കെ എസ് ആർ ടി സി പ്രിയദർശിനി ബസ് യാത്രാസൗജന്യ പദ്ധതിയെയും അത് ഉപയോഗപ്പെടുത്തുന്ന സ്ത്രീകളെയും അവഹേളിക്കുന്ന രീതിയിലുള്ള ഗതാഗത മന്ത്രിയുടെ പരാമർശത്തിനെതിരെ രൂക്ഷമായ വിമർശനമാണ് ഉയരുന്നത്.

കേരള ബസ് ട്രാൻസ്പോർട്ട് അസോസിയേഷൻ സംസ്ഥാന സമ്മേളനം പാലക്കാട് ഉദ്ഘാടനം ചെയ്തുകൊണ്ട് സംസാരിക്കവെയായിരുന്നു മന്ത്രിയുടെ വിവാദ പരാമർശം. കാശു വേണ്ടാത്ത കെ എസ് ആർ ടി സി ബസ്സില്‍ സ്ത്രീകള്‍ തള്ളിക്കയറുകയാണ്. എന്നാല്‍ മക്കളെ ഫീസ് നല്‍കേണ്ട സ്വകാര്യ സ്കൂളുകളില്‍ ചേർക്കും. അസുഖം വരുമ്പോള്‍ സ്വകാര്യ ആശുപത്രികളില്‍ പോകാതെ ഭർത്താവിനെയും അച്ഛനെയും കൊണ്ടുപോയി സർക്കാർ ആശുപത്രി വരാന്തയില്‍ കിടത്തും. കേരളത്തിലെ ജനങ്ങളുടെ പെരുമാറ്റം തന്നെ അതിശയിപ്പിക്കുകയാണെന്നും മന്ത്രി പറഞ്ഞു. സദസ്സില്‍ നിന്നുള്ള കൈയടികള്‍ക്കിടയിലായിരുന്നു മന്ത്രിയുടെ ഈ പരാമർശം.

യു ഡി എഫ് സർക്കാറിന്റെ പ്രധാന വാഗ്ദാനങ്ങളിലൊന്നായ പ്രിയദർശിനി യാത്രാസൗജന്യ പദ്ധതി ഉപയോഗപ്പെടുത്തുന്ന സ്ത്രീകളെ മന്ത്രി മോശമായി ചിത്രീകരിച്ചുവെന്നാണ് പ്രധാന വിമർശനം. സർക്കാർ ആനുകൂല്യം നല്‍കുന്നത് ഔദാര്യമാണെന്ന രീതിയിലാണ് മന്ത്രി സംസാരിച്ചതെന്നും സ്ത്രീവിരുദ്ധത നിറഞ്ഞ ഇത്തരം പരാമർശങ്ങള്‍ ഒരു ജനപ്രതിനിധിയില്‍ നിന്നും ഉണ്ടാകാൻ പാടില്ലാത്തതാണെന്നും വിവിധ കേന്ദ്രങ്ങളില്‍ നിന്ന് വിമർശനമുയർന്നു. പ്രസ്താവനയില്‍ മന്ത്രി പൊതുജനമധ്യത്തില്‍ മാപ്പ് പറയണമെന്ന ആവശ്യവും ശക്തമായിട്ടുണ്ട്.

Content Highlights:
Kerala Transport Minister CP John triggered a major controversy during a speech in Palakkad by stating that women crowd into free KSRTC buses while spending on private schooling and using government hospital verandas. His remarks faced widespread backlash for insulting women and the free travel scheme.