മോസ്‌കോ: യുക്രെയ്നുമായുള്ള യുദ്ധത്തെക്കുറിച്ചുള്ള തന്റെ മുന്‍ നിലപാടുകളില്‍ മാറ്റം വരുത്തിക്കൊണ്ട്, ഈ സംഘര്‍ഷം അതിന്റെ അവസാനത്തിലേക്ക് അടുക്കുകയാണെന്ന് റഷ്യന്‍ പ്രസിഡന്റ് വ്ളാഡിമിര് പുടിന്‍ പ്രസ്താവിച്ചു.
യുദ്ധം അവസാനിക്കാറായി എന്ന് റഷ്യന്‍ നേതാവ് സൂചിപ്പിക്കുന്നത് ഇതാദ്യമല്ല.
മേയ് 29-ന് പുറത്തുവന്ന വിവിധ റഷ്യന്‍ മാധ്യമ റിപ്പോര്‍ട്ടുകള്‍ പ്രകാരം, യുക്രെയ്ന്‍ യുദ്ധത്തെക്കുറിച്ച്‌ പുടിന്‍ നടത്തിയ ചില ശ്രദ്ധേയമായ പരാമര്‍ശങ്ങള്‍ പുറത്തു വന്നിട്ടുണ്ട്. യുദ്ധഭൂമിയിലെ നിലവിലെ സാഹചര്യങ്ങള്‍ വിശകലനം ചെയ്തുകൊണ്ടാണ് യുദ്ധം അവസാനത്തിലേക്ക് നീങ്ങുകയാണെന്ന് റഷ്യന്‍ പ്രസിഡന്റ് വ്യക്തമാക്കിയത്.
മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി പറയവേയാണ് പുടിന്‍ ഇക്കാര്യം വ്യക്തമാക്കിയതെന്ന് 'കീവ് പോസ്റ്റ്' റിപ്പോര്‍ട്ട് ചെയ്തു. യുദ്ധം അവസാന ഘട്ടത്തിലാണെന്ന തന്റെ മുന്‍ പ്രസ്താവനകളെക്കുറിച്ച്‌ റഷ്യന്‍ മാധ്യമങ്ങള്‍ ചോദിച്ചപ്പോഴാണ് അദ്ദേഹം പ്രതികരണം നടത്തിയത്. യുദ്ധഭൂമിയിലെ കൃത്യമായ കണക്കുകളുടെയും പുരോഗതിയുടെയും അടിസ്ഥാനത്തിലാണ് താന്‍ അങ്ങനെയൊരു പ്രസ്താവന നടത്തിയതെന്ന് പുടിന്‍ വ്യക്തമാക്കി.
'കാര്യങ്ങള്‍ അതിന്റെ അവസാനത്തിലേക്ക് അടുക്കുകയാണെന്ന എന്റെ പ്രസ്താവന ഞാന്‍ വെറുതെ പറഞ്ഞതല്ല. യുദ്ധഭൂമിയിലെ സാഹചര്യങ്ങള്‍ കൃത്യമായി വിശകലനം ചെയ്ത ശേഷമാണ് ഞാനത് പറഞ്ഞത്. നിലവില്‍ ഞങ്ങളുടെ സൈന്യം എല്ലാ ദിശകളിലും മുന്നേറിക്കൊണ്ടിരിക്കുകയാണ്, അത് നിങ്ങള്‍ എല്ലാ ദിവസവും കാണുന്നുണ്ടല്ലോ,' പുടിന്‍ കൂട്ടിച്ചേര്‍ത്തു.
നേരത്തെ മേയ് 9-ന്, യുക്രെയ്ന്‍ പ്രസിഡന്റ് വൊളോഡിമിര്‍ സെലെന്‍സ്‌കിയുമായി കൂടിക്കാഴ്ചയ്ക്ക് തയ്യാറാണെന്ന് വെളിപ്പെടുത്തി പുടിന്‍ ലോകത്തെ ഞെട്ടിച്ചിരുന്നു. 2022 ഫെബ്രുവരിയില്‍ യുക്രെയ്ന്‍ അധിനിവേശം ആരംഭിച്ചതിന് ശേഷം സെലെന്‍സ്‌കിയുമായി ചര്‍ച്ച നടത്താന്‍ പുടിന്‍ വിമുഖത കാണിച്ചിരുന്നതാണ്.
എന്നാല്‍, ഇരുരാജ്യങ്ങളും തമ്മിലുള്ള യുദ്ധം അവസാനിപ്പിക്കുന്നതിനുള്ള അന്തിമ കരാറുകളില്‍ ഒപ്പുവെക്കാന്‍ മാത്രമായിരിക്കും സെലെന്‍സ്‌കിയുമായുള്ള നേരിട്ടുള്ള കൂടിക്കാഴ്ചയെന്നും പുടിന്‍ വ്യക്തമാക്കിയിരുന്നു.
താനോ റഷ്യയോ സെലെന്‍സ്‌കിയെ കാണാന്‍ വിസമ്മതിച്ചിട്ടില്ലെന്നും, ആര്‍ക്കെങ്കിലും അത്തരമൊരു കൂടിക്കാഴ്ചയ്ക്ക് താല്പര്യമുണ്ടെങ്കില്‍ അവര്‍ക്ക് മോസ്‌കോയിലേക്ക് വരാമെന്നും അദ്ദേഹം പറഞ്ഞു.
'യുക്രെയ്ന്‍ സംഘര്‍ഷം അതിന്റെ അന്ത്യത്തിലേക്ക് നീങ്ങുകയാണ്' എന്ന് മേയ് 9-നും പുടിന്‍ അവകാശപ്പെട്ടിരുന്നതായി 'യുക്രെയ്ന്‍സ്‌ക പ്രാവ്ദ' റിപ്പോര്‍ട്ട് ചെയ്തു. യുദ്ധമുഖത്ത് റഷ്യയ്ക്ക് സംഭവിക്കുന്ന വന്‍ നാശനഷ്ടങ്ങളും മുന്നേറ്റമില്ലായ്മയും പുടിനെയും അദ്ദേഹത്തിന്റെ ജനറല്‍മാരെയും ആശങ്കപ്പെടുത്തുന്നുണ്ടെന്നാണ് മറ്റ് ചില റിപ്പോര്‍ട്ടുകള്‍ സൂചിപ്പിക്കുന്നത്.
റഷ്യയ്ക്ക് ഇപ്പോള്‍ കാര്യമായ മുന്നേറ്റം നടത്താന്‍ കഴിയുന്നില്ലെന്നും, യുദ്ധത്തിന്റെ നിയന്ത്രണം യുക്രെയ്ന്‍ കൈക്കലാക്കുകയാണെന്നും റിപ്പോര്‍ട്ടുകളുണ്ട്. കഴിഞ്ഞ വര്‍ഷത്തെ അപേക്ഷിച്ച്‌ യുക്രെയ്‌ന്റെ സ്ഥിതി ഇപ്പോള്‍ ഏറെ മെച്ചപ്പെട്ടതാണെന്ന് വിദഗ്ദ്ധര്‍ ചൂണ്ടിക്കാണിക്കുന്നു.
എന്നാല്‍ യുദ്ധഭൂമിയിലെ ഈ മാറ്റങ്ങള്‍ പുടിനെ പൂര്‍ണ്ണമായും യുദ്ധം അവസാനിപ്പിക്കാന്‍ പ്രേരിപ്പിക്കുമോ എന്ന് വരും ദിവസങ്ങളില്‍ കണ്ടറിയണം.