ഓസ്ട്രേലിയന്‍ പ്രധാനമന്ത്രി ആന്റണി അല്‍ബനീസുമായി മെല്‍ബണില്‍ കൂടിക്കാഴ്ച നടത്തിയ ശേഷം, ഇരുരാജ്യങ്ങളിലെയും വ്യവസായ പ്രമുഖര്‍ പങ്കെടുത്ത ഇന്ത്യ-ഓസ്ട്രേലിയ സി.ഇ.ഒ ഫോറത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

ശുദ്ധമായ ഊര്‍ജ്ജം, അടിസ്ഥാന സൗകര്യ വികസനം, കൃത്രിമബുദ്ധി, വിദ്യാഭ്യാസം തുടങ്ങിയ മേഖലകളില്‍ ഇരുരാജ്യങ്ങളിലെയും കമ്പനികള്‍ സഹകരണം കൂടുതല്‍ ശക്തമാക്കണമെന്ന് പ്രധാനമന്ത്രി ആവശ്യപ്പെട്ടു.

ലോകം സപ്ലൈ ചെയിന്‍ തടസ്സങ്ങളും ഊര്‍ജ്ജ പ്രതിസന്ധിയും നേരിടുന്ന ഈ കാലഘട്ടത്തില്‍ ഇരുരാജ്യങ്ങളും കൈകോര്‍ക്കേണ്ടത് അത്യാവശ്യമാണ്. 2022-ല്‍ ഒപ്പുവെച്ച സാമ്പത്തിക സഹകരണ വ്യാപാര കരാറിന് ശേഷം ഇന്ത്യയില്‍ നിന്നുള്ള കയറ്റുമതി ഇരട്ടിയായിട്ടുണ്ടെന്നും, ഇപ്പോള്‍ ഇതിലും വിപുലമായ സമഗ്ര സാമ്പത്തിക സഹകരണ കരാറിലേക്ക് ഇരുരാജ്യങ്ങളും നീങ്ങുകയാണെന്നും അദ്ദേഹം വ്യക്തമാക്കി.

ഹൈഡ്രോ പ്രോജക്ടുകള്‍, ഗ്രീന്‍ ഹൈഡ്രജന്‍, സോളാര്‍ മോഡ്യൂളുകള്‍ എന്നിവയ്ക്കായി ഇന്ത്യയില്‍ വലിയൊരു നിര്‍മ്മാണ മേഖലയാണ് ഒരുങ്ങുന്നത്.

2030-ഓടെ 500 ജിഗാവാട്ട് പുനരുപയോഗ ഊര്‍ജ്ജ ശേഷി കൈവരിക്കാനാണ് ഇന്ത്യ ലക്ഷ്യമിടുന്നത്. ഇതിനായി ഓസ്ട്രേലിയയുടെ സാങ്കേതിക വിദ്യയും യുറേനിയം ശേഖരവും ഇന്ത്യയെ സഹായിക്കും. ഏതാനും മാസങ്ങള്‍ക്ക് മുന്‍പ് ആണവോര്‍ജ്ജ മേഖല സ്വകാര്യ കമ്പനികള്‍ക്കായി ഇന്ത്യ തുറന്നുനല്‍കിയിട്ടുണ്ട്.

2047-ഓടെ 100 ജിഗാവാട്ട് ആണവോര്‍ജ്ജം ഉത്പാദിപ്പിക്കുകയാണ് ലക്ഷ്യം. ഇന്ത്യയിലെ തുറമുഖങ്ങള്‍, വിമാനത്താവളങ്ങള്‍, റെയില്‍വേ, ദേശീയപാത വികസനം എന്നിവയില്‍ നിക്ഷേപം നടത്താന്‍ ഓസ്ട്രേലിയന്‍ കമ്പനികളെ പ്രധാനമന്ത്രി ക്ഷണിച്ചു.

നിലവില്‍ ഇന്ത്യയില്‍ പ്രതിദിനം 34 കിലോമീറ്റര്‍ ദേശീയപാതയും 8 കിലോമീറ്റര്‍ റെയില്‍വേ ട്രാക്കും നിര്‍മ്മിക്കുന്നുണ്ട്. എ.ഐ, സെമികണ്ടക്ടര്‍ മേഖലകള്‍ക്കായി ഇന്ത്യ 10 ബില്യണ്‍ ഡോളറിലധികം അനുവദിച്ചിട്ടുണ്ടെന്നും ഓസ്ട്രേലിയയുടെ വന്‍കിട പെന്‍ഷന്‍ ഫണ്ടുകള്‍ക്ക് നിക്ഷേപം നടത്താന്‍ ഏറ്റവും സുരക്ഷിതമായ രാജ്യം ഇന്ത്യയാണെന്നും അദ്ദേഹം ഉറപ്പുനല്‍കി.

ഇരുരാജ്യങ്ങളും തമ്മിലുള്ള ബന്ധം വെറും തലസ്ഥാനങ്ങളില്‍ ഒതുങ്ങാതെ സംസ്ഥാനങ്ങളും നഗരങ്ങളും തമ്മിലുള്ള പ്രാദേശിക പങ്കാളിത്തമായി വളരണമെന്നും മോദി കൂട്ടിച്ചേര്‍ത്തു.