ചണ്ഡീഗഡ്: കര്താര്പൂര് ഇടനാഴി അനിശ്ചിതകാലത്തേക്ക് അടച്ചിടാനുള്ള തീരുമാനത്തില് കേന്ദ്ര സര്ക്കാര് പുനരാലോചന നടത്തണമെന്ന് നോര്ത്ത് അമേരിക്കന് പഞ്ചാബി അസോസിയേഷന് ആവശ്യപ്പെട്ടു.
ദേശീയ സുരക്ഷയ്ക്ക് സര്ക്കാരുകള് മുന്ഗണന നല്കണമെന്ന കാര്യത്തില് തര്ക്കമില്ലെങ്കിലും, ഇടനാഴി അനിശ്ചിതകാലത്തേക്ക് അടച്ചിടുന്നത് സ്ഥിരമായ ഒരു പരിഹാരമാകരുതെന്ന് നോര്ത്ത് അമേരിക്കന് പഞ്ചാബി അസോസിയേഷന് എക്സിക്യൂട്ടീവ് ഡയറക്ടര് സത്നാം സിംഗ് ചഹല് പറഞ്ഞു.
ആവശ്യത്തിന് സുരക്ഷയും ആധുനിക നിരീക്ഷണ സംവിധാനങ്ങളും കര്ശന പരിശോധനകളും ഉറപ്പുവരുത്തിക്കൊണ്ട് ഭക്തര്ക്ക് പ്രവേശനം സാധ്യമാക്കാനുള്ള വഴികള് കേന്ദ്രം പരിശോധിക്കണമെന്നും അദ്ദേഹം കൂട്ടിച്ചേര്ത്തു.
കഴിഞ്ഞ വര്ഷം ഏപ്രില് 22-നുണ്ടായ പഹല്ഗാം ഭീകരാക്രമണത്തിന് മറുപടിയായി ഇന്ത്യന് സായുധ സേന ആരംഭിച്ച 'ഓപ്പറേഷന് സിന്ദൂര്' നടപടികള്ക്ക് പിന്നാലെ, കഴിഞ്ഞ വര്ഷം മേയ് 7 മുതലാണ് കര്താര്പൂര് ഇടനാഴി വഴിയുള്ള യാത്ര നിര്ത്തിവെച്ചത്.
നിലവിലെ സുരക്ഷാ സാഹചര്യങ്ങള് കാരണം ഇടനാഴി അടച്ചിടാന് നിര്ബന്ധിതരായിരിക്കുകയാണെന്ന് കേന്ദ്ര വിദേശകാര്യ സഹമന്ത്രി കീര്ത്തി വര്ദ്ധന് സിംഗ് കഴിഞ്ഞ ദിവസം ലോക്സഭയെ അറിയിച്ചിരുന്നു.
സിഖ് മതസ്ഥാപകനായ ഗുരു നാനാക് ദേവ് തന്റെ ജീവിതത്തിന്റെ അവസാന കാലഘട്ടം ചെലവഴിച്ച പാകിസ്ഥാനിലെ രവി നദീതീരത്തുള്ള കര്താര്പൂര് ദര്ബാര് സാഹിബ് ഗുരുദ്വാര സന്ദര്ശിക്കാന് സിഖ് ഭക്തര്ക്ക് അനുമതി നല്കുന്ന തന്ത്രപ്രധാനമായ പാതയാണിത്.