2025 ഡിസംബർ 22ന് പുലർച്ചെയാണ് സംഭവം. മാള്‍ റോഡിനും മണാലി ബസ് സ്റ്റാൻഡിനും സമീപം സംഘം പ്രവർത്തിക്കുന്നുവെന്ന വിവരമാണ് പൊലീസിന് ലഭിച്ചത്. തുടർന്ന് സാധാരണ വേഷത്തിലെത്തിയ രണ്ട് പൊലീസുകാരെ ഉപഭോക്താക്കളെന്ന വ്യാജേന സ്ഥലത്തേക്ക് അയച്ചു.

500 രൂപയുടെ നോട്ടുകള്‍ നല്‍കി കെണി

അടയാളപ്പെടുത്തിയ 500 രൂപ നോട്ടുകളുമായാണ് പൊലീസുകാർ എത്തിയത്. പണം സ്വീകരിച്ചാല്‍ മിസ്ഡ് കോള്‍ നല്‍കാനും സ്ഥലം അറിയിക്കാനും ഇവർക്ക് നിർദേശം നല്‍കിയിരുന്നു. പുലർച്ചെ 1.40ഓടെ പൊലീസുകാരില്‍ ഒരാള്‍ മിസ്ഡ് കോള്‍ നല്‍കി സ്ഥലം കൈമാറി. ഉടൻ മറ്റ് ഉദ്യോഗസ്ഥർ സ്ഥലത്തെത്തി ഏഴ് സ്ത്രീകളെയും രണ്ട് പുരുഷന്മാരെയും പിടികൂടി. വീട്ടുജോലി നല്‍കാമെന്ന് പറഞ്ഞാണ് തങ്ങളെ മണാലിയിലെത്തിച്ചതെന്നും പിന്നീട് വേശ്യാവൃത്തിയിലേക്ക് തള്ളിവിട്ടെന്നും സ്ത്രീകള്‍ പൊലീസിനോട് പറഞ്ഞതായി പ്രോസിക്യൂഷൻ അറിയിച്ചു.

പ്രതിക്ക് ജാമ്യമില്ല

കേസിലെ ഒരു പ്രതി പിന്നീട് ജാമ്യം തേടി ഹിമാചല്‍ പ്രദേശ് ഹൈക്കോടതിയെ സമീപിച്ചു. താൻ നിരപരാധിയാണെന്നും കേസുമായി ബന്ധിപ്പിക്കുന്ന തെളിവില്ലെന്നും പ്രതിക്കുവേണ്ടി അഭിഭാഷക അഞ്ചല്‍ ശർമ വാദിച്ചു. എന്നാല്‍ ജോലി വാഗ്ദാനം ചെയ്ത് സ്ത്രീകളെ മണാലിയിലെത്തിച്ച്‌ വേശ്യാവൃത്തിയിലേക്ക് തള്ളിയെന്നും അതില്‍നിന്നുള്ള വരുമാനം പ്രതി കൈപ്പറ്റിയെന്നും ഡെപ്യൂട്ടി അഡ്വക്കേറ്റ് ജനറല്‍ പ്രശാന്ത് സെൻ വാദിച്ചു. അടയാളപ്പെടുത്തിയ കറൻസി നോട്ട് കണ്ടെത്തിയതും പ്രോസിക്യൂഷൻ ചൂണ്ടിക്കാട്ടി.

സ്ത്രീകളുടെ സമ്മതം പ്രതിക്ക് രക്ഷയാകില്ല

ജസ്റ്റിസ് രാകേഷ് കൈന്ഥ്ല ഓഗസ്റ്റ് 19ന് നല്‍കിയ ഉത്തരവില്‍ പ്രതിയുടെ ജാമ്യാപേക്ഷ തള്ളി. സ്ത്രീകള്‍ പ്രായപൂർത്തിയായവരാണെന്നതോ അവർ സമ്മതത്തോടെയാണ് പ്രവർത്തിച്ചതെന്നതോ പ്രേരിപ്പിച്ചെന്ന ആരോപണം ഇല്ലാതാക്കില്ലെന്ന് കോടതി വ്യക്തമാക്കി. പണത്തിനായി ഒരാളെ വേശ്യാവൃത്തിയിലേക്ക് പ്രേരിപ്പിക്കുന്നത് മനുഷ്യനെ വസ്തുവായി കാണുന്ന പ്രവൃത്തിയാണെന്നും കോടതി നിരീക്ഷിച്ചു. പ്രതിയെ വിട്ടയച്ചാല്‍ സ്ത്രീകള്‍ക്ക് സ്വതന്ത്രമായി മൊഴി നല്‍കാൻ കഴിയാതിരിക്കാമെന്നും നീതിപൂർവമായ വിചാരണയെ ബാധിക്കാമെന്നും കോടതി വിലയിരുത്തി.

ഗുരുതര വകുപ്പുകള്‍ പ്രകാരം കേസ്

മണാലി പൊലീസ് സ്റ്റേഷനില്‍ ഭാരതീയ ന്യായ സംഹിതയിലെ 143, 143(3) വകുപ്പുകളും അനാശാസ്യ വ്യാപാര നിരോധന നിയമത്തിലെ 4, 5 വകുപ്പുകളും പ്രകാരമാണ് കേസ് രജിസ്റ്റർ ചെയ്തിരിക്കുന്നത്. ഇതില്‍ 143(3) വകുപ്പ് ജീവപര്യന്തം തടവ് വരെ ലഭിക്കാവുന്ന കുറ്റമാണെന്നും കോടതി ചൂണ്ടിക്കാട്ടി. കേസിന്റെ ഗുരുതര സ്വഭാവവും നീതിപൂർവമായ വിചാരണ ഉറപ്പാക്കേണ്ടതിന്റെ ആവശ്യകതയും പരിഗണിച്ചാണ് ജാമ്യം നിഷേധിച്ചത്.