പദ്ധതി ഇപ്പോഴും കരടിലാണ്. നടപ്പായാല്‍ സാധുവായ അമേരിക്കൻ പാസ്‌പോർട്ട്, ജനനസർട്ടിഫിക്കറ്റ്, ഐ-94 ഫോം, സ്ഥിരതാമസ കാർഡ് എന്നിവയില്‍ അനുയോജ്യമായ രേഖ ഹാജരാക്കണം.

കുട്ടിക്ക് പൗരത്വത്തിന് അർഹതയുണ്ടോ എന്ന് പരിശോധിക്കും

പ്രസിഡന്റ് ഡോണള്‍ഡ് ട്രംപിന്റെ 2026 ഓഗസ്റ്റ് ആറിലെ ഉത്തരവിന്റെ പരിധിയില്‍ കുട്ടി വരുമോയെന്ന് തീരുമാനിക്കാനാണ് വിവരങ്ങള്‍ ശേഖരിക്കുന്നത്. നിലവില്‍ അമേരിക്കയില്‍ ജനിച്ച കുട്ടിയുടെ പാസ്‌പോർട്ടിന് മാതാപിതാക്കള്‍ ബന്ധം തെളിയിക്കുകയും സർക്കാർ നല്‍കിയ തിരിച്ചറിയല്‍ രേഖ സമർപ്പിക്കുകയും ചെയ്താല്‍ മതി. അപേക്ഷയില്‍ പൗരത്വം രേഖപ്പെടുത്തുന്നുണ്ടെങ്കിലും കുടിയേറ്റപദവി തെളിയിക്കുന്ന രേഖ പതിവായി ആവശ്യപ്പെടുന്നില്ല.

ജന്മാവകാശ പൗരത്വ നിയന്ത്രണത്തിനെതിരെ നിയമപോരാട്ടം

പ്രസവത്തിനായി അമേരിക്കയിലെത്തി കുട്ടിക്ക് പൗരത്വം നേടുന്ന രീതി തടയുകയാണ് പുതിയ ഉത്തരവിന്റെ ലക്ഷ്യം. വിദേശ സർക്കാരിനായി ജോലി ചെയ്യുന്നവരുടെയും തട്ടിപ്പിലൂടെയോ വാണിജ്യ ഇടപാടിലൂടെയോ പൗരത്വം നേടാൻ ശ്രമിക്കുന്നവരുടെയും ശത്രുരാജ്യ പൗരന്മാരായി കണക്കാക്കപ്പെടുന്നവരുടെയും കുട്ടികള്‍ക്ക് പൗരത്വം നിഷേധിക്കാനും വ്യവസ്ഥയുണ്ട്. ട്രംപിന്റെ മുൻ ഉത്തരവ് ഭരണഘടനാവിരുദ്ധമാണെന്ന് സുപ്രീംകോടതി വിധിച്ചിരുന്നു. പുതിയ ഉത്തരവും നിയമപോരാട്ടത്തിലാണ്.