തിരുവനന്തപുരം: സംസ്ഥാനത്ത് ഇന്നും ശക്തമായ മഴയ്ക്ക് സാധ്യത. മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളിലാണ് യെല്ലോ അലേര്ട്ട്.
അടുത്ത മൂന്ന് മണിക്കൂറില് എറണാകുളം, തൃശൂര് ജില്ലകളില് ഓറഞ്ച് അലേര്ട്ടും പുറപ്പെടുവിച്ചിട്ടുണ്ട്. ഈ ജില്ലകളില് അതിശക്തമായ മഴയ്ക്കും മണിക്കൂറില് 50 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. മറ്റ് ജില്ലകളില് മഴ മുന്നറിയിപ്പ് ഇല്ലെങ്കിലും ഒറ്റപ്പെട്ടയിടങ്ങളില് ഇടത്തരം മഴയ്ക്കും മണിക്കൂറില് 40-50 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്നാണ് കാലാവസ്ഥാ വകുപ്പിന്റെ പ്രവചനം.
കനത്ത മഴ തുടരുന്ന സാഹചര്യത്തില് കോഴിക്കോട്, വയനാട്, മലപ്പുറം ജില്ലകളിലെ എല്ലാ വിദ്യാഭ്യാസ സ്ഥാപനങ്ങള്ക്കും ഇന്ന് അവധിയാണ്. വയനാട് ജില്ലയില് ഇന്നലെ റെഡ് അലേര്ട്ടായിരുന്നു. ഈ സാഹചര്യത്തിലാണ് വിദ്യാഭ്യാസ സ്ഥാപനങ്ങള്ക്ക് അവധി നല്കിയത്. ജില്ലയിലെ അങ്കണ്വാടികള്, മതപഠന ക്ലാസുകള്, ട്യൂഷന് സെന്ററുകള്, സ്പെഷ്യല് ക്ലാസുകള്, പ്രൊഫഷണല് കോളേജുകള് ഉള്പ്പെടെയുളള എല്ലാ വിദ്യാഭ്യാസ സ്ഥാപനങ്ങള്ക്കും അവധിയാണ്. മൂന്ന് ജില്ലകളിലും യൂണിവേഴ്സിറ്റി പരീക്ഷകള്, പിഎസ്സി പരീക്ഷകള് തുടങ്ങി മുന്കൂട്ടി നിശ്ചയിച്ച പരീക്ഷകള് മാറ്റമില്ലാതെ നടക്കും. നഷ്ടപ്പെട്ട പ്രവൃത്തി ദിനം പിന്നീട് നികത്തുന്നതിനുളള നടപടികള് അതത് സ്ഥാപന മേധാവികള് സ്വീകരിക്കണമെന്ന് മലപ്പുറം ജില്ലാ കളക്ടര് നിര്ദേശിച്ചു.
കേരള ബാങ്കിലെ ക്ലറിക്കല് തസ്തികകളിലേക്ക് നിയമനം നടത്താൻ ഹൈക്കോടതിയുടെ അനുമതി: ഇടക്കാല സ്റ്റേ നീക്കി
മലയോര മേഖലകളിലേക്ക് രാത്രി യാത്രയ്ക്ക് കര്ശന നിയന്ത്രണമേര്പ്പെടുത്തിയിട്ടുണ്ട്. വൈകീട്ട് ഏഴുമുതല് രാവിലെ ഏഴുവരെ മലയോര പ്രദേശങ്ങളിലൂടെയുളള യാത്ര പരമാവധി ഒഴിവാക്കണമെന്നാണ് ജില്ലാ ഭരണകൂടങ്ങളുടെ നിര്ദേശം. ഉരുള്പൊട്ടല് സാധ്യതയുളള പ്രദേശങ്ങളില് താമസിക്കുന്നവരെ സുരക്ഷിത സ്ഥാനങ്ങളിലേക്ക് മാറ്റാനുളള നടപടികള് പുരോഗമിക്കുകയാണ്. കടലാക്രമണം രൂക്ഷമാകാന് സാധ്യത ഉളളതിനാല് മത്സ്യത്തൊഴിലാളികള് കടലില് പോകുന്നതിനും നിയന്ത്രണമുണ്ട്.
Content Highlights: Heavy monsoon rains continue to lash Kerala. The IMD has issued a yellow alert for 5 districts, and local administrations have declared a holiday for educational institutions in 3 districts.