ഇന്ത്യൻ ക്രിക്കറ്റ് ടീമിന്റെ മുൻ നായകനും ക്ലാസിക് ബാറ്റ്സ്മാനുമായ അജിൻക്യ രഹാനെ ഇന്നലെയാണ് ക്രിക്കറ്റിന്റെ എല്ലാ ഫോർമാറ്റില്‍ നിന്നും വിരമിക്കല്‍ പ്രഖ്യാപിച്ചത്.
ഇന്ത്യക്ക് ഓസ്ട്രേലിയയില്‍ ഐതിഹാസിക ജയം നേടിക്കൊടുത്ത രഹാനെ ടീമിനെ നയിച്ച ടെസ്റ്റിലൊന്നും തോല്‍വി നേരിട്ടിട്ടില്ലെന്നതാണ് എടുത്തു പറയേണ്ടത്. ഇന്ത്യക്കായി വിദേശ മെെതാനങ്ങളില്‍ മികച്ച പ്രകടനം നടത്തിയ രഹാനെക്ക് ഒടുവില്‍ ആളും ആരവങ്ങളുമില്ലാതെ സാമൂഹ്യ മാധ്യമങ്ങളിലൂടെ വിരമിക്കല്‍ പ്രഖ്യാപിക്കേണ്ടി വന്നു.
ഇന്ത്യൻ ക്രിക്കറ്റ് ടീമില്‍ നിന്ന് മാന്യമായൊരു പടിയിറക്കം രഹാനെ അർഹിച്ചിരുന്നു. ആഭ്യന്തര ക്രിക്കറ്റില്‍ തരക്കേടില്ലാത്ത പ്രകടനം കാഴ്ചവെച്ച രഹാനെ ഇന്ത്യൻ ടെസ്റ്റ് ടീമിലേക്ക് തിരിച്ചെത്താൻ പല തവണ ശ്രമം നടത്തിയെങ്കിലും അതൊന്നും ഫലം കണ്ടില്ലെന്നതാണ് നിരാശപ്പെടുത്തുന്നത്. സെലക്ടർമാർ രഹാനെയെ പൂർണ്ണമായും അവഗണിച്ചു.
ഇതോടെ ഉത്തരത്തില്‍ സാമൂഹ്യ മാധ്യമങ്ങളില്‍ പോസ്റ്റിട്ട് തന്റെ വിരമിക്കല്‍ പ്രഖ്യാപിക്കാൻ രഹാനെ നിർബന്ധിതനായി. എന്നാല്‍ ഇന്ത്യൻ ക്രിക്കറ്റിന്റെ ചരിത്രത്തില്‍ ഇത്തരത്തില്‍ അവഗണനയേറ്റു വാങ്ങി വിരമിച്ച ആദ്യത്തെ താരമല്ല രഹാനെ. ഇതിന് മുമ്പും പല താരങ്ങള്‍ക്കും ഇത്തരത്തില്‍ വിരമിക്കല്‍ പ്രഖ്യാപിക്കേണ്ടി വന്നിട്ടുണ്ട്. ഇത് ആരൊക്കെയാണെന്ന് പരിശോധിക്കാം.
ഒന്നാമത്തെ താരം വീരേന്ദർ സെവാഗാണ്. ബാറ്റിങ് ലോകത്തെ വിനാശകാരിയെന്ന് പേരെടുത്ത വെടിക്കെട്ട് ഓപ്പണറായിരുന്നു സെവാഗ്. ടെസ്റ്റില്‍ രണ്ട് ട്രിപ്പിള്‍ സെഞ്ചുറിയും ഏകദിനത്തില്‍ ഇരട്ട സെഞ്ചുറിയും ഉള്‍പ്പെടെ ഐതിഹാസികമായ പല നേട്ടങ്ങളും സെവാഗിന്റെ കരിയറിലുണ്ട്. എന്നാല്‍ ഇന്ത്യ അർഹിച്ച വിരമിക്കല്‍ മത്സരം സെവാഗിന് നല്‍കിയില്ലെന്നത് ഇന്നും ആരാധകരുടെ മനസിലെ വേദനയാണ്.
ഇന്ത്യയുടെ ലോകകപ്പ് ഹീറോയാണ് യുവരാജ് സിങ്. 2007ലെ ടി20 ലോകകപ്പും 2011ലെ ഏകദിന ലോകകപ്പും ഇന്ത്യ അലമാരയിലെത്തിച്ചതിന് പിന്നില്‍ യുവരാജിന്റെ കഠിനാധ്വാനത്തിന്റെ കഥയുണ്ട്. അർബുദത്തെ പോലും മറികടന്നാണ് യുവരാജ് ഇന്ത്യയുടെ ലോകകപ്പ് കിരീടത്തിനായി പൊരുതിയത്. അർബുദത്തിന്റെ ചികിത്സക്കായി വിശ്രമം എടുക്കേണ്ടി വന്നെങ്കിലും പിന്നീട് തിരിച്ചുവരവ് നടത്തി.
എന്നാല്‍ അർഹിച്ച യാത്രയയപ്പ് യുവരാജിന് ലഭിച്ചില്ല. വിരമിക്കല്‍ മത്സരം നല്‍കാൻ ടീം മാനേജ്മെന്റ് തയ്യാറായില്ല. ഇതോടെ ഐപിഎല്ലില്‍ മുംബെെ ഇന്ത്യൻസിനായി കളിച്ചാണ് യുവരാജിന് തന്റെ കരിയർ അവസാനിപ്പിക്കേണ്ടി വന്നത്. യുവരാജിനോട് കാട്ടിയ നീതികേട് ഇന്നും ക്രിക്കറ്റ് ലോകത്തെ ചർച്ചാ വിഷയമാണ്.
Shreyas Iyer: ശ്രേയസ് അയ്യർ ഇന്ത്യക്ക് അനുയോജ്യനായ ടി20 നായകനല്ല, ദൗർബല്യങ്ങളേറെ; 10 മത്സരങ്ങള്‍ക്ക് ശേഷമുള്ള ക്യാപ്റ്റന്റെ റിപ്പോർട്ട് കാർഡിതാ
ഇന്ത്യയുടെ എക്കാലത്തേയും മികച്ച ഇടം കെെയൻ പേസർ ആരാണെന്ന ചോദ്യത്തിന് കൂടുതല്‍ പേരും സഹീർ ഖാൻ എന്ന ഉത്തരമാവും നല്‍കുക. യോർക്കറുകള്‍ക്കൊണ്ടും സ്വിങ്ങുകൊണ്ടും എതിരാളിയെ വിറപ്പിക്കുന്ന സഹീർ ഖാന് ഇന്ത്യ വിരമിക്കല്‍ മത്സരം നല്‍കിയിട്ടില്ലെന്നതാണ് എടുത്തു പറയേണ്ടത്.
ഇന്ത്യയുടെ ഇടം കെെയൻ ഓപ്പണർ ശിഖർ ധവാനും ഇന്ത്യ വിരമിക്കല്‍ മത്സരം നല്‍കിയില്ല. ഐസിസി ടൂർണമെന്റുകളില്‍ ശ്രദ്ധേയ പ്രകടനം നടത്താൻ ധവാന് സാധിച്ചിരുന്നു. എന്നാല്‍ അർഹിച്ച വിരമിക്കല്‍ മത്സരം ധവാന് ലഭിച്ചില്ല. ഇന്ത്യയുടെ സൂപ്പർ സ്പിന്നർമാരിലൊരാളായ ഹർഭജൻ സിങ്ങിനും വിരമിക്കല്‍ മത്സരം നല്‍കിയില്ലെന്നതും എടുത്തു പറയേണ്ടതാണ്.
ഇന്നത്തെ ഇന്ത്യൻ പരിശീലകനും മുൻ ഓപ്പണറുമായ ഗൗതം ഗംഭീറിനും വിരമിക്കല്‍ മത്സരം ലഭിച്ചിട്ടില്ല. മുൻ ഇന്ത്യൻ ക്യാപ്റ്റൻ സൗരവ് ഗാംഗുലിക്കടക്കം അവഗണനകളേറ്റുവാങ്ങിയാണ് വിരമിക്കല്‍ പ്രഖ്യാപിക്കേണ്ടി വന്നത്. മുൻ നായകനും ഇതിഹാസ താരവുമായ എംഎസ് ധോണിക്ക് വിരമിക്കല്‍ മത്സരം ലഭിച്ചില്ല. എന്നാല്‍ ധോണി ഇത്തരമൊരു മത്സരം വേണ്ടെന്ന് ആവശ്യപ്പെട്ടതിനാലാണ് അദ്ദേഹത്തിനായി പ്രത്യേക വിരമിക്കല്‍ മത്സരം നല്‍കാതിരുന്നത്.