ജീവിത പാഠങ്ങളുടെ രണ്ടാം ഭാഗമായി പുറത്തിറങ്ങുന്ന ഈ പുസ്തകത്തില്‍ സഹോദരങ്ങള്‍, മക്കള്‍, പേരക്കുട്ടികള്‍, സഹപ്രവർത്തകർ, യു എ ഇ ജനത എന്നിവർക്കായുള്ള ഹൃദയസ്പർശിയായ സന്ദേശങ്ങളാണുള്ളത്.

പ്രസിഡന്റ്ശൈഖ് മുഹമ്മദ് ബിൻ സായിദ് അല്‍ നഹ്്യാനെ അഭിസംബോധന ചെയ്തുകൊണ്ടുള്ള ദീർഘമായ തുറന്ന കത്തോടെയാണ് പുസ്തകം ആരംഭിക്കുന്നത്. "എന്റെ സഹോദരൻ, സുഹൃത്ത്, ഒരുമിച്ചുള്ള യാത്രയിലെ സഹയാത്രികൻ' എന്നാണ് ശൈഖ് മുഹമ്മദ് ബിൻ സായിദിനെ അദ്ദേഹം വിശേഷിപ്പിച്ചത്. മനുഷ്യരുടെ ജീവിതം രാജ്യത്തിന്റെ വലിയ ചരിത്രത്തിന്റെ ഭാഗമാണെന്നും വരുംതലമുറകള്‍ക്കായി മൂല്യമുള്ള എന്തെങ്കിലും ബാക്കിവെക്കുക എന്നത് ഓരോ തലമുറയുടെയും കടമയാണെന്നും പുസ്തകം പുറത്തിറക്കികൊണ്ട് ശൈഖ് മുഹമ്മദ് ഓർമിപ്പിച്ചു.

നഗരങ്ങളും വാനോളം ഉയർന്ന കെട്ടിടങ്ങളും നിർമിക്കാം, എന്നാല്‍ അതിനേക്കാളൊക്കെ പ്രധാനപ്പെട്ടത് എല്ലാവരെയും ഒന്നിപ്പിക്കുന്ന സ്ഥിരത കാത്തുസൂക്ഷിക്കുന്ന, തലമുറകളെ പ്രചോദിപ്പിക്കുന്ന രാജ്യത്തിന്റെ ആത്മാവാണെന്നും ഇന്ന് ആ ആത്മാവ് താങ്കളാണെന്നും ശൈഖ് മുഹമ്മദ് ബിൻ സായിദിനുള്ള കത്തില്‍ അദ്ദേഹം കുറിച്ചു. രാജ്യത്തിന്റെ അതിരുകള്‍ കാക്കുന്നതിലും സുരക്ഷിതമായി മുന്നോട്ട് നയിക്കുന്നതിലും ജനങ്ങള്‍ ഒരൊറ്റ ഹൃദയത്തോടെയും ആവേശത്തോടെയും താങ്കള്‍ക്ക് പിന്നില്‍ അണിനിരക്കുന്നുവെന്നും അദ്ദേഹം കൂട്ടിച്ചേർത്തു.

ഒരു കൊച്ചു പെണ്‍കുട്ടി രാഷ്ട്രീയം അറിയാതെ, സാമ്പത്തിക സങ്കീർണതകള്‍ അറിയാതെ തികഞ്ഞ സുരക്ഷിതത്വത്തോടെ സ്‌കൂളിലേക്ക് പോവുകയും രാജ്യത്തിന്റെ പുരോഗതിയില്‍ അഭിമാനം കൊള്ളുകയും ചെയ്യുമ്പോള്‍ താങ്കള്‍ ഏല്‍പ്പിച്ച ഉത്തരവാദിത്തം പൂർണമായി നിറവേറ്റിയെന്ന് വ്യക്തമാകുന്നു. സ്‌കൂള്‍ കുട്ടികളുടെ മനസ്സില്‍ സുരക്ഷിതത്വവും ശുഭാപ്തിവിശ്വാസവും വളർത്താൻ സാധിച്ചതാണ് ഏറ്റവും വലിയ നേട്ടങ്ങളിലൊന്ന്.

ഭരണാധികാരിയില്‍ നിന്ന് ലഭിച്ച മഹത്തായ രാജ്യത്തെ കേവലം നിലനിർത്തുക മാത്രമല്ല, സമ്പദ്്വ്യവസ്ഥയെ വൈവിധ്യവത്കരിക്കാനും വിദ്യാഭ്യാസത്തെ പരമോന്നത ദേശീയ മുൻഗണനയാക്കി മാറ്റാനും ഭാവി തലമുറകള്‍ക്കായി ശക്തമായ സാമ്പത്തിക അടിത്തറ പാകാനും താങ്കള്‍ക്ക് സാധിച്ചു. ആഡംബരങ്ങളല്ല, മറിച്ച്‌ അച്ചടക്കവും കഠിനാധ്വാനവുമാണ് രാഷ്ട്രനിർമാണത്തിന് ആവശ്യമെന്ന് യുവതലമുറയെ ബോധ്യപ്പെടുത്തിയെന്നും ചരിത്രം സുവർണ ലിപികളില്‍ രേഖപ്പെടുത്തുന്ന ഈ പ്രയാണത്തില്‍ രാജ്യം മുഴുവൻ താങ്കള്‍ക്കൊപ്പം അടിയുറച്ചുനില്‍ക്കുമെന്നും ശൈഖ് മുഹമ്മദ് ബിൻ റാശിദ് കത്തില്‍ വ്യക്തമാക്കുന്നു.

Content Highlights:
Sheikh Mohammed bin Rashid Al Maktoum released his new book titled The Messages. Marking 60 years of public service, it contains personal notes to family, colleagues, and UAE citizens. The book opens with an inspiring open letter to UAE President Sheikh Mohamed bin Zayed Al Nahyan.