കേന്ദ്ര ടെക്സ്റ്റൈല്‍ മന്ത്രി ഗിരിരാജ് സിങ് എഴുതിയ ലേഖനം സെപ്റ്റംബർ 19ന് സമൂഹമാധ്യമത്തിലൂടെ പങ്കുവച്ചുകൊണ്ടായിരുന്നു പ്രധാനമന്ത്രിയുടെ പ്രതികരണം. ഇന്ത്യയുടെ ജീവിതരീതിയില്‍ സുസ്ഥിരതയ്ക്ക് ഏറെക്കാലമായി പ്രധാന സ്ഥാനമുണ്ടെന്നും അത് ഇപ്പോള്‍ ടെക്സ്റ്റൈല്‍ മേഖലയുടെ ഭാവിയെയും രൂപപ്പെടുത്തുകയാണെന്നും മോദി പറഞ്ഞു.

മാലിന്യത്തെ വീണ്ടും വിഭവമാക്കാൻ ശ്രമം

ടെക്സ്റ്റൈല്‍ മാലിന്യം കുറയ്ക്കുകയും വീണ്ടും ഉപയോഗിക്കുകയും ചെയ്യുന്നതിനൊപ്പം ഉല്‍പാദനത്തില്‍ വെള്ളവും ഊർജവും ഉള്‍പ്പെടെയുള്ള വിഭവങ്ങളുടെ ഉപയോഗക്ഷമത വർധിപ്പിക്കാനാണ് കേന്ദ്രത്തിന്റെ വിവിധ പദ്ധതികള്‍ ലക്ഷ്യമിടുന്നത്. അപകടകരമായ രാസവസ്തുക്കളുടെ ഉപയോഗം കുറയ്ക്കാനും ശുദ്ധമായ ഉല്‍പാദനം പ്രോത്സാഹിപ്പിക്കാനും എട്ട് വ്യവസായ മേഖലകളിലും നാല് ഫാഷൻ സ്ഥാപനങ്ങളിലുമായി പ്രത്യേക പദ്ധതി നടപ്പാക്കുന്നുണ്ടെന്ന് കേന്ദ്ര സർക്കാർ വ്യക്തമാക്കിയിട്ടുണ്ട്.

പ്രതിവർഷം 70.73 ലക്ഷം ടണ്‍ ടെക്സ്റ്റൈല്‍ മാലിന്യം

കേന്ദ്ര ടെക്സ്റ്റൈല്‍ മന്ത്രാലയത്തിന്റെ പഠനമനുസരിച്ച്‌ ഇന്ത്യയില്‍ പ്രതിവർഷം 70.73 ലക്ഷം ടണ്‍ ടെക്സ്റ്റൈല്‍ മാലിന്യം ഉണ്ടാകുന്നു. ഉല്‍പാദനത്തിന് മുമ്പുള്ള ഘട്ടത്തില്‍ ഉണ്ടാകുന്ന മാലിന്യത്തിന്റെ 95 ശതമാനത്തിലധികം ഇതിനകം വീണ്ടെടുക്കുന്നുണ്ട്. നൂല്‍നിർമാണ മേഖലയില്‍ മാലിന്യത്തിന്റെ ഏകദേശം മുഴുവൻ ഭാഗവും വീണ്ടും ഉല്‍പാദനത്തിലേക്ക് കൊണ്ടുവരുന്ന സംവിധാനവും നിലവിലുണ്ടെന്ന് പഠനം പറയുന്നു.

2030ഓടെ വലിയ പുനരുപയോഗ വിപണി

ടെക്സ്റ്റൈല്‍ പുനരുപയോഗ വിപണി 2030ഓടെ ഏകദേശം 3.5 ബില്യണ്‍ ഡോളറിലെത്താമെന്നാണ് മന്ത്രാലയത്തിന്റെ വിലയിരുത്തല്‍. ഇതിലൂടെ ഏകദേശം ഒരു ലക്ഷം ഹരിത തൊഴിലവസരങ്ങളും സൃഷ്ടിക്കാനാകുമെന്നാണ് പ്രതീക്ഷ. മാലിന്യത്തെ സാമ്പത്തിക വിഭവമാക്കി മാറ്റുകയും പുതിയ പുനരുപയോഗ സാങ്കേതികവിദ്യകളെ പ്രോത്സാഹിപ്പിക്കുകയും ചെയ്യുന്നത് ഇന്ത്യയുടെ ആഗോള മത്സരശേഷി ഉയർത്തുമെന്നാണ് കേന്ദ്രത്തിന്റെ നിലപാട്.

സർക്കാർ വാങ്ങലിലും പുനരുപയോഗ ഉല്‍പന്നങ്ങള്‍

നവി മുംബൈയില്‍ ടെക്സ്റ്റൈല്‍ മാലിന്യ സംസ്കരണ കേന്ദ്രം വികസിപ്പിക്കാനും സർക്കാർ വാങ്ങലുകളില്‍ പുനരുപയോഗ ഉല്‍പന്നങ്ങള്‍ക്ക് കൂടുതല്‍ അവസരം നല്‍കാനും വിവിധ സ്ഥാപനങ്ങളുമായി ധാരണാപത്രങ്ങള്‍ ഒപ്പുവച്ചിട്ടുണ്ട്. 'സർക്കുലർ സംവാദ്', വ്യവസായ മേഖലകള്‍ തമ്മിലുള്ള അറിവ് കൈമാറ്റ സംവിധാനം, ഹരിത ഉല്‍പാദന പദ്ധതികള്‍ എന്നിവയും ഇതിന്റെ ഭാഗമാണ്. ഭാവിയില്‍ കൂടുതല്‍ കാര്യക്ഷമവും പരിസ്ഥിതി സൗഹൃദവുമായ ടെക്സ്റ്റൈല്‍ മൂല്യശൃംഖല സൃഷ്ടിക്കുകയാണ് ലക്ഷ്യം.