രാജസ്ഥാൻ ബാറ്റിങ്ങിനിറങ്ങിയപ്പോള്‍ മിച്ചല്‍ സ്റ്റാർക്കും വെെഭവ് സൂര്യവംശിയും തമ്മിലുള്ള പോരാട്ടത്തിലേക്കാണ് എല്ലാവരും ഉറ്റുനോക്കിയത്. ഓസീസ് സൂപ്പർ പേസറെ വെെഭവ് തല്ലിപ്പറത്തുമോ അതോ സ്റ്റാർക്കിന് മുന്നില്‍ വെെഭവ് വീഴുമോയെന്നതായിരുന്നു എല്ലാവർക്കും അറിയേണ്ടിയിരുന്നത്.

എന്നാല്‍ സ്റ്റാർക്കിനെ നേരിടാനുള്ള അവസരം വെെഭവിന് ലഭിച്ചില്ല. അതിന് മുമ്പ് തന്നെ യുവതാരത്തിന് കൂടാരം കയറേണ്ടി വന്നു. രണ്ടാം ഓവർ എറിയാനെത്തിയ കെയ്ല്‍ ജാമിസനെതിരേ ആദ്യ പന്തില്‍ ബൗണ്ടറി നേടാൻ വെെഭവിന് സാധിച്ചെങ്കിലും രണ്ടാം പന്തില്‍ വിക്കറ്റ് നഷ്ടമാവുകയായിരുന്നു. ജാമിസന്റെ ഇൻസ്വിങ് യോർക്കറിന് മുന്നില്‍ യുവതാരത്തിന് പിഴച്ചപ്പോള്‍ സ്റ്റംപ് തെറിക്കുകയായിരുന്നു. ഇതോടെ രണ്ട് പന്തില്‍ നാല് റണ്‍സോടെ വെെഭവിന് മടങ്ങേണ്ടി വന്നു.

ജസ്പ്രീത് ബുംറയേയും ട്രന്റ് ബോള്‍ട്ടിനേയുമടക്കം പ്രധാനപ്പെട്ട പല ബൗളർമാരേയും തല്ലിപ്പറത്തിയ ബാറ്റ്സ്മാനാണ് വെെഭവ്.

എന്നാല്‍‌ ഇത്തവണ വെെഭവിന് പിഴച്ചു. യുവതാരത്തിന്റെ ദൗർബല്യം ഇതാണ് എന്നാണ് ഇപ്പോള്‍ ആരാധകർ ചൂണ്ടിക്കാട്ടുന്നത്. യോർക്കറുകളില്‍ മികവ് കാട്ടാൻ വെെഭവിന് ഇനിയും അനുഭവസമ്പത്ത് വേണ്ടിവരുമെന്നാണ് ആരാധക പ്രതികരണം.

വലിയ ഷോട്ടിനായി നേരത്തെ തന്നെ തയ്യാറെടുത്ത് നില്‍ക്കുന്ന വെെഭവിന് സ്റ്റംപിലേക്ക് സ്വിങ് ചെയ്തെത്തിയ അതിവേഗ പന്തില്‍ കണക്കുകൂട്ടല്‍ പിഴക്കുകയായിരുന്നു. മിച്ചല്‍ സ്റ്റാർക്കിനെ നേരിടേണ്ടി വന്നിരുന്നെങ്കിലും യോർക്കർ പരീക്ഷണം വെെഭവിന് നേരെ ഉണ്ടാകുമായിരുന്നു. എന്നാല്‍ ഇതിന് മുമ്പ് തന്നെ വെെഭവിന് വിക്കറ്റ് നഷ്ടമായി എന്നതാണ് എടുത്തു പറയേണ്ടത്.

വെെഭവിനെതിരേ ഇനി എതിർ ബൗളർമാർ ഉപയോഗിക്കാൻ പോകുന്നത് ഇതേ യോർക്കർ തന്ത്രമാവും. ഭുവനേശ്വർ കുമാറിന് മുന്നിലും വെെഭവിന് കാര്യമായ വെടിക്കെട്ട് നടത്താൻ സാധിച്ചിരുന്നില്ല. യോർക്കറുകളെ നേരിട്ട് വെെഭവ് കൂടുതല്‍ അനുഭവസമ്പത്ത് ആർജിക്കണമെന്ന ഉപദേശവും ഇപ്പോള്‍ ആരാധകർ നല്‍കുകയാണ്. തുടക്കത്തിലേ തന്നെ രണ്ട് ഓപ്പണർമാരേയും നഷ്ടമായത് രാജസ്ഥാനെ പ്രതികൂലമായി ബാധിച്ചുവെന്ന് തന്നെ പറയാം.