നേപ്പാള്‍-ചൈന അതിർത്തിക്ക് സമീപമുള്ള ഈ തടാകം പൊട്ടിയൊഴുകാൻ സാധ്യതയുണ്ടെന്ന് ചൈനീസ് അധികൃതർ നേപ്പാളിന് മുന്നറിയിപ്പ് നല്‍കി. ഇതോടെ ഭോട്ടെകോശിയുടെയും ത്രിശൂലി നദിയുടെയും താഴ്ന്ന പ്രദേശങ്ങളില്‍ താമസിക്കുന്നവർക്ക് ജാഗ്രതാ നിർദേശം നല്‍കി.

തടാകത്തില്‍ ഇതിനകം 20 ലക്ഷം ഘനമീറ്റർ വെള്ളം

ഓഗസ്റ്റ് 27 രാവിലെ വരെയുള്ള കണക്കനുസരിച്ച്‌ പുതിയ തടാകത്തില്‍ ഏകദേശം 20 ലക്ഷം ഘനമീറ്റർ വെള്ളം കെട്ടിക്കിടക്കുന്നുണ്ട്. അടുത്ത മൂന്ന് ദിവസത്തിനുള്ളില്‍ 30 ലക്ഷം ഘനമീറ്റർ വെള്ളം കൂടി തടാകത്തിലേക്ക് എത്താൻ സാധ്യതയുണ്ടെന്നാണ് ചൈനീസ് അധികൃതരുടെ മുന്നറിയിപ്പ്. അങ്ങനെ സംഭവിച്ചാല്‍ തടാകത്തിലെ വെള്ളത്തിന്റെ അളവ് വലിയ തോതില്‍ ഉയരും. തടസ്സം തകർന്ന് വെള്ളം ഒറ്റയടിക്ക് പുറത്തേക്ക് ഒഴുകുമോ എന്നതാണ് ഇപ്പോഴത്തെ പ്രധാന ആശങ്ക.

ടിബറ്റില്‍നിന്നെത്തുന്ന രണ്ട് നദികള്‍ ചേരുന്ന ഭാഗത്താണ് തടാകം

ഛോചെൻ ഖോല, പുരേപു സാങ്പോ നദികള്‍ ചേരുന്ന പ്രദേശത്തിന് സമീപമാണ് തടാകം രൂപപ്പെട്ടത്. രണ്ട് നദികളുടെയും ഉത്ഭവം ടിബറ്റിലാണ്. ഇവ നേപ്പാളിലേക്ക് ഒഴുകിയെത്തി ഭോട്ടെകോശി നദീവ്യൂഹത്തിന്റെ ഭാഗമാകുന്നു. അതിർത്തിക്ക് സമീപത്തെ നദീതടത്തില്‍ തടസ്സമുണ്ടായി തടാകം രൂപപ്പെട്ട വിവരം ചൈനീസ് അധികൃതരാണ് നേപ്പാളിനെ അറിയിച്ചത്. നേപ്പാളിലെ ജലശാസ്ത്ര-കാലാവസ്ഥാ വകുപ്പ് ഈ വിവരം വിദേശകാര്യ മന്ത്രാലയത്തിനും കൈമാറി.

ഭോട്ടെകോശിയും ത്രിശൂലിയും വീണ്ടും കരകവിയുമോ? നദീതീരത്തേക്ക് പോകരുതെന്ന് മുന്നറിയിപ്പ്

തടാകം പൊട്ടിയാല്‍ ഭോട്ടെകോശിയിലും പിന്നീട് ത്രിശൂലി നദിയിലും വീണ്ടും ശക്തമായ വെള്ളപ്പാച്ചിലുണ്ടാകാനുള്ള സാധ്യതയാണ് അധികൃതരെ ആശങ്കപ്പെടുത്തുന്നത്. ഈ സാഹചര്യത്തില്‍ നദീതീരങ്ങളില്‍ നിന്ന് മാറിനില്‍ക്കാനും സുരക്ഷിത സ്ഥലങ്ങളില്‍ തുടരാനും നേപ്പാളിലെ പ്രളയ മുന്നറിയിപ്പ് വിഭാഗം ജനങ്ങളോട് ആവശ്യപ്പെട്ടു. താഴ്ന്ന പ്രദേശങ്ങളിലെ ജനങ്ങള്‍ പ്രത്യേക മുൻകരുതല്‍ സ്വീകരിക്കണം. യാത്രക്കാരും സുരക്ഷാ ഉദ്യോഗസ്ഥരും തിരച്ചില്‍-രക്ഷാപ്രവർത്തന സംഘങ്ങളും അതീവ ജാഗ്രത പാലിക്കണമെന്നും നിർദേശിച്ചിട്ടുണ്ട്.

തടാകം നിരീക്ഷിച്ച്‌ ചൈന; പൊട്ടിയാല്‍ വെള്ളം എവിടെയെത്തുമെന്ന് പരിശോധന

തടാകത്തിലെ ജലനിരപ്പും സ്ഥിതിയും ചൈനീസ് അധികൃതർ തുടർച്ചയായി നിരീക്ഷിക്കുന്നുണ്ട്. തടാകം പൊട്ടിയാല്‍ വെള്ളം ഏതൊക്കെ മേഖലകളിലേക്ക് എത്താം, എത്രത്തോളം നാശമുണ്ടാകാം തുടങ്ങിയ കാര്യങ്ങള്‍ മനസ്സിലാക്കാൻ പ്രളയ മാതൃകാ പരിശോധനകളും അപകടസാധ്യതാ വിലയിരുത്തലും നടത്തുകയാണ്. അടിയന്തര സാഹചര്യമുണ്ടായാല്‍ സ്വീകരിക്കേണ്ട നടപടികളും ഇതിന്റെ അടിസ്ഥാനത്തില്‍ തയ്യാറാക്കുന്നുണ്ട്.

അതിർത്തി കടന്നെത്തുന്ന ഹിമാനി അപകടങ്ങളില്‍ ചൈനയുമായി ചർച്ച വേണമെന്ന് ആവശ്യം

നേപ്പാളിലെ ഭരണകക്ഷിയായ രാഷ്ട്രീയ സ്വതന്ത്ര പാർട്ടി പ്രസിഡന്റ് രവി ലാമിഛാനെ വിളിച്ചുചേർത്ത സർവകക്ഷി യോഗത്തിലും പുതിയ ഭീഷണി ചർച്ചയായി. അതിർത്തി കടന്നെത്തുന്ന ഹിമാനി സംബന്ധമായ അപകടങ്ങള്‍ നേരിടാൻ ചൈനയുമായി നയതന്ത്രതലത്തില്‍ ചർച്ച നടത്തണമെന്ന് നേതാക്കള്‍ ആവശ്യപ്പെട്ടു. ഇത്തരം അപകടങ്ങളെ നേരിടാൻ നേപ്പാളിന്റെ ദുരന്തനിവാരണ സംവിധാനം കൂടുതല്‍ ശക്തമാക്കണമെന്നും യോഗം ശുപാർശ ചെയ്തു.