ഇന്ത്യൻ പ്രീമിയർ ലീഗിന്റെ 2026 സീസണ് ആവേശകരമായി മുന്നോട്ട് പോകവെ വലിയ നാണക്കേടാണ് ചെന്നെെ സൂപ്പർ കിങ്സ് നേരിടുന്നത്.
ആദ്യ മൂന്ന് മത്സരത്തില് ഒരു പോയിന്റ് പോലും നേടാത്ത ഏക ടീമാണ് ചെന്നെെ സൂപ്പർ കിങ്സ് എന്നതാണ് ടീമിന് നാണക്കേടുണ്ടാക്കുന്നത്. ആറാം കിരീടമെന്ന വലിയ മോഹത്തോടെ എത്തിയ സിഎസ്കെയ്ക്ക് ആദ്യ മൂന്ന് മത്സരത്തിലും കാലിടറി.
11 മത്സരങ്ങള് മാത്രം ശേഷിക്കെ സിഎസ്കെയ്ക്ക് പ്ലേ ഓഫിലേക്കെത്തുക വളരെ ദുഷ്കരമായിരിക്കുകയാണ്. നാലാം മത്സരത്തിലൂടെയെങ്കിലും സിഎസ്കെയ്ക്ക് തിരിച്ചുവരവ് നടത്തേണ്ടതായുണ്ട്. ഇതിനായി ചില നിർണ്ണായക മാറ്റങ്ങള് ടീം വരുത്തിയേക്കുമെന്നാണ് സൂചനകള്. സിഎസ്കെയുടെ നിലവിലെ താരനിര ഉപയോഗിച്ച് ടീമിന് മുന്നോട്ട് പോവുക പ്രയാസമാണ്. എന്നാല് ടീമിന് മുന്നില് മറ്റ് വഴികളില്ലെന്നതാണ് വസ്തുത.
സിഎസ്കെയുടെ ഓപ്പണിങ് കൂട്ടുകെട്ടില് മാറ്റമുണ്ടായേക്കും. സഞ്ജു സാംസണും റുതുരാജ് ഗെയ്ക് വാദും ചേർന്ന് ഓപ്പണിങ്ങില് ഇറങ്ങുമ്പോള് പ്രതീക്ഷിച്ച പ്രകടനം നടത്താൻ സാധിക്കുന്നില്ല. രണ്ട് പേരും പെട്ടെന്ന് പുറത്താകുന്നത് ടീമിനെ പ്രതികൂലമായി ബാധിക്കുന്നുമുണ്ട്. ഈ സാഹചര്യത്തില് സിഎസ്കെ സഞ്ജുവിന്റെയോ റുതുരാജിന്റെയോ ബാറ്റിങ് പൊസിഷൻ മാറ്റിയേക്കും.
സഞ്ജുവിനെ ഓപ്പണിങ്ങില് നിലനിർത്തി റുതുരാജിനെ മൂന്നാം നമ്പറിലേക്ക് മാറ്റാനുള്ള സാധ്യതയാണ് കൂടുതല്. ഉർവില് പട്ടേല് സിഎസ്കെയ്ക്കായി മികച്ച പ്രകടനം നടത്തുന്നുണ്ടെന്നാണ് റിപ്പോർട്ട്. നെറ്റ്സില് വെടിക്കെട്ട് നടത്തുന്ന ഉർവില് മധ്യനിരയിലേക്ക് വരുന്നത് സിഎസ്കെയ്ക്ക് കരുത്താവും. കാർത്തിക് ശർമക്ക് സീറ്റ് നഷ്ടമാകാനാണ് സാധ്യത. അതേ സമയം പ്രശാന്ത് വീർ പ്ലേയിങ് 11ല് തുടരാനാണ് സാധ്യത കൂടുതല്.
ഡെവാള്ഡ് ബ്രെവിസ് നാലാം നമ്പറിലേക്ക് തിരിച്ചെത്താനുള്ള സാധ്യതകളുണ്ട്. താരം നെറ്റ്സ് പരിശീലനമടക്കം നടത്തി ഫോമിലേക്കെത്തിയെന്ന സൂചന നല്കുന്നുണ്ട്. ബ്രെവിസ് വരുന്നത് സിഎസ്കെയുടെ ആത്മവിശ്വാസം ഉയർത്തുമെന്ന കാര്യം ഉറപ്പാണ്. അതേ സമയം എംഎസ് ധോണി ടീമിനൊപ്പം ചേരാൻ ഇനിയും സമയം എടുത്തേക്കം. ധോണിയുടെ അഭാവം ടീമിന്റെ നേതൃത്വത്തെ കാര്യമായി ബാധിക്കുന്നുണ്ടെന്ന് നിസംശയം പറയാം.
ബൗളിങ് നിരയിലേക്ക് വരുമ്പോള് സിഎസ്കെയ്ക്ക് വലിയ തലവേദനകളാണ്. നിലവിലെ ബൗളർമാരെ ഫോമിലേക്കെത്തിക്കാനുള്ള നീക്കം നടത്തുകയെന്നതാണ് സിഎസ്കെയുടെ മുന്നിലെ വഴി. സിഎസ്കെ നൂർ അഹമ്മദിനെ ടീമില് നിന്ന് തഴഞ്ഞ് അക്കീല് ഹൊസീനെ കളിപ്പിക്കാനുള്ള സാധ്യതയാണുള്ളത്. സിഎസ്കെയുടെ സ്പിന്നർമാർ വേണ്ടത്ര മികവ് കാട്ടാത്തത് ടീമിനെ പ്രതികൂലമായിത്തന്നെ ബാധിക്കുന്ന കാര്യമാണ്.
IPL 2026: വെെഭവ് സൂര്യവംശി മുംബെെ ഇന്ത്യൻസിലേക്കോ? മുൻ സെലക്ടറുടെ എക്സ് പോസ്റ്റില് ഞെട്ടി ആരാധകർ; സംഭവം ഇങ്ങനെ
സിഎസ്കെ തലമുറ മാറ്റത്തിലേക്ക് കടന്നിരിക്കുന്നതിനാല് ടീം എന്ന നിലയില് ഒത്തിണക്കത്തിലേക്കെത്താൻ സമയം ആവശ്യമാണ്. നിലവിലെ സാഹചര്യത്തില് സിഎസ്കെയുടെ ലക്ഷ്യം അക്കൗണ്ട് തുറക്കുകയെന്നതാവും. എന്തായാലും സിഎസ്കെയുടെ ശക്തമായ തിരിച്ചുവരവ് ഇത്തവണ ഉണ്ടാകും എന്ന് തന്നെ കരുതാം.
ഇനിയുള്ള എല്ലാ മത്സരങ്ങളും ജയിച്ച് പ്ലേ ഓഫിലേക്കെത്താൻ സിഎസ്കെയ്ക്കാവുമോയെന്നതാണ് കണ്ടറിയേണ്ടത്. അങ്ങനെ സാധിക്കാത്ത പക്ഷം പരിശീലകൻ സ്റ്റീഫൻ ഫ്ളമിങ്ങിന്റെ സീറ്റ് തെറിക്കാനുള്ള സാധ്യതകള് കൂടുതലാണെന്ന് തന്നെ പറയാം.