മുപ്പത്തഞ്ചുകാരനായ ഉമേഷ് കുമാർ ചൗഹാനാണ് ഒക്ടോബർ 18ന് ജുഹുവിലെ പുഷ്പ പാർക്കിനടുത്ത് വെടിയേറ്റത്. കെഇഎം ആശുപത്രിയില്‍ ചികിത്സയിലുള്ള അദ്ദേഹത്തിന്റെ നില തൃപ്തികരമാണെന്ന് ഡോക്ടർമാർ അറിയിച്ചു.

ഉപജീവനത്തിനൊപ്പം വിഡിയോ സ്വപ്നവും

പതിനെട്ടുവർഷമായി മുംബൈയില്‍ വീടുതോറും സോപ്പുപൊടി വിറ്റാണ് ഉമേഷ് കുടുംബം പോറ്റുന്നത്. ഒന്നരവർഷമായി സിനിമാതാരങ്ങളുടെയും വീടുകളുടെയും ആരാധകരുടെയും ദൃശ്യങ്ങള്‍ പകർത്തി സമൂഹമാധ്യമങ്ങളില്‍ പങ്കുവെക്കുന്നു.

സുഹൃത്തും വ്ലോഗറുമായ കിസാൻ രാജ്ഭറിനൊപ്പമാണ് അന്ന് പുഷ്പ പാർക്കിലെത്തിയത്. ഫുട്ബോള്‍ കളിക്കാനെത്തിയ ടൈഗർ ഇവരോട് സംസാരിക്കുകയും ചിത്രങ്ങള്‍ക്ക് പോസ് ചെയ്യുകയും ചെയ്തു.

കാറില്‍ കയറിയപ്പോള്‍ വെടിയൊച്ച

ടൈഗർ ഡ്രൈവർക്കൊപ്പം കാറില്‍ കയറിയപ്പോഴാണ് വെടിവെപ്പുണ്ടായതെന്ന് രാജ്ഭർ പറഞ്ഞു. തുടർച്ചയായി പടക്കം പൊട്ടുന്നതുപോലെയായിരുന്നു ശബ്ദം.

ഇതിനിടെയാണ് ഉമേഷിന് വെടിയേറ്റത്. ആദ്യം കൂപ്പർ ആശുപത്രിയിലും പിന്നീട് അർധരാത്രിയോടെ കെഇഎം ആശുപത്രിയിലുമെത്തിച്ചു.

കരളിന് പരിക്ക്; നില തൃപ്തികരം

കരളിനേറ്റ പരിക്കില്‍ തുടർരക്തസ്രാവമില്ലെന്നും ഹൃദയത്തിനും ശ്വാസകോശത്തിനും കേടില്ലെന്നും ഡോക്ടർമാർ അറിയിച്ചു. ഉടൻ ശസ്ത്രക്രിയ നടത്താതെ ചികിത്സ തുടരാനായിരുന്നു തീരുമാനം.

ടൈഗർ നിസ്സാര പോറലുകളോടെ ആശുപത്രിവിട്ടു. ഡ്രൈവർ ഇബ്രാഹിം ഫിർദൗസിന്റെ ഇടതുകൈയില്‍ വെടിയേല്‍ക്കുകയും അസ്ഥിക്ക് പൊട്ടലുണ്ടാകുകയും ചെയ്തു.

കാത്തിരിപ്പില്‍ ഗർഭിണിയായ ഭാര്യയും മകനും

എട്ടുമാസം ഗർഭിണിയായ ഭാര്യയ്ക്കും ആറുവയസ്സുകാരൻ ആരവിനുമൊപ്പം മാൻഖുർദിലാണ് ഉമേഷിന്റെ താമസം. ആരോഗ്യപരമായ കരുതല്‍മൂലം ആശുപത്രിയിലെത്തരുതെന്ന് ഭാര്യയോട് ഡോക്ടർ നിർദേശിച്ചതായി ബന്ധു അറിയിച്ചു.

ഉത്തർപ്രദേശിലുള്ള മാതാപിതാക്കള്‍ മുംബൈയിലേക്ക് വരാൻ ട്രെയിൻ ടിക്കറ്റ് എടുത്തു.