ചെറിയ മനസും ചെറിയ കണ്ണുകളുമായി വലിയ കാര്യങ്ങള്‍ക്ക് ഭാഷ്യം ചമയ്ക്കാനാണ് പലരും ശ്രമിക്കുന്നതെന്നും അദ്ദേഹം പറഞ്ഞു. ചെമ്പഴന്തി ഗുരുകുലത്തില്‍ ശ്രീനാരായണ ഗുരുദേവന്റെ 172-ാമത് ജയന്തിയോടനുബന്ധിച്ച്‌ നടന്ന തിരുജയന്തി മഹാസമ്മേളനത്തില്‍ ജയന്തി സന്ദേശം നല്‍കുകയായിരുന്നു സ്വാമി സച്ചിദാനന്ദ.

ഗുരുവിനെ വിശാലമായി കാണണം

ഭ്രാന്താലയമായിരുന്ന കേരളത്തെ മാതൃകാലയമാക്കി മാറ്റിയത് ഗുരുദേവനാണെന്ന് സ്വാമി സച്ചിദാനന്ദ പറഞ്ഞു. ശാസ്ത്രയുഗത്തിലും ഗുരുദേവൻ ഋഷിവര്യനായി നിലനില്‍ക്കുകയാണ്. ഗുരുവിനെ വിശാലമായ കാഴ്ചപ്പാടോടെ കാണാനും ഗുരുവിന്റെ വീക്ഷണത്തിനനുസരിച്ച്‌ പ്രവർത്തിക്കാനും കഴിയണമെന്നും അദ്ദേഹം പറഞ്ഞു.

മതമല്ല, മനുഷ്യനാണ് വലുത്

മതമല്ല, മനുഷ്യനാണ് വലുതെന്ന ഗുരുദേവ ദർശനം സാക്ഷാത്കരിക്കുകയാണ് വേണ്ടതെന്നും സ്വാമി സച്ചിദാനന്ദ പറഞ്ഞു. അതിനായി ഗുരുവിനെ പഠിക്കുകയും ഗുരുദർശനം ജീവിതത്തില്‍ പ്രാവർത്തികമാക്കുകയും വേണം. ഗുരുദർശനത്തിന്റെ കാലിക പ്രസക്തി വർധിച്ചുവരികയാണെന്നും കാലം നേരിടുന്ന പ്രശ്നങ്ങള്‍ക്ക് ഗുരുദർശനം ഔഷധമാണെന്നും സ്വാമി ശുഭാംഗാനന്ദയും പറഞ്ഞു.

ഗുരുസന്ദേശം സമൂഹ നിർമാണത്തിന്

മഹത്തായ സമൂഹത്തെ കെട്ടിപ്പടുക്കുന്നതിനുള്ളതാണ് ഗുരുസന്ദേശമെന്ന് സ്വാമി ശുഭാംഗാനന്ദ പറഞ്ഞു. ഗുരുജയന്തി ദിനത്തിലെ ചിന്തകളും ചർച്ചകളും അത്തരമൊരു ലക്ഷ്യത്തിലേക്ക് വളരണമെന്നും അദ്ദേഹം വ്യക്തമാക്കി.