ഡബ്ലിന്: വീടുകളുടെ വില കുറഞ്ഞശേഷം വാങ്ങാമെന്ന പ്രതീക്ഷയോടെയുള്ള കാത്തിരിപ്പിന് പകരം, കഴിയുന്നത്ര വേഗം വായ്പ ഉറപ്പാക്കി സ്വന്തം വീടെന്ന സ്വപ്നത്തിലേക്ക് കടക്കുകയാണ് അയര്ലണ്ടിലെ കൂടുതല് കുടുംബങ്ങള്.
ജൂലൈയില് ഭവനവായ്പാ അംഗീകാരങ്ങള് കുത്തനെ ഉയര്ന്ന് കണക്കെടുപ്പ് ആരംഭിച്ച ശേഷമുള്ള ഏറ്റവും ശക്തമായ മാസങ്ങളിലൊന്നായി മാറിയതോടെയാണ് ഭവന വിപണിയിലെ പുതിയ പ്രവണത ശ്രദ്ധ നേടുന്നത്.
ജൂലൈയില് ആകെ 6,253 ഭവനവായ്പകള്ക്ക് അംഗീകാരം ലഭിച്ചു. ഇതില് 3,575 എണ്ണം, അഥവാ 57.2 ശതമാനം, ആദ്യമായി വീട് വാങ്ങുന്നവര്ക്കുള്ളതാണ്. കഴിഞ്ഞ വര്ഷം ജൂലൈയുമായി താരതമ്യം ചെയ്യുമ്പോള് മൊത്തം അംഗീകാരങ്ങളുടെ എണ്ണം 14.4 ശതമാനം വര്ധിച്ചു. വായ്പകളുടെ മൊത്തം മൂല്യം ആദ്യമായി ഒരു മാസത്തില് 2.037 ബില്യണ് യൂറോ കടന്നു.
ആദ്യവീട് വാങ്ങുന്നവര്ക്ക് മാത്രം അംഗീകരിച്ച വായ്പയുടെ മൂല്യം 1.18 ബില്യണ് യൂറോയാണ്. നിലവിലുള്ള വീട് വിറ്റ് മറ്റൊരു വീട് വാങ്ങുന്നവര്ക്കായി 1,255 വായ്പകളും അനുവദിച്ചു. ഇതോടെ ഭവനവായ്പാ വിപണിയിലെ വളര്ച്ചയ്ക്ക് ഇപ്പോഴും പ്രധാന കരുത്ത് യുവാക്കളും ആദ്യവീട് വാങ്ങുന്ന കുടുംബങ്ങളുമാണെന്ന് ബാങ്കിംഗ് ആന്ഡ് പേയ്മെന്റ്സ് ഫെഡറേഷന് അയര്ലണ്ട് വ്യക്തമാക്കുന്നു.
വീടുവില താഴുമെന്ന പ്രതീക്ഷയാണോ കാരണം?
ഇപ്പോഴത്തെ കണക്കുകള് അത്തരമൊരു നിഗമനത്തെ പിന്തുണയ്ക്കുന്നില്ല എന്നതാണ് യാഥാര്ഥ്യം.
വീടുകളുടെ വില വര്ധിക്കുന്ന വേഗം കുറയുന്നുണ്ടെങ്കിലും വില താഴുന്നില്ല. ജൂണ് വരെയുള്ള ഒരു വര്ഷത്തില് അയര്ലണ്ടിലെ വീടുകളുടെ വില വീണ്ടും 5.6 ശതമാനം ഉയര്ന്നു. ഡബ്ലിനില് 4.6 ശതമാനവും ഡബ്ലിന് പുറത്തുള്ള പ്രദേശങ്ങളില് 6.4 ശതമാനവുമായിരുന്നു വര്ധന. രാജ്യത്തെ ഒരു വീടിന്റെ മധ്യവില ഇതിനകം 396,000 യൂറോയിലെത്തി.
അതിനാല് 'ഇനി കുറച്ചുകാലം കാത്തിരുന്നാല് വീട് വിലകുറഞ്ഞ് കിട്ടും' എന്ന പ്രതീക്ഷയിലാണ് കൂടുതല് പേര് വായ്പാ അംഗീകാരം തേടുന്നതെന്ന് പറയാന് തെളിവില്ല. മറിച്ച് വില ഇനിയും ഉയര്ന്നാല് വാങ്ങാനുള്ള ശേഷി നഷ്ടപ്പെടുമോ എന്ന ആശങ്കയാണ് ചില കുടുംബങ്ങളെ നേരത്തേ വിപണിയിലെത്തിക്കുന്നത്.
വീടുകളുടെ വിലവര്ധന 2024 ഓഗസ്റ്റിലെ 10.1 ശതമാനത്തില് നിന്ന് ഇപ്പോള് 5.6 ശതമാനത്തിലേക്ക് കുറഞ്ഞിട്ടുണ്ട്. അതായത് വിലയുടെ വര്ധനവേഗമാണ് കുറഞ്ഞത്; വീടിന്റെ വിലയല്ല.
'ഇന്ന് വാങ്ങിയില്ലെങ്കില് നാളെ കഴിയില്ലേ?'
ആദ്യവീട് വാങ്ങുന്നവരുടെ മനോഭാവത്തെ സ്വാധീനിക്കുന്ന ഏറ്റവും വലിയ ഘടകങ്ങളിലൊന്ന് ഇതാണ്.
വീടുകളുടെ ആവശ്യത്തിന് അനുസരിച്ച് പുതിയ വീടുകളുടെ വിതരണം ഇപ്പോഴും ഉയര്ന്നിട്ടില്ല. 2026ല് ഏകദേശം 38,500 മുതല് 40,000 വരെ വീടുകള് പൂര്ത്തിയാകുമെന്നാണ് വിവിധ സാമ്പത്തിക സ്ഥാപനങ്ങളുടെ പ്രതീക്ഷ. എന്നാല് അടുത്ത ഏതാനും വര്ഷങ്ങളിലും ആവശ്യത്തിന് താഴെയായിരിക്കും വിതരണം എന്നാണ് സാമ്പത്തിക സാമൂഹിക ഗവേഷണ സ്ഥാപനം വിലയിരുത്തുന്നത്. അതിനാല് രാജ്യത്തിന്റെ ഭവനക്ഷാമം ഉടനെ അവസാനിക്കില്ല.
ഇതോടെ വാങ്ങുന്നവരുടെ കണക്കുകൂട്ടല് ലളിതമാണ്. ഇന്ന് 400,000 യൂറോ വിലയുള്ള വീട് അടുത്ത വര്ഷം വിലകുറയുമെന്ന ഉറപ്പില്ല. മറിച്ച് അഞ്ചു ശതമാനം കൂടി ഉയര്ന്നാല് 420,000 യൂറോ നല്കേണ്ടിവരും. അതോടൊപ്പം ആവശ്യമായ നിക്ഷേപത്തുകയും വരുമാനവും കൂടണം.
അതുകൊണ്ടാണ് വീടുവിലയുടെ 'വലിയ ഇടിവ്' കാത്തിരിക്കാതെ സാമ്പത്തികമായി കഴിയുന്നവര് വായ്പാ അംഗീകാരം നേടിയെടുക്കാന് ശ്രമിക്കുന്നത്.
വാടക കൊടുക്കുന്നതിനെക്കാള് സ്വന്തം വീട്…
മറ്റൊരു പ്രധാന കാരണം വാടകയാണ്.
പുതിയ വാടക കരാറുകളിലെ ദേശീയ ശരാശരി പ്രതിമാസ വാടക ഏറ്റവും ഒടുവില് ലഭ്യമായ കണക്കുപ്രകാരം 1,755 യൂറോയാണ്. നിലവിലുള്ള വാടക കരാറുകളുടെ ശരാശരി 1,503 യൂറോയുമാണ്. പുതിയ വാടകകള് ഒരു വര്ഷത്തിനിടെ അഞ്ചു ശതമാനം വര്ധിക്കുകയും ചെയ്തു.
ഡബ്ലിനിലും സമീപ കൗണ്ടികളിലും രണ്ട് കിടപ്പുമുറിയുള്ള വീടുകളുടെ യഥാര്ത്ഥ വിപണി വാടക ഇതിലും വളരെ കൂടുതലാകാം.
അതുകൊണ്ട് മാസം 2,000 മുതല് 2,500 യൂറോ വരെ വാടക കൊടുക്കുന്ന സ്ഥിരജോലിയുള്ള ദമ്പതികള്ക്കിടയില്, 'ഇത്രയും പണം മറ്റൊരാളുടെ വീടിന്റെ വാടകയായി നല്കുന്നതിനെക്കാള് സ്വന്തം മോര്ട്ട്ഗേജിലേയ്ക്ക് നല്കാം' എന്ന ചിന്ത ശക്തമാകുന്നത് സ്വാഭാവികമാണ്.
പലിശ കുറയുമെന്ന പ്രതീക്ഷയും ഉണ്ടായിരുന്നോ?
കഴിഞ്ഞ വര്ഷത്തെ അപേക്ഷിച്ച് ഭവനവായ്പയുടെ പലിശയില് ചെറിയ ഇളവ് ഉണ്ടായിട്ടുണ്ട്. ജൂണില് പുതിയ ഭവനവായ്പകളുടെ ശരാശരി പലിശ 3.49 ശതമാനമായിരുന്നു; ഒരു വര്ഷം മുമ്പത്തേക്കാള് 0.11 ശതമാന പോയിന്റ് കുറവ്. പുതിയ വായ്പകളില് 93 ശതമാനവും നിശ്ചിത പലിശ നിരക്കിലുള്ളവയായിരുന്നു.
എന്നാല് ഇവിടെ മറ്റൊരു മുന്നറിയിപ്പുമുണ്ട്. യൂറോപ്യന് സെന്ട്രല് ബാങ്ക് 2026 ജൂണില് വീണ്ടും പലിശ ഉയര്ത്തിയതിനാല് ഇനി തുടര്ച്ചയായി പലിശ കുറയുമെന്ന ഉറപ്പ് നിലവിലില്ല. അതുകൊണ്ട് വീടുവാങ്ങുന്നവര് 'പലിശ നിരക്ക് വലിയ തോതില് താഴും' എന്ന പ്രതീക്ഷയില് മാത്രം വിപണിയിലെത്തുകയാണെന്ന് പറയുന്നതും ശരിയാകില്ല.
മറിച്ച് ലഭ്യമായ നല്ല നിരക്ക് ഉറപ്പിക്കാനും സ്വന്തം വായ്പാശേഷി എത്രയെന്ന് മുന്കൂട്ടി അറിയാനും ആളുകള് ബാങ്കുകളുടെ അംഗീകാരം നേടുകയാണ്.
പഴയ വായ്പ മാറ്റുന്നവരിലും വന് കുതിപ്പ്
ജൂലൈയിലെ മറ്റൊരു കൗതുകകരമായ കണക്കാണ് പഴയ ഭവനവായ്പ മറ്റൊരു ബാങ്കിലേയ്ക്ക് മാറ്റുകയോ പുനര്വായ്പയെടുക്കുകയോ ചെയ്യുന്നവരില് ഉണ്ടായ 71.6 ശതമാനം വര്ധന.
ഇവരുടെ വായ്പാ മൂല്യം ഒരു വര്ഷത്തിനിടെ 81.1 ശതമാനമാണ് വര്ധിച്ചത്.
ഇത് വീടുവാങ്ങുന്നവരുടെ എണ്ണം കൂടുന്നതിനേക്കാള് മറ്റൊരു കഥ പറയുന്നു. വര്ഷങ്ങള്ക്ക് മുമ്പ് എടുത്ത ഉയര്ന്ന പലിശയുള്ള വായ്പകള് കുറഞ്ഞ നിരക്കിലേയ്ക്ക് മാറ്റാനും നിലവിലുള്ള നിശ്ചിത പലിശ കാലാവധി അവസാനിക്കുന്നതിന് മുമ്പ് പുതിയ കരാര് നേടാനും കൂടുതല് വീട്ടുടമകള് ശ്രമിക്കുന്നു.
അതിനാല് ജൂലൈയിലെ 6,253 അംഗീകാരങ്ങളെയും 'പുതുതായി 6,253 പേര് വീട് വാങ്ങുന്നു' എന്ന് വായിക്കരുത്.വായ്പ നല്കിയ പ്രൊവൈഡറെ മാറ്റിപിടിച്ചവരുടെ എണ്ണം കൂടി കൂട്ടിയാണ് ഈ കണക്ക് .
സര്ക്കാര് സഹായങ്ങളും വിപണിയിലേക്ക് ആളുകളെ എത്തിക്കുന്ന.
ആദ്യവീട് വാങ്ങുന്നവരുടെ വര്ധനയ്ക്ക് സര്ക്കാര് പദ്ധതികളും ഒരു കാരണമാണ്.
പുതിയ വീട് വാങ്ങുന്ന യോഗ്യരായ ആദ്യവീട് വാങ്ങുന്നവര്ക്ക് 'ഹെല്പ് ടു ബൈ' പദ്ധതിയിലൂടെ പരമാവധി 30,000 യൂറോ വരെ സഹായം ലഭിക്കാം. ഈ ഉയര്ന്ന പരിധി 2029 അവസാനം വരെ തുടരുന്ന രീതിയിലാണ് നിലവിലെ സംവിധാനം.
ഇതോടൊപ്പം ആദ്യവീട് പദ്ധതിയിലൂടെ ആവശ്യമായ വായ്പയും വീടിന്റെ വിലയും തമ്മിലുള്ള ചില വിടവുകള് നികത്താനുള്ള അവസരവും ലഭിക്കുന്നു.
ഇത്തരം പദ്ധതികള് കാരണം പ്രത്യേകിച്ച് പുതിയ വീടുകളിലേക്കുള്ള ആദ്യവീട് വാങ്ങുന്നവരുടെ പ്രവേശനം വര്ധിക്കുന്നതിന്റെ സൂചനകളും കാണാം.
2026 രണ്ടാം പാദത്തില് വീട് വാങ്ങുന്നതിനായി എടുത്ത ഭവനവായ്പകളില് 38.6 ശതമാനവും പുതിയ വീടുകള്ക്കും സ്വയം നിര്മ്മിക്കുന്ന വീടുകള്ക്കുമായിരുന്നു. പുതിയ വീടുകള്ക്കുള്ള ആദ്യവീട് വായ്പകളുടെ എണ്ണം ഒരു വര്ഷത്തിനിടെ 13.4 ശതമാനം ഉയര്ന്നു.
ഒറ്റ ശമ്പളം മതിയാകാത്ത വിപണി
വീടുവാങ്ങല് ഇപ്പോള് കൂടുതലായി രണ്ട് വരുമാനമുള്ള കുടുംബങ്ങളുടെ 'കളിയായി' മാറുന്നതിന്റെ തെളിവുകളും വ്യക്തമാണ്.
2024ല് വീട് വാങ്ങിയവരുടെ മധ്യവരുമാനം 84,400 യൂറോയായിരുന്നു. രണ്ട് പേര് ചേര്ന്ന് വീട് വാങ്ങിയവരുടെ മധ്യവരുമാനം 101,200 യൂറോയും. വാങ്ങിയ വീടുകളില് 60 ശതമാനത്തിലേറെയും രണ്ട് പേര് ചേര്ന്നാണ് സ്വന്തമാക്കിയത്. ഇതില് ഭാര്യയുടെയും,ഭര്ത്താവിന്റെയും ഇന്കം ഉള്പ്പെടുന്നുണ്ട്.
2019ല് വീടിന്റെ മധ്യവില വാങ്ങുന്നവരുടെ മധ്യവരുമാനത്തിന്റെ 3.85 മടങ്ങായിരുന്നെങ്കില് 2024ല് അത് 4.2 മടങ്ങായി. 35 വയസ്സില് താഴെയുള്ളവര് വാങ്ങിയ വീടുകളുടെ വില അവരുടെ വരുമാനത്തിന്റെ ശരാശരി അഞ്ചിരട്ടിയായിരുന്നു.
ഇതോടെ ഒറ്റ വരുമാനമുള്ള കുടുംബങ്ങള്ക്ക് വിപണിയില് നിലനില്ക്കുന്നത് കൂടുതല് പ്രയാസകരമാകുമ്പോള് രണ്ട് സ്ഥിരവരുമാനമുള്ള ദമ്പതികള്ക്ക് മോര്ട്ട്ഗേജ് നേടാനുള്ള സാധ്യത താരതമ്യേന ഉയരുകയാണ്.
ഇന്ത്യക്കാരടക്കമുള്ള കുടിയേറ്റക്കാരും വീടുവാങ്ങുന്നുണ്ടോ?
അയര്ലണ്ടിലെ ഏഷ്യന് പ്രൊഫഷണല് സമൂഹത്തിന്റെ വീടുടമസ്ഥതയിലേക്കുള്ള മാറ്റത്തിന്റെ വ്യക്തമായ സൂചകങ്ങളുണ്ടെങ്കിലും അവ ഇന്ത്യക്കാരെ മാത്രം പ്രീതിനിധീകരിക്കുന്നതല്ല.
2022ലെ സെന്സസില് പോളണ്ട്, ബ്രിട്ടന് എന്നിവയ്ക്ക് പിന്നാലെ ഏറ്റവും വലിയ വിദേശ പൗരത്വ വിഭാഗങ്ങളിലൊന്നായിരുന്നു ഇന്ത്യന് സമൂഹം. അന്നത്തെ സെന്സസിന് മുമ്പുള്ള ഒരു വര്ഷത്തില് അയര്ലണ്ടിലേക്ക് പുതുതായി എത്തിയ വിദേശ പൗരന്മാരില് ഏറ്റവും വലിയ ഒറ്റ ദേശീയ വിഭാഗവും ഇന്ത്യക്കാരായിരുന്നു.
ഇതിനിടെ അയര്ലണ്ടിലെ വിദേശ പൗരന്മാരുടെ മൊത്തം എണ്ണം തുടര്ന്നും ഉയരുകയാണ്. 2026 ഏപ്രിലില് രാജ്യത്ത് 9,31,000 വിദേശ പൗരന്മാര് ഉണ്ടായിരുന്നുവെന്നാണ് പുതിയ സി.എസ്.ഒ കണക്ക്. മൊത്തം ജനസംഖ്യയുടെ 16.8 ശതമാനമാണിത്.
ആരോഗ്യം, വിവരസാങ്കേതികവിദ്യ, ധനകാര്യ മേഖല, ഔഷധനിര്മാണം, എന്ജിനീയറിങ് തുടങ്ങിയ സ്ഥിരം ജോലികളിലുള്ള ഇന്ത്യക്കാരില് പലരും വര്ഷങ്ങളായി അയര്ലണ്ടില് താമസിച്ച് സ്ഥിരതാമസ അനുമതിയോ പൗരത്വമോ നേടിയെത്തുന്ന ഘട്ടത്തിലാണ്.
ആദ്യ വര്ഷങ്ങളില് വാടകവീടുകളില് താമസിച്ചിരുന്ന കുടുംബങ്ങള് കുട്ടികളുടെ വിദ്യാഭ്യാസം, തൊഴില് സ്ഥിരത, ദീര്ഘകാല താമസ തീരുമാനം എന്നിവ ഉറപ്പാകുന്നതോടെ സ്വന്തം വീട് വാങ്ങുന്നതിലേയ്ക്ക് മാറുന്നത് സ്വാഭാവികമായ അടുത്ത ഘട്ടമാണ്.
എന്നാല് പുതുതായി അയര്ലണ്ടിലെത്തുന്ന കുടിയേറ്റക്കാരുടെ സ്ഥിതി ഇതില്നിന്ന് വ്യത്യസ്തമാണ്. സെന്സസ് കണക്കനുസരിച്ച് രാജ്യത്തെത്തിയതിന് ആദ്യ വര്ഷത്തിനുള്ളിലുള്ള വിദേശ പൗരന്മാര് നേതൃത്വം നല്കുന്ന കുടുംബങ്ങളില് 80 ശതമാനത്തോളം സ്വകാര്യ വാടകവീടുകളിലാണ് താമസിച്ചിരുന്നത്. അതിനാല് കുടിയേറ്റം കൂടിയതിന്റെ അടുത്ത നാളുകളില് തന്നെ വീടുവാങ്ങല് സഫലമാകുമെന്ന് കരുതാനാവില്ല.
ഇന്നത്തെ വാടകക്കാരന് നാളത്തെ വാങ്ങുന്നവന്…
എന്നാല് ഭവന വിപണിയെ ദീര്ഘകാലത്ത് ബാധിക്കുന്നത് ഇവിടെയാണ്.
ഇന്ന് വാടകവീടുകളില് താമസിക്കുന്ന ആയിരക്കണക്കിന് ആരോഗ്യപ്രവര്ത്തകര്, ഐ.ടി ജീവനക്കാര്, എന്ജിനീയര്മാര് തുടങ്ങിയവര് അഞ്ചോ ഏഴോ വര്ഷത്തിനുശേഷം സ്ഥിരതാമസക്കാരാകുമ്പോള് ആദ്യവീട് വാങ്ങുന്നവരുടെ കൂട്ടത്തിലേക്ക് മാറാം.
അതിനാല് അയര്ലണ്ടിലെ ജനസംഖ്യയും തൊഴില് ചെയ്യുന്ന കുടിയേറ്റക്കാരുടെ എണ്ണവും വര്ധിക്കുന്ന സാഹചര്യത്തില് ഭവനനിര്മാണം അതേ വേഗത്തില് ഉയരുന്നില്ലെങ്കില്, ഭാവിയിലെ വീടുവാങ്ങല് ആവശ്യവും വിലസമ്മര്ദ്ദവും തുടരാന് സാധ്യതയുണ്ട്.
വീടുവില ഉടന് ഇടിയുമോ?
ഇപ്പോഴത്തെ കണക്കുകള് നോക്കുമ്പോള് വലിയ വിലയിടിവിനെ അടിസ്ഥാനമാക്കിയുള്ള ഒരു വിപണി സാഹചര്യം കാണുന്നില്ല.
വിലവര്ധനയുടെ വേഗം കുറയുന്നത് വാങ്ങുന്നവര്ക്ക് ഒരു നല്ല സൂചനയാണ്. എന്നാല് ആവശ്യത്തേക്കാള് കുറഞ്ഞ വീടുകളുടെ വിതരണം, ഉയര്ന്ന ജനസംഖ്യ, ശക്തമായ തൊഴില് വിപണി, രണ്ട് വരുമാനമുള്ള കുടുംബങ്ങളുടെ വാങ്ങല്ശേഷി, സര്ക്കാര് ആദ്യവീട് സഹായങ്ങള് എന്നിവ വിലയ്ക്ക് അടിത്തറ നല്കുന്നു.
അതുകൊണ്ട് ഇപ്പോഴത്തെ ഭവനവായ്പാ കുതിപ്പിന്റെ സന്ദേശം ഒരുപക്ഷേ മറ്റൊന്നാണ്:'വീട് വിലകുറയുന്നത് വരെ കാത്തിരിക്കാം' എന്ന ചിന്തയില് നിന്ന് 'വാങ്ങാന് കഴിയുന്ന സമയത്ത് വാങ്ങാം' എന്ന നിലപാടിലേക്ക് അയര്ലണ്ടിലെ ആദ്യവീട് വാങ്ങുന്നവര് മാറുകയാണ്.
മെയ് മുതല് ജൂലൈ വരെയുള്ള വായ്പാ അംഗീകാരങ്ങളിലെ റെക്കോര്ഡ് വളര്ച്ചയും, ആദ്യവീട് വാങ്ങുന്നവരുടെ ശക്തമായ സാന്നിധ്യവും അതിലേക്കാണ് വിരല്ചൂണ്ടുന്നത്. എന്നാല് വായ്പാ അംഗീകാരം കിട്ടുന്നതും അവസാനം വീട് കിട്ടുന്നതും രണ്ടാണ്. രാജ്യത്ത് ആവശ്യത്തിന് വീടുകള് പണിയപ്പെടാത്തിടത്തോളം, കൂടുതല് മോര്ട്ട്ഗേജ് അംഗീകാരങ്ങള് തന്നെ പരിമിതമായ വീടുകള്ക്കായി കൂടുതല് ആളുകള് മത്സരിക്കുന്ന സാഹചര്യം സൃഷ്ടിക്കാനും സാധ്യതയുണ്ട്.കാര്യം കഷ്ടമാണ്. വില കൂടാനാണ് ഇവിടെ സാധ്യത.