കിർഗിസ്ഥാന്റെ തലസ്ഥാനമായ ബിഷ്കെക്കില്‍ ചൊവ്വാഴ്ച നടന്ന 26-ാമത് ഷാങ്ഹായ് സഹകരണ സംഘടന ഉച്ചകോടിയിലാണ് മോദിയുടെ മുന്നറിയിപ്പ്. ഭീകരവാദത്തിനെതിരെ ഇരട്ടത്താപ്പിന് ഇടമില്ലെന്നും ഭീകരശൃംഖല മുഴുവനായി തകർക്കണമെന്നും അദ്ദേഹം ആവശ്യപ്പെട്ടു. പാകിസ്ഥാൻ പ്രധാനമന്ത്രി ഷെഹ്ബാസ് ഷരീഫ് ഉള്‍പ്പെടെയുള്ള നേതാക്കളുടെ സാന്നിധ്യത്തിലായിരുന്നു പരാമർശം.

ഭീകരവാദത്തിനെതിരെ ഒറ്റക്കെട്ടാകണം

ചൈനീസ് പ്രസിഡന്റ് ഷി ജിൻപിങ്, റഷ്യൻ പ്രസിഡന്റ് വ്ലാഡിമിർ പുടിൻ, ഇറാൻ പ്രസിഡന്റ് മസൂദ് പെസെഷ്കിയാൻ തുടങ്ങിയ നേതാക്കളും ചർച്ചയില്‍ പങ്കെടുത്തു. ഭീകരരെ സംരക്ഷിക്കുകയും സഹായിക്കുകയും ചെയ്യുന്ന രാജ്യങ്ങള്‍ക്ക് ശക്തമായ സന്ദേശം നല്‍കണമെന്ന് മോദി ആവശ്യപ്പെട്ടു. മയക്കുമരുന്ന് കടത്തും സംഘടിത കുറ്റകൃത്യങ്ങളും യുവാക്കള്‍ക്കും മേഖലയുടെ സുരക്ഷയ്ക്കും വലിയ ഭീഷണിയാണെന്നും അദ്ദേഹം ചൂണ്ടിക്കാട്ടി. ഇവ നേരിടാൻ എസ്‌സിഒ രാജ്യങ്ങള്‍ തമ്മിലുള്ള സഹകരണം കൂടുതല്‍ ശക്തമാക്കണമെന്നും മോദി പറഞ്ഞു.

യുദ്ധത്തിന് പകരം ചർച്ച

പശ്ചിമേഷ്യയിലെ പ്രതിസന്ധി ഒരു മേഖലയിലെ സംഘർഷം അവിടെ മാത്രം ഒതുങ്ങില്ലെന്ന് തെളിയിച്ചതായും മോദി പറഞ്ഞു. ഊർജസുരക്ഷ, സമുദ്രവ്യാപാരം, വിതരണ ശൃംഖല എന്നിവയെ ഇത്തരം സംഘർഷങ്ങള്‍ ബാധിക്കും. ഇതിന്റെ വലിയ വില നല്‍കേണ്ടിവരുന്നത് ആഗോള ദക്ഷിണ മേഖലയിലെ രാജ്യങ്ങളാണ്. അതിനാല്‍ യുദ്ധവും സംഘർഷവും യുദ്ധക്കളത്തിലല്ല, ചർച്ചയിലൂടെയും നയതന്ത്രത്തിലൂടെയും പരിഹരിക്കണമെന്നാണ് ഇന്ത്യയുടെ നിലപാടെന്നും മോദി വ്യക്തമാക്കി.

രാജ്യങ്ങളുടെ പരമാധികാരം മാനിക്കണം

വിപണികളെ ബന്ധിപ്പിക്കാനും വ്യാപാരം എളുപ്പമാക്കാനും വികസനത്തിന് പുതിയ വഴികള്‍ തുറക്കാനുമുള്ള ശ്രമങ്ങളെ ഇന്ത്യ പിന്തുണയ്ക്കുമെന്ന് മോദി പറഞ്ഞു. എന്നാല്‍ ഇത്തരം പദ്ധതികള്‍ എല്ലാ രാജ്യങ്ങളുടെയും പരമാധികാരവും ഭൗമ അഖണ്ഡതയും മാനിക്കണം. റോഡ്, റെയില്‍, വ്യോമപാത എന്നിവയ്ക്കൊപ്പം കസ്റ്റംസ് നടപടികള്‍ ലളിതമാക്കുകയും ഡിജിറ്റല്‍ രേഖകളും കാര്യക്ഷമമായ ചരക്കുനീക്ക സംവിധാനങ്ങളും പ്രോത്സാഹിപ്പിക്കുകയും വേണമെന്നും അദ്ദേഹം പറഞ്ഞു.

ജനങ്ങളിലേക്ക് നേട്ടമെത്തണം

എസ്‌സിഒ സഹകരണത്തിന്റെ നേട്ടങ്ങള്‍ സാധാരണ ജനങ്ങളിലേക്ക് നേരിട്ട് എത്തണമെന്നാണ് ഇന്ത്യയുടെ നിലപാട്. യുവാക്കള്‍ക്കും സംരംഭകർക്കും കർഷകർക്കും ലഭിക്കുന്ന അവസരങ്ങളിലൂടെയാണ് സംഘടനയുടെ വിജയത്തെ വിലയിരുത്തേണ്ടതെന്നും മോദി പറഞ്ഞു. വരാനിരിക്കുന്ന 25 വർഷത്തിലും ജനങ്ങള്‍ തമ്മിലുള്ള ബന്ധത്തിന് എസ്‌സിഒ സഹകരണത്തില്‍ പ്രധാന സ്ഥാനം നല്‍കണമെന്നും അദ്ദേഹം ആവശ്യപ്പെട്ടു.