ഓഗസ്റ്റ് 20നായിരുന്നു മരണം. കേസില്‍ പട്ടികജാതി-പട്ടികവർഗ അതിക്രമ നിരോധന നിയമം ചുമത്താത്തതിനെ തുടർന്ന് ദേശീയ പട്ടികവർഗ കമ്മിഷൻ ജമ്മു കശ്മീർ ഭരണകൂടത്തിന് നോട്ടീസ് നല്‍കി. അഞ്ച് ദിവസത്തിനകം റിപ്പോർട്ട് നല്‍കാനാണ് നിർദേശം.

മാസങ്ങളോളം പീഡിപ്പിച്ചെന്ന് പരാതി

പ്രായപൂർത്തിയാകാത്ത പെണ്‍കുട്ടിയെ സ്കൂളിലെ ഹെഡ്മാസ്റ്റർ മാസങ്ങളോളം ലൈംഗികമായി പീഡിപ്പിച്ചെന്നാണ് പരാതി. വയറുവേദന അനുഭവപ്പെട്ടതിനെ തുടർന്ന് പെണ്‍കുട്ടിയെ പ്രാദേശിക ആരോഗ്യകേന്ദ്രത്തില്‍ എത്തിച്ചപ്പോഴാണ് ഗർഭിണിയാണെന്ന് കണ്ടെത്തിയത്. പിന്നീട് വിവിധ ചികിത്സാകേന്ദ്രങ്ങളില്‍ എത്തിച്ച്‌ ഗർഭച്ഛിദ്രത്തിന് ശ്രമിച്ചെന്നും ഇതോടെ ആരോഗ്യനില വഷളായെന്നുമാണ് റിപ്പോർട്ട്. പ്രസവം കൃത്രിമമായി ആരംഭിച്ചതിനെ തുടർന്ന് കുഞ്ഞ് മരിച്ച നിലയില്‍ ജനിച്ചു. പിന്നീട് ഉധംപൂരിന് സമീപത്തെ ആശുപത്രിയിലേക്ക് കൊണ്ടുപോകുന്നതിനിടെയാണ് പെണ്‍കുട്ടി മരിച്ചത്.

ഹെഡ്മാസ്റ്ററും സഹോദരനും അറസ്റ്റില്‍

ഗർഭച്ഛിദ്ര ശ്രമത്തിനായി പെണ്‍കുട്ടിക്കൊപ്പം പോയെന്ന് പറയപ്പെടുന്ന ഹെഡ്മാസ്റ്ററെയും ഇയാളുടെ സഹോദരനെയും പൊലീസ് അറസ്റ്റ് ചെയ്തു. വിദ്യാഭ്യാസ വകുപ്പ് ഹെഡ്മാസ്റ്ററെ സസ്പെൻഡ് ചെയ്ത് വകുപ്പുതല അന്വേഷണവും തുടങ്ങി. പെണ്‍കുട്ടിയുടെ മരണത്തിന് പിന്നാലെ കിഷ്ത്വാർ ജില്ലയുടെ വിവിധ ഭാഗങ്ങളില്‍ പ്രതിഷേധവും ഉയർന്നു. ട്രൈബല്‍ ഗുജ്ജർ ബക്കർവാള്‍ വെല്‍ഫെയർ ഫൗണ്ടേഷൻ അംഗം കബീർ അഹമ്മദിന്റെ പരാതിയെത്തുടർന്നാണ് ദേശീയ പട്ടികവർഗ കമ്മിഷന്റെ ഇടപെടല്‍.

എസ്.സി-എസ്.ടി നിയമം ചുമത്താത്തതില്‍ ചോദ്യം

പെണ്‍കുട്ടി ആദിവാസി വിഭാഗത്തില്‍പ്പെട്ടയാളായിട്ടും പൊലീസ് പട്ടികജാതി-പട്ടികവർഗ അതിക്രമ നിരോധന നിയമം ചുമത്തിയില്ലെന്നാണ് കമ്മിഷൻ ചൂണ്ടിക്കാട്ടിയത്. ഓഗസ്റ്റ് 25ന് നല്‍കിയ നോട്ടീസില്‍ ജമ്മു കശ്മീർ ചീഫ് സെക്രട്ടറി, ഡിജിപി, കിഷ്ത്വാർ എസ്.എസ്.പി എന്നിവരോടാണ് വിശദീകരണം തേടിയത്. പെണ്‍കുട്ടിയുടെയും ഹെഡ്മാസ്റ്ററുടെയും സാമൂഹിക വിഭാഗം പരിശോധിക്കാനും കുടുംബത്തിന് സംരക്ഷണം നല്‍കാനും നഷ്ടപരിഹാരം പരിഗണിക്കാനും തെളിവുകള്‍ സംരക്ഷിക്കാനും കമ്മിഷൻ ആവശ്യപ്പെട്ടു.