സീസണിലെ ആദ്യ നേർക്കുനേർ പോരാട്ടത്തില്‍ 103 റണ്‍സിന്റെ തോല്‍വി നേരിട്ട മുംബെെ പകരം വീട്ടാനുറച്ചാണ് സിഎസ്കെയുടെ തട്ടകത്തില്‍ ഇറങ്ങിയതെങ്കിലും ബാറ്റിങ് നിര നിലവാരം കാട്ടാതെ നിരാശപ്പെടുത്തി. ഇന്ന് തോറ്റാല്‍ മുംബെെ പ്ലേ ഓഫ് കാണാതെ പുറത്താവും.

അതിന്റെ സമ്മർദ്ദത്തോടെയാണോ മുംബെെ താരങ്ങള്‍ ബാറ്റ് ചെയ്തതെന്ന് സംശയിക്കേണ്ടിയിരിക്കുന്നു. മുന്നില്‍ നിന്ന് നയിക്കേണ്ട ക്യാപ്റ്റൻ ഹാർദിക് പാണ്ഡ്യക്ക് 23 പന്തില്‍ 18 റണ്‍സാണ് നേടാനായത്. രണ്ട് ബൗണ്ടറി മാത്രമാണ് ഹാർദിക് നേടിയത്. 78.26 മാത്രമായിരുന്നു സൂപ്പർ ഫിനിഷറുടെ സ്ട്രെെക്ക് റേറ്റ്. മുംബെെയെ 175 റണ്‍സിലേക്കെങ്കിലും ഹാർദിക് എത്തിക്കുമെന്ന് ആരാധകർ പ്രതീക്ഷിച്ചിരുന്നു.

പക്ഷെ ഹാർദിക്കിന് മികച്ചൊരു ഷോട്ട് പോലും കളിക്കാൻ സാധിച്ചില്ല. അദ്ദേഹത്തിന്റെ ശരീര ഭാഷയില്‍ത്തന്നെ സമ്മർദ്ദം വ്യക്തമായിരുന്നു.

മുംബെെയുടെ തുടർ തോല്‍വികളില്‍ ടീം മാനേജ്മെന്റിന് എതിർപ്പുണ്ടെന്ന് ഇതിനോടകം വ്യക്തമാണ്. ക്യാപ്റ്റനെന്ന നിലയില്‍ സ്വാഭാവികമായും ഹാർദിക്കിനോടാവും ചോദ്യം ഉയരുക. ഇതിന്റെ സമ്മർദ്ദം ഹാർദിക്കിന്റെ ബാറ്റിങ്ങില്‍ കാണാനായിരുന്നു.

ടോപ് ഓഡർ പ്രതീക്ഷിച്ച പ്രകടനം നടത്താതിരുന്നതോടെ ഹാർദിക്കിനേയും അത് പ്രതികൂലമായി ബാധിച്ചു, മുംബെെയുടെ നായകസ്ഥാനത്ത് നിന്ന് ഹാർദിക് പാണ്ഡ്യയെ മാറ്റിയേക്കുമെന്ന റിപ്പോർട്ടുകള്‍ ഇതിനോടകം പുറത്ത് വന്നതാണ്. ഇത് സംബന്ധിച്ച ചർച്ച നടന്നിട്ടുണ്ടോയെന്ന കാര്യവും സംശയിക്കേണ്ടിയിരിക്കുന്നു. ഇത് വ്യക്തമാക്കുന്നതായിരുന്നു ഹാർദിക്കിന്റെ സമ്മർദ്ദം.

ഈ സീസണില്‍ പ്രതീക്ഷിച്ച പ്രകടനം നടത്താൻ ഹാർദിക്കിന് സാധിച്ചിട്ടില്ല. ക്യാപ്റ്റനെന്നതിലുപരിയായി വെടിക്കെട്ട് ഫിനിഷറെന്ന നിലയില്‍ ഹാർദിക്കിന്റെ ബാറ്റിങ് മുംബെെക്ക് വളരെ പ്രധാനപ്പെട്ടതാണ്. എന്നാല്‍ എട്ട് മത്സരത്തില്‍ നിന്ന് 146 റണ്‍സ് മാത്രമാണ് ഹാർദിക് നേടിയിരിക്കുന്നത്.