സുരക്ഷാസേന നടത്തിയ തിരിച്ചടിയില്‍ 12 ആക്രമികള്‍ കൊല്ലപ്പെട്ടു. തിങ്കളാഴ്ച ചാഗായിലെ റെക്കോ ദിഖ് ചെമ്പ്-സ്വർണ ഖനി പദ്ധതിയില്‍ തൊഴിലാളികളെ ഇറക്കിയ ശേഷം ക്വറ്റയിലേക്ക് മടങ്ങുകയായിരുന്ന വാഹനവ്യൂഹമാണ് ആക്രമിക്കപ്പെട്ടത്. ഏകദേശം 36 ഒഴിഞ്ഞ വാഹനങ്ങളാണ് സംഘത്തിലുണ്ടായിരുന്നത്.

രണ്ട് മണിക്കൂറോളം വെടിവെപ്പ്

ആക്രമികള്‍ വാഹനവ്യൂഹത്തെ പതിയിരുന്ന് ആക്രമിക്കുകയും ശക്തമായി വെടിയുതിർക്കുകയും ചെയ്തു. വാഹനവ്യൂഹത്തിനൊപ്പമുണ്ടായിരുന്ന സുരക്ഷാസേന ഉടൻ തന്നെ സ്ഥാനമുറപ്പിച്ച്‌ തിരിച്ചടിച്ചു. ഏകദേശം രണ്ട് മണിക്കൂറോളം വെടിവെപ്പ് നീണ്ടുനിന്നു. ഏറ്റുമുട്ടലില്‍ രണ്ട് സുരക്ഷാ ഉദ്യോഗസ്ഥർക്കും പരിക്കേറ്റു. കൊല്ലപ്പെട്ട ആക്രമികളില്‍ നിന്ന് ആയുധങ്ങളും വെടിക്കോപ്പുകളും കണ്ടെടുത്തതായി പൊലീസ് അറിയിച്ചു.

റെക്കോ ദിഖ് ഖനി പദ്ധതിക്ക് തന്ത്രപ്രാധാന്യം

അഫ്ഗാനിസ്ഥാൻ, ഇറാൻ അതിർത്തികള്‍ക്ക് സമീപമുള്ള ചാഗായ് ജില്ലയിലാണ് റെക്കോ ദിഖ് പദ്ധതി. പാകിസ്ഥാനിലെ ഏറ്റവും വലിയ ഖനന പദ്ധതികളിലൊന്നാണിത്. കാനഡ ആസ്ഥാനമായ ബാരിക് മൈനിങ്, പാകിസ്ഥാൻ സർക്കാർ, ബലൂചിസ്ഥാൻ പ്രവിശ്യാ സർക്കാർ എന്നിവയുടെ പങ്കാളിത്തത്തിലാണ് പദ്ധതി നടപ്പാക്കുന്നത്. വിദേശ നിക്ഷേപം ആകർഷിക്കാനും ധാതു കയറ്റുമതി വർധിപ്പിക്കാനുമുള്ള പാകിസ്ഥാന്റെ പദ്ധതികളില്‍ റെക്കോ ദിഖിന് വലിയ പ്രാധാന്യമുണ്ട്.

ബലൂചിസ്ഥാനില്‍ വർഷങ്ങളായി സംഘർഷം

ബലൂചിസ്ഥാനില്‍ പതിറ്റാണ്ടുകളായി വിവിധ സായുധസംഘങ്ങളുടെ കലാപം തുടരുകയാണ്. ബലൂചിസ്ഥാൻ ലിബറേഷൻ ആർമി ഉള്‍പ്പെടെയുള്ള സംഘടനകള്‍ സ്വതന്ത്ര ബലൂചിസ്ഥാൻ ആവശ്യപ്പെടുന്നുണ്ട്. സുരക്ഷാസേനയ്ക്കും സർക്കാർ സ്ഥാപനങ്ങള്‍ക്കും ചൈന-പാകിസ്ഥാൻ സാമ്പത്തിക ഇടനാഴിയുമായി ബന്ധപ്പെട്ട പദ്ധതികള്‍ക്കും നേരെയുള്ള ആക്രമണങ്ങള്‍ സമീപകാലത്ത് വർധിച്ചിട്ടുണ്ട്. പ്രവിശ്യയിലുടനീളം സായുധസംഘങ്ങള്‍ക്കെതിരായ രഹസ്യവിവരങ്ങളുടെ അടിസ്ഥാനത്തിലുള്ള ലക്ഷ്യമിട്ട നടപടികള്‍ തുടരുകയാണെന്ന് ബലൂചിസ്ഥാൻ മുഖ്യമന്ത്രി മിർ സർഫ്രാസ് ബുഗ്തി അറിയിച്ചു.