്ങളാക്കണം. - സേവന പഠനം (Service Learning): വിദ്യാർത്ഥികള്ക്ക് അവരുടെ സാമൂഹിക സേവന പദ്ധതിയുടെ ഭാഗമായി (NSS, NCC പോലുള്ളവ) വൃദ്ധസദനങ്ങളിലും പകല്വീടുകളിലും സമയം ചെലവഴിക്കാനുള്ള അവസരങ്ങള് നല്കുക. ഇത് നേരിട്ടുള്ള അനുഭവത്തിലൂടെ സ്നേഹവും ഉത്തരവാദിത്തബോധവും വളർത്താൻ സഹായിക്കും.
- മാധ്യമ പ്രചാരണവും കലാരൂപങ്ങളും ഉപയോഗിക്കുക
- മാതൃകാപരമായ കഥകള്: വയോജനങ്ങളെ നന്നായി സംരക്ഷിക്കുന്ന കുടുംബങ്ങളുടെയും, വാർദ്ധക്യത്തിലും സജീവമായിരിക്കുന്ന വ്യക്തികളുടെയും പോസിറ്റീവ് കഥകള് ദൃശ്യമാധ്യമങ്ങളിലൂടെയും സോഷ്യല് മീഡിയയിലൂടെയും പ്രചരിപ്പിക്കുക.
- ഷോർട്ട് ഫിലിമുകളും റീലുകളും: വയോജനങ്ങളുടെ ഒറ്റപ്പെടല്, അവഗണന, സാമ്ബത്തിക ചൂഷണം എന്നിവയുടെ ഭവിഷ്യത്തുകള് ലളിതമായി അവതരിപ്പിക്കുന്ന ഷോർട്ട് ഫിലിമുകള് നിർമ്മിക്കുകയും സാമൂഹിക മാധ്യമങ്ങളില് പ്രചരിപ്പിക്കുകയും ചെയ്യുക.
- പൊതു കലാപരിപാടികള്: തെരുവുനാടകങ്ങള്, മൈം, നാടൻ പാട്ടുകള് എന്നിവയിലൂടെ വയോജന സംരക്ഷണത്തിൻ്റെ സന്ദേശം പൊതു ഇടങ്ങളിലൂടെ പ്രചരിപ്പിക്കുക.
- നിയമപരവും സാമ്ബത്തികവുമായ അവബോധം നല്കുക
- നിയമ ബോധവല്ക്കരണം: മാതാപിതാക്കളുടെയും മുതിർന്ന പൗരന്മാരുടെയും സംരക്ഷണവും ക്ഷേമവും നിയമം (Maintenance and Welfare of Parents and Senior Citizens Act, 2007) സംബന്ധിച്ച നിയമവശങ്ങളെക്കുറിച്ച് ലഘുലേഖകളിലൂടെയും സെമിനാറുകളിലൂടെയും പൊതുജനങ്ങളെ ബോധവല്ക്കരിക്കുക.
- സാമ്ബത്തിക അവകാശം: വയോജനങ്ങളുടെ പെൻഷൻ പദ്ധതികള്, ചികിത്സാ ആനുകൂല്യങ്ങള് (ഉദാ: കാരുണ്യ പദ്ധതി), മറ്റ് സാമൂഹ്യ സുരക്ഷാ പദ്ധതികള് എന്നിവയെക്കുറിച്ച് അവബോധം നല്കുക.
- പ്രാദേശിക തലത്തിലുള്ള ഇടപെടലുകള്
- പഞ്ചായത്ത്-തല കൂട്ടായ്മകള്: ഓരോ വാർഡിലും വയോജനങ്ങള്ക്ക് മാത്രമായോ അല്ലെങ്കില് കുടുംബാംഗങ്ങള്ക്കും വയോജനങ്ങള്ക്കും ഒരുമിച്ചോ പങ്കെടുക്കാൻ കഴിയുന്ന കൂട്ടായ്മകളും വിനോദ പരിപാടികളും സംഘടിപ്പിക്കുക.
- പകല്വീടുകള് പ്രോത്സാഹിപ്പിക്കുക: സർക്കാർ തലത്തിലും സ്വകാര്യ തലത്തിലുമുള്ള വയോജന പകല്വീടുകളെക്കുറിച്ച് (Day Care Centers) പരമാവധി പ്രചാരം നല്കുക. ഒറ്റപ്പെട്ടുപോയ വയോജനങ്ങളെ ഇവിടെ പരിചയപ്പെടുത്താൻ പ്രാദേശിക യുവജന സംഘടനകളെ പ്രോത്സാഹിപ്പിക്കുക.
- അന്തർ-തലമുറ ദിനാചരണം: വയോജന ദിനം, ലോകാരോഗ്യ ദിനം തുടങ്ങിയ അവസരങ്ങളില് പുതുതലമുറയും മുതിർന്ന തലമുറയും ഒരുമിച്ച് പങ്കെടുക്കുന്ന പരിപാടികള് സംഘടിപ്പിക്കുക.
വെള്ളത്തിനുമുണ്ട് എക്സ്പയറി ഡേറ്റ്; റിസക് എടുക്കേണ്ട, ഇക്കാര്യങ്ങള് അറിഞ്ഞുവയ്ക്കാം
ഈ രീതിയിലുള്ള സമഗ്രമായ ബോധവല്ക്കരണത്തിലൂടെ മാത്രമേ വയോജനക്ഷേമം ഓരോ പൗരന്റെയും സാമൂഹിക ഉത്തരവാദിത്തമാണെന്ന ചിന്ത കേരളീയ സമൂഹത്തില് ആഴത്തില് വേരൂന്നൂ. വയോജനങ്ങളെ സമൂഹത്തിന് ഭാരമായി കാണാതെ, നാളത്തെ പുരോഗതിക്ക് ചുക്കാൻ പിടിക്കുന്ന ശക്തിയായി അംഗീകരിക്കുക. തലമുറകള് തമ്മിലുള്ള ഐക്യം ഊട്ടിയുറപ്പിക്കാൻ നാം ഓരോരുത്തരും ഈ സമയം പ്രതിജ്ഞയെടുക്കണം. നമ്മുടെ നാട് വയോജനസൗഹൃദമായാ നാടായി മാറട്ടെ...അതിനായി നമുക്കേവർക്കും കൈകോർക്കാം...
Content Highlights- Should the elderly be excluded from the mainstream as they age?