ന്യൂയോര്ക്ക്: കാന്സറിനെതിരെ ഫലപ്രദമായേക്കാവുന്ന പുതിയ മരുന്നുകള് കണ്ടെത്തുന്നതിനായി പൂപ്പലുകളെ ലക്ഷ്യമിട്ട് ശാസ്ത്രലോകം വികസിപ്പിച്ചെടുത്ത പുതിയ ജീന് എഡിറ്റിംഗ് ഉപകരണം മെഡിക്കല് രംഗത്ത് വലിയ പ്രതീക്ഷ നല്കുന്നു.
മൃഗങ്ങളുടെയും വിളകളുടെയും ജനിതകഘടന മനസ്സിലാക്കാന് ശാസ്ത്രജ്ഞര് പതിറ്റാണ്ടുകളും കോടിക്കണക്കിന് ഡോളറും ചിലവഴിച്ചിട്ടുണ്ടെങ്കിലും, ജീവശാസ്ത്ര മേഖലയില് പലപ്പോഴും അവഗണിക്കപ്പെട്ടുപോയ ഒന്നാണ് പൂപ്പലുകള്.
എന്നാല് ആധുനിക വൈദ്യശാസ്ത്രത്തിന്റെ വളര്ച്ചയില് പെന്സിലിന് മുതല് കൊളസ്ട്രോള് കുറയ്ക്കുന്ന സ്റ്റാറ്റിന് വരെയുള്ള ജീവന്രക്ഷാ മരുന്നുകള് നല്കിയതില് പൂപ്പലുകളുടെ പങ്ക് വളരെ വലുതാണ്.
ഇതിന്റെ ഭൂരിഭാഗം ജനിതക രഹസ്യങ്ങളും ഇനിയും ചുരുളഴിയാത്ത പശ്ചാത്തലത്തിലാണ്, കെമിക്കല് ആന്ഡ് ബയോമോളികുലാര് എന്ജിനീയറായ ഷുഹെ 'ഷെറി' ഗാവോയുടെ നേതൃത്വത്തിലുള്ള ഗവേഷകര് പുതിയ കണ്ടെത്തലുമായി രംഗത്തെത്തിയിരിക്കുന്നത്.
പ്രകൃതിദത്തമായ സാഹചര്യങ്ങളില് ബാക്ടീരിയകളെ പ്രതിരോധിക്കാന് പൂപ്പലുകള് മരുന്ന് ഉത്പാദിപ്പിക്കുന്ന ജനിതക പാതകള് സജീവമാക്കുമെങ്കിലും, ലബോറട്ടറിയിലെ കൃത്രിമ സാഹചര്യങ്ങളില് ഇവ നിഷ്ക്രിയമായി മാറുകയാണ് പതിവ്.
ഈ നിഷ്ക്രിയ ജനിതക പാതകളെ പുനരുജ്ജീവിപ്പിക്കാന് പരമ്പരാഗത ജീന് എഡിറ്റിംഗ് ഉപകരണങ്ങള്ക്ക് സാധിക്കാതെ വന്നപ്പോഴാണ് ഗവേഷകര് പുതിയ സാങ്കേതികവിദ്യ വികസിപ്പിച്ചത്.
സ്കൂള് ഓഫ് എന്ജിനീയറിങ് ആന്ഡ് അപ്ലൈഡ് സയന്സസിലെ ഗവേഷകര് വികസിപ്പിച്ചെടുത്ത 'fPE7max' എന്ന ഈ അത്യാധുനിക ജീന് എഡിറ്റിംഗ് ഉപകരണം വഴി പൂപ്പലുകളുടെ സങ്കീര്ണ്ണമായ ജനിതകഘടനയില് കൃത്യമായ മാറ്റങ്ങള് വരുത്താന് സാധിക്കും. പ്രശസ്ത ശാസ്ത്ര മാസികയായ 'നേച്ചര് ബയോടെക്നോളജി'യിലാണ് ഈ പഠനം പ്രസിദ്ധീകരിച്ചിരിക്കുന്നത്.
പൂപ്പലുകളില് നടത്തിയ ഈ ജനിതക പരീക്ഷണത്തിലൂടെ ശാസ്ത്രലോകത്തിന് ഇതുവരെ അപരിചിതമായിരുന്ന 8 പുതിയ തന്മാത്രകള് ഉള്പ്പെടെ 18 വ്യത്യസ്ത സംയുക്തങ്ങള് വേര്തിരിച്ചെടുക്കാന് ഗവേഷകര്ക്ക് കഴിഞ്ഞു.
ഇവയില് മൂന്നെണ്ണം ശക്തമായ കാന്സര് പ്രതിരോധ ശേഷി പ്രകടിപ്പിക്കുന്നവയാണ്. ഇതിലൊരു തന്മാത്ര മനുഷ്യരിലെ സ്തനാര്ബുദം, കരള് കാന്സര്, രക്താര്ബുദം എന്നിവയുടെ കോശങ്ങളെ നശിപ്പിക്കാന് പ്രത്യേക ശേഷിയുള്ളതാണെന്ന് പഠനത്തിന് നേതൃത്വം നല്കിയ ശാസ്ത്രജ്ഞനായ ചുന്ഷിയാവോ സുന് വ്യക്തമാക്കി. മരുന്ന് നിര്മ്മാണ രംഗത്ത് വലിയൊരു വഴിത്തിരിവാകാന് ഈ തന്മാത്രകള്ക്ക് സാധിക്കും.
കഴിഞ്ഞ ദശകത്തില് ജീന് എഡിറ്റിംഗിനായി വ്യാപകമായി ഉപയോഗിച്ചിരുന്ന 'ക്രിസ്പര്-കാസ്9' സാങ്കേതികവിദ്യ പൂപ്പലുകളില് പ്രയോഗിക്കുമ്പോള് അപ്രതീക്ഷിതമായ ജനിതക വ്യതിയാനങ്ങള്ക്ക് കാരണമായിരുന്നു. എന്നാല് അതിനേക്കാള് കൃത്യതയാര്ന്ന 'പ്രൈം എഡിറ്റിംഗ്' സാങ്കേതികവിദ്യയാണ് പുതിയ ഉപകരണത്തില് ഉപയോഗിച്ചിരിക്കുന്നത്.
കോശങ്ങള്ക്കുള്ളിലേക്ക് അയക്കുന്ന ജനിതക നിര്ദ്ദേശങ്ങള് അടങ്ങിയ ആര്.എന്.എ നശിച്ചുപോകാതിരിക്കാന് 'fLa' എന്ന പ്രത്യേക പ്രോട്ടീന് കവചം ഒരുക്കിയും, മാറ്റം വരുത്തിയ ഡി.എന്.എ പഴയപടിയാക്കാന് പൂപ്പലുകള് നടത്തുന്ന സ്വയം പ്രതിരോധ ശ്രമങ്ങളെ തടഞ്ഞുമാണ് ഗവേഷകര് 'fPE7max' രൂപകല്പ്പന ചെയ്തത്.
ഏകദേശം 90 ശതമാനത്തോളം കൃത്യതയോടെ ജീന് എഡിറ്റിംഗ് നടത്താന് ഈ പുതിയ ഉപകരണത്തിന് സാധിക്കും. പൂപ്പലുകളുടെ ഉപാപചയ പ്രവര്ത്തനങ്ങളെ നിയന്ത്രിക്കുന്ന 'laeA' എന്ന പ്രധാന ജീനിലെ തടസ്സങ്ങള് ഈ ഉപകരണം വഴി നീക്കിയപ്പോഴാണ് കാന്സറിനെ ചെറുക്കുന്ന തന്മാത്രകള് അടങ്ങിയ നിഷ്ക്രിയ ജീന് കൂട്ടങ്ങളെ ഉണര്ത്താന് ശാസ്ത്രജ്ഞര്ക്ക് കഴിഞ്ഞത്.
മാരക രോഗങ്ങള്ക്കുള്ള അടുത്ത തലമുറ ജീവന്രക്ഷാ മരുന്നുകള് പ്രകൃതിയില് തന്നെ ഒളിഞ്ഞിരിപ്പുണ്ടെന്നതിന്റെ വ്യക്തമായ തെളിവാണ് ഈ കണ്ടെത്തലെന്ന് ഗവേഷകര് കൂട്ടിച്ചേര്ത്തു.