ഓഗസ്റ്റ് 31നാണ് പദ്ധതിയുടെ പ്രവർത്തന ചട്ടക്കൂട് കേന്ദ്രം വിജ്ഞാപനം ചെയ്തത്. ഇന്ത്യൻ ഉടമസ്ഥതയിലുള്ള ചിപ്പ് ഡിസൈൻ കമ്പനികള്‍ വളർത്തുക, തന്ത്രപ്രധാന സാങ്കേതികവിദ്യകള്‍ വികസിപ്പിക്കുക, ഇന്ത്യയില്‍ രൂപകല്‍പ്പന ചെയ്യുന്ന ചിപ്പുകള്‍ വിപണിയിലെത്തിക്കുക എന്നിവയാണ് പ്രധാന ലക്ഷ്യങ്ങള്‍.

സ്റ്റാർട്ടപ്പുകള്‍ക്ക് ₹15 കോടി വരെ

വാണിജ്യാടിസ്ഥാനത്തില്‍ ചിപ്പുകള്‍ രൂപകല്‍പ്പന ചെയ്യുന്ന സ്റ്റാർട്ടപ്പുകള്‍ക്കും എംഎസ്‌എംഇകള്‍ക്കും പദ്ധതിച്ചെലവിന്റെ 50 ശതമാനം അല്ലെങ്കില്‍ പരമാവധി ₹15 കോടി വരെ സീഡ് ഫണ്ടിങ് ലഭിക്കും. വിലകൂടിയ ചിപ്പ് ഡിസൈൻ ടൂളുകളും വേഫർ ഫാബ്രിക്കേഷൻ സേവനങ്ങളും കമ്പനികള്‍ക്ക് ലഭ്യമാക്കും. ദേശീയ സുരക്ഷയ്ക്കും നിർണായക അടിസ്ഥാന സൗകര്യങ്ങള്‍ക്കും ആവശ്യമായ ചിപ്പുകളുടെ വികസനത്തിന് സി-ഡാക് മത്സരാധിഷ്ഠിതമായി കമ്പനികളെ തിരഞ്ഞെടുക്കും. ഇത്തരം പദ്ധതികളിലൂടെ വികസിപ്പിക്കുന്ന ബൗദ്ധിക സ്വത്തവകാശം സി-ഡാക്കും കമ്പനിയും സംയുക്തമായി കൈവശം വയ്ക്കും.

ഇന്ത്യൻ ചിപ്പുകള്‍ വാങ്ങാനും പ്രോത്സാഹനം

ഇന്ത്യയില്‍ വികസിപ്പിച്ച പുതിയ ചിപ്പുകള്‍ക്ക് വിപണിയില്‍ ആവശ്യക്കാരെ കണ്ടെത്തുന്നതും പദ്ധതി ലക്ഷ്യമിടുന്നു. അർഹമായ ചിപ്പുകള്‍ക്കും സിസ്റ്റം-ഓണ്‍-ചിപ്പുകള്‍ക്കും അഞ്ച് വർഷത്തേക്ക് അറ്റവില്‍പ്പനയുടെ 9 ശതമാനത്തിന് തുല്യമായ തുക തിരികെ നല്‍കും. ഒരു അപേക്ഷയ്ക്ക് പരമാവധി ₹30 കോടിയും ഒരു കമ്പനിക്കും അതിന്റെ ഗ്രൂപ്പ് സ്ഥാപനങ്ങള്‍ക്കും ചേർന്ന് ₹120 കോടിയുമാണ് പരിധി. സെമികണ്ടക്ടർ ഉപകരണങ്ങള്‍, അസംസ്കൃത വസ്തുക്കള്‍, ഫാബ്രിക്കേഷൻ, അഡ്വാൻസ്ഡ് പാക്കേജിങ് എന്നിവയ്ക്കും സാമ്പത്തിക സഹായമുണ്ട്. ഒരു ലക്ഷം സെമികണ്ടക്ടർ എൻജിനീയർമാരെ കൂടി പരിശീലിപ്പിക്കാനും കേന്ദ്രം ലക്ഷ്യമിടുന്നു.