സംസ്ഥാനത്ത് അപകടസാധ്യതയുള്ളതായി കണ്ടെത്തിയ 13 തടാകങ്ങളില്‍ നാലെണ്ണത്തിന്റെ പരിശോധന മാത്രമാണ് പൂർത്തിയായത്. ശേഷിക്കുന്ന ഒൻപത് തടാകങ്ങളും അവ പൊട്ടിയാല്‍ ബാധിക്കാവുന്ന പ്രദേശങ്ങളും സംയുക്ത വിദഗ്ധസംഘം പരിശോധിക്കും.

മുന്നറിയിപ്പ് സംവിധാനവും ബോധവത്കരണവും ഒരുക്കും

ജിയോളജിക്കല്‍ സർവേ ഓഫ് ഇന്ത്യ, വാഡിയ ഇൻസ്റ്റിറ്റ്യൂട്ട് ഓഫ് ഹിമാലയൻ ജിയോളജി എന്നിവയുള്‍പ്പെട്ട സംഘമാണ് സർവേ നടത്തുന്നത്. തടാകങ്ങള്‍ പൊട്ടിയാല്‍ താഴ്ന്ന പ്രദേശങ്ങളിലുള്ളവരെ മുൻകൂട്ടി അറിയിക്കാൻ മുന്നറിയിപ്പ് സംവിധാനം സ്ഥാപിക്കുമെന്ന് ദുരന്തനിവാരണ സെക്രട്ടറി വിനോദ് കുമാർ സുമൻ പറഞ്ഞു. അപകടസാധ്യത കൂടുതലുള്ള പ്രദേശങ്ങളില്‍ ബോധവത്കരണ പരിപാടികളും നടത്തും.

നാലുവർഷത്തിനിടെ പരിശോധിച്ചത് നാല് തടാകങ്ങള്‍ മാത്രം

ഉത്തരാഖണ്ഡിലെ ഉയർന്ന ഹിമാലയൻ മേഖലകളില്‍ 1,200ലധികം ഹിമാനിതടാകങ്ങളുണ്ട്. ആയിരം ചതുരശ്ര മീറ്ററിലധികം വിസ്തൃതിയുള്ള 426 തടാകങ്ങളില്‍ 13 എണ്ണം അപകടകരമാണെന്ന് 2022ല്‍ കണ്ടെത്തിയിരുന്നു. എന്നാല്‍ നാലുവർഷത്തിനിടെ നാലെണ്ണം മാത്രമാണ് പരിശോധിച്ചത്. ചില തടാകങ്ങള്‍ പഴയ സ്ഥാനത്തുനിന്ന് ഒരു കിലോമീറ്ററോളം മാറിയതായി ഉദ്യോഗസ്ഥൻ പറഞ്ഞു. ചൂടുയരുന്നത് അപകടസാധ്യത വർധിപ്പിക്കുകയാണ്. മുന്നറിയിപ്പ് സംവിധാനം വികസിപ്പിക്കാൻ കേന്ദ്രം 30 കോടി രൂപ അനുവദിച്ചിട്ടുണ്ട്.