നേപ്പാളില്‍ 987 പേരും ടിബറ്റില്‍ 16 പേരുമാണ് മരിച്ചത്. നേപ്പാളില്‍ മാത്രം 3,916 പേരെ ഇനിയും കണ്ടെത്താനുണ്ട്. ദുരന്തത്തിന്റെ ഏഴാം ദിവസമായ ചൊവ്വാഴ്ചയും തിരച്ചിലും രക്ഷാപ്രവർത്തനവും തുടരുകയാണ്. ഹിമാലയത്തിലെ ഹിമാനി തകർന്നതാണ് പ്രളയത്തിന് കാരണമായത്. വീടുകളും റോഡുകളും പാലങ്ങളും ജലവൈദ്യുത പദ്ധതികളും തകർന്നു.

11,000ത്തിലധികം പേരെ രക്ഷപ്പെടുത്തി

പ്രളയബാധിത മേഖലകളില്‍ നിന്ന് ഇതുവരെ 11,000ത്തിലധികം പേരെ രക്ഷപ്പെടുത്തി. നേപ്പാള്‍ സൈന്യം ഉള്‍പ്പെടെ 22,000 സുരക്ഷാ ഉദ്യോഗസ്ഥരാണ് തിരച്ചിലിനും രക്ഷാപ്രവർത്തനത്തിനുമായി രംഗത്തുള്ളത്. 16 ഹെലികോപ്റ്ററുകളും വിന്യസിച്ചിട്ടുണ്ട്. 927 മൃതദേഹങ്ങള്‍ നടപടികള്‍ പൂർത്തിയാക്കി സൂക്ഷിച്ചിട്ടുണ്ട്. തിരിച്ചറിഞ്ഞ 51 മൃതദേഹങ്ങള്‍ ബന്ധുക്കള്‍ക്ക് കൈമാറി. 726 മൃതദേഹങ്ങള്‍ ഇനിയും തിരിച്ചറിഞ്ഞിട്ടില്ല.

കാണാതായവരില്‍ ഇന്ത്യക്കാരും

നേപ്പാളില്‍ കാണാതായവരില്‍ 30ലധികം രാജ്യങ്ങളില്‍ നിന്നുള്ള 583 വിദേശികളുമുണ്ട്. ഇതില്‍ 275 ഇന്ത്യൻ പൗരന്മാരും ഇന്ത്യൻ വംശജരായ 128 പേരുമുണ്ടെന്നാണ് ന്യൂഡല്‍ഹി നല്‍കുന്ന വിവരം. ചൈനയില്‍ 546 പേരെ കാണാതായിട്ടുണ്ട്. ഇതോടെ നേപ്പാളും ചൈനയും ചേർത്ത് കാണാതായവരുടെ എണ്ണം 4,462 ആയി. പ്രളയത്തില്‍ പരിക്കേറ്റ 279 പേരില്‍ 168 പേർ ചികിത്സയ്ക്ക് ശേഷം ആശുപത്രി വിട്ടു.

ജലവൈദ്യുത പദ്ധതികളിലും ആശങ്ക

റസുവ, നുവാകോട്ട് ജില്ലകളിലെ 12 ജലവൈദ്യുത പദ്ധതികളില്‍ ജോലി ചെയ്തിരുന്ന 900 തൊഴിലാളികളെക്കുറിച്ച്‌ വിവരമില്ല. ഇതില്‍ ഏകദേശം 500 പേർ തുരങ്കങ്ങളില്‍ കുടുങ്ങിയിരിക്കാമെന്നാണ് കരുതുന്നത്. ചെളി നിറഞ്ഞ മൂന്ന് തുരങ്കങ്ങളില്‍ നിന്ന് നാല് മൃതദേഹങ്ങള്‍ സൈന്യം കണ്ടെത്തി. ദുരന്തം നടന്നിട്ട് ഒരാഴ്ചയാകുന്നതിനാല്‍ ജീവനോടെ ആളുകളെ കണ്ടെത്താനുള്ള സാധ്യത കുറഞ്ഞുവരുന്നതായും ആശങ്കയുണ്ട്.

വീണ്ടും പ്രളയ മുന്നറിയിപ്പ്

ദുരന്തബാധിതരായ 2,970 പേർക്ക് താല്‍ക്കാലിക താമസസൗകര്യം ഒരുക്കിയിട്ടുണ്ട്. ഏകദേശം 65,000 പേർക്ക് അടിയന്തരമായി വെള്ളവും ശുചിത്വ സാമഗ്രികളും ആവശ്യമാണെന്ന് ഐക്യരാഷ്ട്രസഭ അറിയിച്ചു. ഇതിനിടെ കിഴക്കൻ, മധ്യ, പടിഞ്ഞാറൻ നേപ്പാളിലെ വിവിധ ജില്ലകളില്‍ വീണ്ടും പ്രളയസാധ്യതയുണ്ടെന്ന് അധികൃതർ മുന്നറിയിപ്പ് നല്‍കി. നുവാകോട്ട്, റസുവ ജില്ലകളില്‍ മിന്നല്‍പ്രളയത്തിന് ഉയർന്ന സാധ്യതയുണ്ടെന്നും ജനങ്ങള്‍ ജാഗ്രത പാലിക്കണമെന്നും നിർദേശിച്ചിട്ടുണ്ട്.