എട്ടാം ക്ലാസിലും ഒൻപതാം ക്ലാസിലും പഠിക്കുന്ന കുട്ടികള്‍ക്കാണ് മർദനമേറ്റത്. ഇന്ന് ഉച്ചയോടെയാണ് സംഭവം. ഹാഫ് മന്തി കഴിക്കാനെത്തിയ കുട്ടികള്‍ രണ്ടാമതും ചോറ് ആവശ്യപ്പെട്ടതോടെയാണ് ഹോട്ടല്‍ ജീവനക്കാരുമായി തർക്കമുണ്ടായത്.

അധികം ചോറ്, പിന്നാലെ തർക്കം

ഫുള്‍ മന്തി വാങ്ങുന്നവർക്ക് മാത്രമേ അധികം ചോറ് നല്‍കുകയുള്ളൂവെന്ന് ജീവനക്കാർ പറഞ്ഞതോടെയാണ് തർക്കം രൂക്ഷമായതെന്നാണ് വിവരം. പണം നല്‍കി അധികം ചോറ് വാങ്ങാമെന്ന് കുട്ടികള്‍ പറഞ്ഞിട്ടും നല്‍കിയില്ലെന്നാണ് കുട്ടികളുടെ പരാതി. തുടർന്ന് ഹോട്ടല്‍ ജീവനക്കാരും ഉടമയും ചേർന്ന് കുട്ടികളെ മർദിച്ചെന്നാണ് ബന്ധുക്കള്‍ പൊലീസിന് നല്‍കിയ പരാതിയില്‍ പറയുന്നത്.

കുട്ടികള്‍ക്ക് പരിക്ക്, ആശുപത്രിയില്‍ ചികിത്സ

മർദനമേറ്റ വിദ്യാർത്ഥികളെ ചികിത്സയ്ക്കായി തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. മർദനമേറ്റവരില്‍ മൂന്ന് പേർ സഹോദരങ്ങളാണെന്നാണ് റിപ്പോർട്ട്. സംഭവത്തിന് പിന്നാലെ കുട്ടികളുടെ ബന്ധുക്കള്‍ പേട്ട പൊലീസില്‍ പരാതി നല്‍കി.

കടയുടമയടക്കം മൂന്ന് പേർ കസ്റ്റഡിയില്‍

പരാതിയുടെ അടിസ്ഥാനത്തില്‍ ഹോട്ടല്‍ ഉടമയടക്കം മൂന്ന് പേരെ പേട്ട പൊലീസ് കസ്റ്റഡിയിലെടുത്തു. സംഭവത്തില്‍ വിശദമായ അന്വേഷണം ആരംഭിച്ചിട്ടുണ്ട്. അതേസമയം, ഫുള്‍ മന്തിക്ക് മാത്രമാണ് പരിധിയില്ലാതെ ചോറ് നല്‍കുന്നതെന്ന് ഹോട്ടല്‍ ജീവനക്കാർ പൊലീസിനോട് പറഞ്ഞതായി റിപ്പോർട്ടുണ്ട്. കുട്ടികളെ മർദിച്ചെന്ന ആരോപണം ഉള്‍പ്പെടെയുള്ള കാര്യങ്ങളില്‍ പൊലീസ് അന്വേഷണം പൂർത്തിയാക്കേണ്ടതുണ്ട്.