ദോഹ: ഖത്തറില് കോവിഡ് ദുരിതബാധിതര്ക്ക് സഹായമെത്തിക്കാന് ഓടിനടന്നിരുന്ന തലശ്ശേരി സ്വദേശി അബ്ദുല് റഹീം (47) ഒടുവില് കോവിഡിന് കീഴടങ്ങി. സാമൂഹിക പ്രവര്ത്തകനായിരുന്ന റഹീം ഐസൊലേഷന് കേന്ദ്രത്തിലാണ് കഴിഞ്ഞ ദിവസം മരിച്ചത്.
സന്നദ്ധ സേവന രംഗങ്ങളില് കര്മ നിരതനായിരുന്നു ഇന്കാസ് തലശേരി മണ്ഡലം പ്രസിഡന്റായിരുന്നു കതിരൂര് സ്വദേശി അബ്ദുറഹീം എടത്തില്. കോവിഡ് രോഗികള്ക്കു വേണ്ടിയും രോഗ വ്യാപനമുണ്ടാക്കിയ കഷ്ടപ്പാട് അനുഭവിക്കേണ്ടി വന്നവര്ക്കുമായി ഖത്തറിലെ വിവിധ സ്ഥലങ്ങളില് ഓടി നടന്ന് പ്രവര്ത്തിച്ച വ്യക്തിത്വമായിരുന്നു. കോവിഡ് ബാധിച്ച് ബിന്മഹ്മൂദില് സര്ക്കാര് ക്വാറന്റീന് കേന്ദ്രത്തിലായിരുന്നു.
'കോവിഡ് ദുരിതം ശക്തമായപ്പോള് ഭക്ഷണമില്ലാതെ കഷ്ടപ്പെട്ടവര്ക്കും ജോലിയില്ലാത്തവര്ക്കും അത്താണിയായി പ്രവര്ത്തിച്ചയാളാണ് റഹീം. സാധനങ്ങള് പാക്ക് ചെയ്യുന്നതു മുതല് വിതരണത്തിനു വരെ സജീവമായിരുന്നു.' ഇന്കാസ് സെന്ട്രല് കമ്മിറ്റി പ്രസിഡന്റ് സമീര് ഏറാമല പറഞ്ഞു.
അതേസമയം, മൃതദേഹം കൊവിഡ് പ്രോട്ടോക്കോള് പാലിച്ച് ദോഹയില് ഖബറടക്കുമെന്ന് നടപടികള് നേതൃത്വം നല്കുന്ന ഖത്തര് കെഎംസിസി മയ്യിത്ത് പരിപാലന കമ്മിറ്റി അറിയിച്ചു.
വിവിധ കര്മ മേഖലകളില് സജീവസാന്നിധ്യമായിരുന്ന അബ്ദുറഹീമിന്റെ വിയോഗത്തില് കുടുബാംഗങ്ങള്ക്കൊപ്പം ദുഖത്തില് പങ്കുചേരുന്നതായി ഇന്കാസ് സെന്ട്രല് കമ്മിറ്റി, കണ്ണൂര് ജില്ലാകമ്മിറ്റി, തലശേരി മണ്ഡലം കമ്മിറ്റി ഭാരവാഹികള് അനുശോചന സന്ദേശത്തില് പറഞ്ഞു.