28-ാം പതിപ്പില്‍ 105 രാജ്യങ്ങളില്‍ നിന്നായി ലഭിച്ച 5,618 അപേക്ഷകളുടെ ഇരട്ടിയിലധികമാണിത്.

യു എ ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അല്‍ മക്തൂം പ്രഖ്യാപിച്ച "ലോകത്തിലെ ഏറ്റവും മനോഹരമായ ഖുർആൻ പാരായണത്തിനായുള്ള അന്വേഷണം" എന്ന പുതിയ വികസന കാഴ്ചപ്പാടിനെ തുടർന്നാണ് അപേക്ഷകരുടെ എണ്ണത്തില്‍ വൻ വർധനവുണ്ടായത്.

ഇത്രയും കുറഞ്ഞ സമയത്തിനുള്ളില്‍ ഇത്രയധികം എൻട്രികള്‍ ലഭിച്ചത് അവാർഡിന്റെ പുതുക്കിയ വിഭാഗങ്ങളിലും സമ്മാനത്തുകയിലും നാമനിർദ്ദേശ രീതികളിലുമുള്ള ജനങ്ങളുടെ വിശ്വാസത്തെയാണ് കാണിക്കുന്നതെന്ന് ഇസ്ലാമിക് അഫയേഴ്സ് ആൻഡ് ചാരിറ്റബിള്‍ ആക്ടിവിറ്റീസ് ഡിപ്പാർട്ട്മെന്റ് ഡയറക്ടർ ജനറലും അവാർഡ് ട്രസ്റ്റി ബോർഡ് ചെയർമാനുമായ അഹമ്മദ് ദർവീഷ് അല്‍ മുഹൈരി പറഞ്ഞു. അറബ് ലോകം, മിഡില്‍ ഈസ്റ്റ്, ആഫ്രിക്ക, ഏഷ്യ, യൂറോപ്പ്, അമേരിക്കൻ ഭൂഖണ്ഡങ്ങള്‍ എന്നിവിടങ്ങളില്‍ നിന്നെല്ലാം എൻട്രികള്‍ ലഭിച്ചിട്ടുണ്ട്.

സമ്മാനത്തുക 12 ദശലക്ഷത്തിലധികം ദിർഹം

12 ദശലക്ഷത്തിലധികം ദിർഹമാണ് ഇത്തവണത്തെ സമ്മാനത്തുക. 16 വയസ്സിന് മുകളിലുള്ള പുരുഷ വിഭാഗത്തിലെ ഒന്നാം സ്ഥാനക്കാരനും 16 വയസ്സില്‍ താഴെയുള്ള ആണ്‍കുട്ടികളുടെയും പെണ്‍കുട്ടികളുടെയും വിഭാഗത്തിലെ ഒന്നാം സ്ഥാനക്കാരനും 10 ലക്ഷം യു എസ് ഡോളർ (US Dollar) വീതം ലഭിക്കും. ഓരോ വിഭാഗത്തിലെയും രണ്ടും മൂന്നും സ്ഥാനക്കാർക്ക് യഥാക്രമം 1,00,000 യു എസ് ഡോളറും 50,000 യു എസ് ഡോളറും ലഭിക്കും. ഗ്ലോബല്‍ ഖുർആനിക് പേഴ്സണാലിറ്റി ഓഫ് ദി ഇയർ അവാർഡ് ജേതാവിനും 10 ലക്ഷം യു എസ് ഡോളർ സമ്മാനമായി ലഭിക്കും.

വ്യക്തികള്‍ക്ക് നേരിട്ടും അപേക്ഷിക്കാം

ആദ്യമായി അക്രഡിറ്റഡ് ഇസ്ലാമിക് സെന്ററുകള്‍ വഴിയും സ്വന്തം രാജ്യങ്ങള്‍ വഴിയുമുള്ള നാമനിർദ്ദേശങ്ങള്‍ക്ക് പുറമെ വ്യക്തികള്‍ക്ക് നേരിട്ട് അപേക്ഷിക്കാനും സൗകര്യമൊരുക്കിയിട്ടുണ്ട്. ഇതിലൂടെ ലോകമെമ്പാടുമുള്ള മത്സരാർത്ഥികള്‍ക്ക് അവരുടെ പാരായണ വീഡിയോകള്‍ നേരിട്ട് സമർപ്പിക്കാം.

ഫൈനല്‍ റൗണ്ടിലെത്തുന്നവരെ റമസാനില്‍ ദുബൈയിലെ പ്രധാന പള്ളികളില്‍ തറാവീഹ് പ്രാർത്ഥനകള്‍ക്ക് നേതൃത്വം നല്‍കാൻ ക്ഷണിക്കും. പൊതുജനങ്ങളുടെ വോട്ടിംഗിലൂടെയായിരിക്കും ലോകത്തിലെ ഏറ്റവും മനോഹരമായ ഖുർആൻ പാരായണം തിരഞ്ഞെടുക്കുന്നത്. അവാർഡ് വെബ്സൈറ്റായ quran.gov.ae വഴി 2026 ഓഗസ്റ്റ് 15 വരെ രജിസ്റ്റർ ചെയ്യാം.

കഴിഞ്ഞ 28 പതിപ്പുകളിലായി 123 രാജ്യങ്ങളില്‍ നിന്നായി 7,826 പേർ പങ്കെടുത്തു. 67 ദശലക്ഷത്തിലധികം ദിർഹം സമ്മാനമായി നല്‍കിയ അവാർഡ്, 24 വ്യക്തികളെയും മൂന്ന് സ്ഥാപനങ്ങളെയും ഗ്ലോബല്‍ ഖുർആനിക് പേഴ്സണാലിറ്റി ഓഫ് ദി ഇയർ നല്‍കി ആദരിച്ചിട്ടുണ്ട്.

Content Highlights

The 29th Dubai International Holy Quran Award received over 12,000 entries from 120 countries within two weeks. Featuring a prize pool exceeding AED 12 million, registration remains open until August 15, 2026.