പി. മോള്‍ഡിങ് ഗ്രാമത്തിനടുത്ത് ഒക്ടോബർ 20ന് രാവിലെ എട്ടോടെയായിരുന്നു ആക്രമണം. മുളങ്കൂമ്പ് ശേഖരിക്കാൻ പോയ പാവോലെൻ ഖോങ്സായിയാണ് കൊല്ലപ്പെട്ടത്. ഒപ്പമുണ്ടായിരുന്ന ലാല്‍ഡെങ പരിക്കില്ലാതെ രക്ഷപ്പെട്ടു.

വനമേഖലയില്‍ ആക്രമണം

ആയുധധാരികളുടെ വെടിയേറ്റ ഖോങ്സായി സംഭവസ്ഥലത്തുതന്നെ മരിച്ചു. ലൈമഖോങ് പൊലീസ് കേസെടുത്തു.

ഇതിന് തലേദിവസം ഇംഫാല്‍ ഈസ്റ്റിലെ നോങ്സം കുന്നുകള്‍ക്കടുത്ത് മൂന്നുപേർ കൊല്ലപ്പെട്ടിരുന്നു. കുക്കി സായുധസംഘാംഗങ്ങളെന്ന് സംശയിക്കുന്നവരുടെ ആക്രമണത്തില്‍ മൂന്ന് മെയ്തെയ് വിഭാഗക്കാർക്കാണ് ജീവൻ നഷ്ടപ്പെട്ടത്. മൂന്നുപേർക്ക് പരിക്കേറ്റു.

മുൻദിവസത്തെ ആക്രമണത്തില്‍ മൂന്ന് അറസ്റ്റ്

തിങ്കളാഴ്ചത്തെ ആക്രമണവുമായി ബന്ധപ്പെട്ട് മൂന്നുപേരെ പൊലീസ് അറസ്റ്റ് ചെയ്തു. രണ്ടുപേർ ആക്രമണസംഘത്തിലുണ്ടായിരുന്നതായി പ്രാഥമിക ചോദ്യംചെയ്യലില്‍ സമ്മതിച്ചെന്ന് എഡിജിപി ലാരി ദോർജി ലാട്ടൂ അറിയിച്ചു.

മൂന്നാമന്റെ പങ്ക് പരിശോധിക്കുകയാണ്. മറ്റുള്ളവരെ കണ്ടെത്താനുള്ള ശ്രമവും തുടരുന്നു.

ആയുധങ്ങളും വെടിക്കോപ്പുകളും പിടിച്ചെടുത്തു

പ്രതികളുടെ മൊഴിയെത്തുടർന്ന് 12 തോക്കുകളും 1,095 വെടിയുണ്ടകളും മൂന്ന് നാടൻ സ്ഫോടകോപകരണങ്ങളും പിടിച്ചെടുത്തതായി പൊലീസ് അറിയിച്ചു. റോക്കറ്റ് ലോഞ്ചർ, സ്ഫോടകവസ്തുക്കള്‍, ഗ്രനേഡ്, റേഡിയോ സെറ്റുകള്‍, യൂണിഫോമുകള്‍ എന്നിവയും കണ്ടെത്തി.

വേറൊരു സംയുക്ത പരിശോധനയില്‍ സിനായ് ക്യാമ്പിനടുത്തുനിന്ന് 17 പേരെ തിരിച്ചറിയല്‍ പരിശോധനയ്ക്കായി കസ്റ്റഡിയിലെടുത്തു. ഉദ്യോഗസ്ഥർ ഹെലികോപ്റ്റർ നിരീക്ഷണവും നടത്തി.

സമാധാനശ്രമങ്ങള്‍ ചർച്ച ചെയ്ത് മുഖ്യമന്ത്രി

മുഖ്യമന്ത്രി യുംനാം ഖേംചന്ദ് സിങ് പ്രതിപക്ഷ നേതാക്കളുമായി ക്രമസമാധാനസ്ഥിതി ചർച്ച ചെയ്തു. മുൻ മുഖ്യമന്ത്രി ഒക്രം ഇബോബി സിങ്ങിന്റെ നേതൃത്വത്തിലുള്ള ഇന്ത്യ മുന്നണി പ്രതിനിധികള്‍ പങ്കെടുത്തു.

സമാധാനം നിലനിർത്താനും സാധാരണനില പുനഃസ്ഥാപിക്കാനുമുള്ള കൂട്ടായ ശ്രമങ്ങള്‍ ചർച്ച ചെയ്തതായി മുഖ്യമന്ത്രി അറിയിച്ചു. indianexpress.com