ജമ്മു: ഉദ്ധംപൂരിനും ബനിഹാളിനുമിടയില് വിവിധയിടങ്ങളില് അറ്റകുറ്റപ്പണികളും മണ്ണിടിച്ചില് നീക്കലും തുടരുന്നതിനാല് ജമ്മു-ശ്രീനഗര് ദേശീയപാതയില് വാഹനഗതാഗതം പൂര്ണ്ണമായും തടസ്സപ്പെട്ടു.
ഇതേതുടര്ന്ന് ജമ്മുവില് നിന്ന് അമര്നാഥ് തീര്ത്ഥാടകരുടെ പുതിയ സംഘത്തിന് കാശ്മീരിലേക്ക് പോകാന് അനുമതി നല്കിയിട്ടില്ല.
വെള്ളിയാഴ്ച രാവിലെ മുതല് അടച്ചിട്ട പാത ശനിയാഴ്ചയോടെ തുറക്കാനാകുമെന്ന് പ്രതീക്ഷിച്ചിരുന്നെങ്കിലും ഉദ്ധംപൂരിലെ സംറോളിയിലുണ്ടായ പുതിയ മണ്ണിടിച്ചില് റോഡ് ഗതാഗതയോഗ്യമാക്കുന്നതിന് തിരിച്ചടിയായി.
എന്നാല്, കാശ്മീര് താഴ്വരയിലെ ഗന്ധര്ബാല് ജില്ലയിലുള്ള ബാല്താല് ക്യാമ്പില് നിന്ന് 8,371 തീര്ത്ഥാടകര് ഗുഹാക്ഷേത്രത്തിലേക്ക് പുറപ്പെട്ടിട്ടുണ്ട്. ശനിയാഴ്ച രാവിലെ 671 തീര്ത്ഥാടകര് ദര്ശനം പൂര്ത്തിയാക്കി.
അതേസമയം, ജമ്മു കാശ്മീരിലെ ചെനാബ് താഴ്വര ജില്ലകളായ ദോഡ, റംബാന്, കിഷ്ത്വാര് എന്നിവിടങ്ങളില് കനത്ത മഴ തുടരുന്നതിനാല് പ്രദേശത്തെ സ്കൂളുകള്ക്ക് ഭരണകൂടം അവധി പ്രഖ്യാപിച്ചു.
ശനിയാഴ്ച പുലര്ച്ചെ 2:30-ഓടെ കിഷ്ത്വാറിലെ ഛത്രൂ മേഖലയിലുണ്ടായ മേഘവിസ്ഫോടനത്തെ തുടര്ന്നുണ്ടായ പ്രളയത്തില് നിരവധി വാഹനങ്ങള് ഒലിച്ചുപോയി.
ഇതിനെ തുടര്ന്ന് സിന്തന് വഴിയുള്ള കിഷ്ത്വാര്-അനന്ത്നാഗ് ദേശീയപാതയും അടച്ചു. വരും ദിവസങ്ങളിലും സംസ്ഥാനത്ത് വ്യാപക മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കി.