ആദ്യം ബാറ്റ് ചെയ്ത പഞ്ചാബ് 9 വിക്കറ്റിന് 163 റണ്‍സെടുത്തപ്പോള്‍ മറുപടിക്കിറങ്ങിയ ഗുജറാത്ത് ഒരു പന്ത് ബാക്കി നിർത്തി നാല് വിക്കറ്റിന്റെ വിജയം നേടിയെടുക്കുകയായിരുന്നു.

ഇരു ടീമിന്റേയും ബൗളർമാർ കരുത്തുകാട്ടിയ മത്സരത്തില്‍ വാഷിങ്ടണ്‍ സുന്ദറിന്റെ ബാറ്റിങ് കരുത്തിലാണ് ഗുജറാത്ത് ജയിച്ച്‌ കയറിയത്. 23 പന്തില്‍ 40 റണ്‍സെടുത്ത് പുറത്താവാതെ നിന്ന സുന്ദറിന്റെ പ്രകടനം മത്സരത്തില്‍ നിർണ്ണായകമായി മാറി. ജോസ് ബട്ലർ 22 പന്തില്‍ 26 റണ്‍സെടുത്തപ്പോള്‍ സായ് സുദർശൻ അർധ സെഞ്ചുറിയോടെ ടോപ് ഓഡറില്‍ കരുത്തുകാട്ടി.

41 പന്തില്‍ അഞ്ച് ഫോറും ഒരു സിക്സും ഉള്‍പ്പെടെ 57 റണ്‍സാണ് നേടിയത്. ശുഭ്മാൻ ഗില്‍ അഞ്ച് റണ്‍സെടുത്ത് പുറത്തായപ്പോള്‍ നിശാന്ത് സിദ്ധു 11 പന്തില്‍ 15 റണ്‍സാണ് നേടിയത്.

രാഹുല്‍ തെവാത്തിയയും (2) ജേസൻ ഹോള്‍‍ഡറും (5) നിരാശപ്പെടുത്തി. അർഷാദ് ഖാൻ അഞ്ച് പന്ത് നേരിട്ട് എട്ട് റണ്‍സ് നേടിയത് ഗുജറാത്തിന് നിർണ്ണായകമായി.

പ്ലേ ഓഫിലേക്കുള്ള പോരാട്ടം കടുക്കവെ പഞ്ചാബിന് ആശങ്കയാവുന്ന തോല്‍വിയാണിത്. ഇപ്പോഴും പോയിന്റ് പട്ടികയില്‍ പഞ്ചാബ് തലപ്പത്താണുള്ളത്. ഒമ്പത് മത്സരങ്ങളില്‍‌ നിന്ന് 13 പോയിന്റാണ് പഞ്ചാബിനുള്ളത്. ഏഴ് മത്സരങ്ങളില്‍ പഞ്ചാബ് തോല്‍വി അറിഞ്ഞിരുന്നില്ല. ആറ് മത്സരങ്ങള്‍ ജയിച്ചപ്പോള്‍ ഒരു മത്സരത്തിന് ഫലം ഇല്ലാതെ പോയി. അവസാന രണ്ട് മത്സരങ്ങള്‍ പഞ്ചാബ് തോറ്റത് ടീമിന്റെ ദൗർബല്യം തുറന്ന് കാട്ടുന്നതാണ്.

പഞ്ചാബിന്റെ ബാറ്റിങ് ദൗർബല്യം തുറന്ന് കാട്ടുന്നതാണ് ഗുജറാത്തിനെതിരായ തോല്‍വി. പഞ്ചാബിന്റെ ഓപ്പണർമാർ നിരാശപ്പെടുത്തിയാല്‍ പഞ്ചാബ് പതറുമെന്നാണ് കണക്കുകള്‍ വ്യക്തമാക്കുന്നത്. പ്രിയൻഷ് ആര്യ, പ്രഭ്സിംറാൻ സിങ് എന്നിവർ മികച്ച തുടക്കം നല്‍കിയാല്‍ പഞ്ചാബിന്റെ മറ്റ് ബാറ്റ്സ്മാൻമാർക്ക് അത് ആത്മവിശ്വാസം നല്‍കുകയും വലിയ സ്കോറിലേക്കുയരാൻ ടീമിന് സാധിക്കുകയും ചെയ്യുന്നുണ്ട്.