കൊല്ക്കത്ത: പശ്ചിമ ബംഗാളില് മന്ത്രിസഭ വികസിപ്പിച്ചു. തിങ്കളാഴ്ച കൊല്ക്കത്തയിലെ ലോക് ഭവനില് നടന്ന ചടങ്ങില് 35 പുതിയ മന്ത്രിമാര് സത്യപ്രതിജ്ഞ ചെയ്ത് അധികാരമേറ്റു.
ഗവര്ണര് ആര്. എന്. രവി പുതിയ മന്ത്രിമാര്ക്ക് സത്യവാചകം ചൊല്ലിക്കൊടുത്തു. ഇതോടെ മുഖ്യമന്ത്രി സുവേന്ദു അധികാരിയുടെ കീഴിലുള്ള മന്ത്രിസഭയിലെ ആകെ അംഗങ്ങളുടെ എണ്ണം 41 ആയി ഉയര്ന്നു. വിവിധ വകുപ്പുകളുടെ ഭരണം കൂടുതല് ശക്തമാക്കുന്നതിനും കാര്യക്ഷമമാക്കുന്നതിനുമായാണ് സംസ്ഥാന സര്ക്കാരിന്റെ ഈ സുപ്രധാന നീക്കം.
എം.എല്.എമാരായ ദീപക് ബര്മന്, അര്ജുന് സിംഗ്, ശങ്കര് ഘോഷ്, ഗൗരി ശങ്കര് ഘോഷ്, തപസ് റോയ്, മനോജ് കുമാര് ഒറാവോണ്, ജഗന്നാഥ് ചതോപാധ്യായ, അജോയ് പോദ്ദാര്, സ്വപന് ദാസ് ഗുപ്ത, ഡോ. ശരദ്വത് മുഖര്ജി, കല്യാണ് ചക്രവര്ത്തി തുടങ്ങിയ പ്രമുഖരാണ് പുതിയ മന്ത്രിമാരായി സത്യപ്രതിജ്ഞ ചെയ്തത്.
പുതിയ മന്ത്രിസഭയുടെ ഭാഗമായ ഭാരതീയ ജനതാ പാര്ട്ടി എം.എല്.എ അര്ജുന് സിംഗ്, പാര്ട്ടിയുടെയും പൊതുജനങ്ങളുടെയും പ്രതീക്ഷകള്ക്കനുസരിച്ച് പുതിയ ഉത്തരവാദിത്തങ്ങള് ഏറ്റെടുക്കാന് താന് സന്നദ്ധനാണെന്ന് ചടങ്ങിന് മുന്പ് വ്യക്തമാക്കിയിരുന്നു.
'ഞാന് എപ്പോഴും പുതിയ ഉത്തരവാദിത്തങ്ങള് ഏറ്റെടുക്കാനും അവ ഭംഗിയായി നിറവേറ്റാനും ശ്രമിക്കുന്ന ആളാണ്. സര്ക്കാരും പാര്ട്ടിയും ജനങ്ങളും എന്താണോ ആഗ്രഹിക്കുന്നത്, അതിനനുസരിച്ച് ഉയരുക എന്നതാണ് ഞങ്ങളുടെ മുന്ഗണന,' വാര്ത്താ ഏജന്സിയായ എ.എന്.ഐയോട് സംസാരിക്കവെ അദ്ദേഹം പറഞ്ഞു.
ഞായറാഴ്ച തന്നെ മുഖ്യമന്ത്രി സുവേന്ദു അധികാരി തന്റെ മന്ത്രിസഭയിലേക്ക് 35 പേരെക്കൂടി ഉള്പ്പെടുത്തുമെന്ന കാര്യം പ്രഖ്യാപിച്ചിരുന്നു.
ജനാധിപത്യപരമായി തിരഞ്ഞെടുക്കപ്പെട്ട പശ്ചിമ ബംഗാളിലെ ദേശീയവാദി സര്ക്കാരിന്റെ പൂര്ണ്ണ മന്ത്രിസഭ ലോക് ഭവനില് അധികാരമേല്ക്കുമെന്നും, പശ്ചിമ ബംഗാളിലെ ജനങ്ങളുടെ ആഗ്രഹങ്ങള് പൂര്ത്തീകരിക്കാന് തങ്ങള് പ്രതിജ്ഞാബദ്ധരാണെന്നും അദ്ദേഹം എക്സ് പ്ലാറ്റ്ഫോമില് കുറിച്ചിരുന്നു.