ക്രിസ്റ്റ്യാനോ റൊണാള്‍ഡോയോടും ലയണല്‍ മെസിയോടും ചേർന്ന് നില്‍ക്കുന്ന പ്രകടനമികവുള്ള താരമാണെങ്കിലും നെയ്മറിന്റെ കരിയറിലെ ഭൂരിഭാഗം മത്സരങ്ങളും പരിക്കിനെത്തുടർന്ന് പുറത്തിരുന്ന് കാണേണ്ടി വന്നിരുന്നു.

കാലിലെ പേശിക്കേറ്റ പരിക്കാണ് നെയ്മർക്ക് ഇപ്പോള്‍ തിരിച്ചടിയായിരിക്കുന്നത്. ബ്രസീല്‍ ടീമിന്റെ ഡോക്ടറായ റോഡ്രിഗോ ലാസ്മർ നല്‍കിയ വിവരം അനുസരിച്ച്‌ പരിക്ക് കാരണം നെയ്മർക്ക് ആദ്യ മത്സരം നഷ്ടമാകും. കൂടുതല്‍ മത്സരങ്ങളില്‍ അദ്ദേഹത്തിന് വിശ്രമം വേണ്ടിവരുമോയെന്ന കാര്യം ഇപ്പോള്‍ പറയാനാവാത്ത അവസ്ഥയാണ്. അതുകൊണ്ടുതന്നെ ബ്രസീല്‍ ക്യാംപില്‍ ഇപ്പോള്‍ വലിയ ആശങ്കയാണുള്ളത്.

ഇടവേളക്ക് ശേഷം ഫുട്ബോള്‍ ലോകകപ്പിലൂടെ ശക്തമായ തിരിച്ചുവരവ് പ്രതീക്ഷിച്ച നെയ്മറിന് ഇപ്പോള്‍ വീണ്ടും പരിക്ക് വില്ലനായി മാറിയിരിക്കുകയാണ്.

കാർലോസ് ആഞ്ചലോട്ടി ബ്രസീല്‍ ടീമില്‍ നെയ്മറിനെ ഉള്‍പ്പെടുത്തിയപ്പോള്‍ ആരാധകർ വലിയ പ്രതീക്ഷയിലായിരുന്നു. നെയ്മറടക്കം വികാരഭരിതനായാണ് ആ പ്രഖ്യാപനം കേട്ടത്. ഇപ്പോള്‍ നെയ്മർക്ക് ലോകകപ്പിലെ ആദ്യ മത്സരം നഷ്ടമാകുമെന്ന് ഏറെക്കുറെ ഉറപ്പായതോടെ ടീമിന്റെ പദ്ധതികളില്‍ പൊളിച്ചെഴുത്തിന് ആഞ്ചലോട്ടി നിർബന്ധിതനാവും.

മൊറോക്കയ്ക്കെതിരായ മത്സരമാണ് നെയ്മർക്ക് നഷ്ടമാവുക. കൂടുതല്‍ മത്സരങ്ങളും അദ്ദേഹത്തിന് നഷ്ടമായാല്‍ അത് ബ്രസീലിന്റെ കിരീട പ്രതീക്ഷകളെ പ്രതികൂലമായി ബാധിക്കാൻ സാധ്യത കൂടുതലാണ്. ലോകകപ്പ് ആരംഭിക്കുന്നതിന് മുമ്പ് ബ്രസീല്‍ രണ്ട് സൗഹൃദ മത്സരങ്ങള്‍ കളിക്കുന്നുണ്ട്. പാനമക്കും ഈജിപ്തിനുമെതിരായ സൗഹൃദ മത്സരങ്ങളില്‍ നെയ്മർ ഉണ്ടാകില്ലെന്നുറപ്പാണ്.

34 വയസുകാരനായ നെയ്മറിന്റെ ഫിറ്റ്നസ് നേരത്തെ മുതല്‍ വലിയ ചോദ്യമായി ഉയർന്ന് നിന്നതാണ്. ആഞ്ചലോട്ടി നെയ്മറിനെ ഒഴിവാക്കി മുന്നോട്ട് പോകുമോയെന്ന ആശങ്കയും ആരാധകർക്കുണ്ടായിരുന്നു. എന്നാല്‍ ആഞ്ചലോട്ടി നെയ്മറിന്റെ മികവിനെ വിശ്വസിച്ചെങ്കിലും പരിക്ക് വീണ്ടും ഭീഷണി ഉയർത്തുകയാണ്.