2026 ലെ ലോകകപ്പ് ആരംഭിക്കുമ്പോള്‍ മെക്സിക്കോയുടെ കൗമാര വിസ്മയം ഗില്‍ബെർട്ടോ മോറയ്ക്ക് 17 വയസ്സും 240 ദിവസവും മാത്രമായിരിക്കും പ്രായം. ഇതോടെ ഈ ലോകകപ്പിലെ ഏറ്റവും പ്രായം കുറഞ്ഞ താരമെന്ന റെക്കോർഡ് ടിജുവാനയുടെ ഈ മിഡ്ഫീല്‍ഡർ സ്വന്തമാക്കി കഴിഞ്ഞു. ടൂർണമെന്റിലെ ഏറ്റവും പ്രായം കൂടിയ താരമായ സ്കോട്ട്ലൻഡ് ഗോള്‍കീപ്പർ ക്രെയ്ഗ് ഗോർഡനെക്കാള്‍ (43 വയസ്സ്) 26 വയസ്സ് ഇളയതാണ് ഈ മെക്സിക്കൻ താരം!

ഫിഫ പ്രസിദ്ധീകരിച്ച 48 ടീമുകളുടെ ഔദ്യോഗിക ലിസ്റ്റ് പ്രകാരം ഇത്തവണ 22 കൗമാരക്കാരാണ് ലോകകപ്പ് വേദിയില്‍ അണിനിരക്കുന്നത്. ആകെ പങ്കെടുക്കുന്ന 1,248 കളിക്കാരില്‍ 891 പേരും ലോകകപ്പില്‍ ആദ്യമായി ബൂട്ട് കെട്ടുന്നവരാണ്. 357 പേർക്ക് മുൻപ് ലോകകപ്പ് കളിച്ച പരിചയമുണ്ട്.

പെലെയും എംബാപ്പെയും നടന്ന വഴിയിലൂടെ കൗമാരപ്പട

ലോകകപ്പിന്റെ ചരിത്രത്തില്‍ കൗമാരപ്രായത്തില്‍ വന്ന് അത്ഭുതങ്ങള്‍ സൃഷ്ടിച്ച പെലെ (1958-ല്‍ 17-ാം വയസ്സില്‍ ബ്രസീലിനെ കിരീടത്തിലേക്ക് നയിച്ചു), കൈലിയൻ എംബാപ്പെ (2018-ല്‍ 19-ാം വയസ്സില്‍ ഫ്രാൻസിന് ലോകകപ്പ് നേടിക്കൊടുത്തു), മൈക്കല്‍ ഓവൻ (1998-ല്‍ 18-ാം വയസ്സില്‍ ഇംഗ്ലണ്ടിനായി തിളങ്ങി) എന്നിവരുടെ നിരയിലേക്കാണ് ഗില്‍ബെർട്ടോ മോറയും നടന്നു കയറുന്നത്.

ഇത്തവണ മോറയ്ക്ക് പുറമേ ലോക ഫുട്ബോളിലെ വൻ തോക്കുകളായ ബാഴ്സലോണയുടെ സ്പാനിഷ് താരങ്ങളായ ലാമിൻ യമല്‍ (18), പൗ കുബാർസി (19), ജർമ്മനിയുടെ ലെന്നാർട്ട് കാള്‍ (18-ബയേണ്‍ മ്യൂണിക്) എന്നിവരും കൗമാരക്കാരുടെ പട്ടികയിലുണ്ട്. കൂടാതെ ഫ്രാൻസിന്റെ വാറൻ സെയ്ർ-എമറി (20), ഡെസിറെ ഡൗ (21-പിഎസ്ജി), ഇംഗ്ലണ്ടിന്റെ നിക്കോ ഒ'റെയ്ലി (21-മാഞ്ചസ്റ്റർ സിറ്റി), തുർക്കിയുടെ അർഡ ഗുലർ (21-റയല്‍ മാഡ്രിഡ്), അർജന്റീനയുടെ നിക്കോ പാസ് (21-കോമോ) എന്നിവരും കന്നി ലോകകപ്പ് കളിക്കാൻ ഒരുങ്ങുകയാണ്.

മെക്സിക്കോയുടെ അത്ഭുതബാലൻ

വർഷങ്ങളായി മെക്സിക്കോ വളർത്തിയെടുക്കുന്ന ഏറ്റവും വലിയ പ്രതിഭയാണ് ഗില്‍ബെർട്ടോ മോറ. 15-ാം വയസ്സില്‍ മെക്സിക്കൻ ലീഗില്‍ അരങ്ങേറുകയും ഗോള്‍ നേടുകയും ചെയ്ത ഏറ്റവും പ്രായം കുറഞ്ഞ താരമാണ് മോറ. 16-ാം വയസ്സില്‍ മെക്സിക്കോയുടെ സീനിയർ ദേശീയ ടീമിലെത്തി. 2025-ല്‍ മെക്സിക്കോ ഗോള്‍ഡ് കപ്പ് നേടുമ്പോള്‍ മോറ ടീമിലുണ്ടായിരുന്നു. നിലവില്‍ റയല്‍ മാഡ്രിഡ്, ബാഴ്സലോണ, പ്രീമിയർ ലീഗ് ക്ലബ്ബുകള്‍ എന്നിവർ ഈ 17-കാരന് പിന്നാലെയുണ്ട്.

ബ്രസീലിന്റെ 19-കാരൻ സ്ട്രൈക്കർ എൻഡ്രിക് (ലിയോണ്‍), ഐവറി കോസ്റ്റിന്റെ യാൻ ഡിയോമാണ്ടെ (19), ചെല്‍സി സ്വന്തമാക്കിയ ഇക്വഡോറിന്റെ കെൻഡ്രി പയസ് (19), ആഫ്രിക്കൻ നേഷൻസ് കപ്പില്‍ തിളങ്ങിയ സെനഗലിന്റെ ഇബ്രാഹിം എംബയേ (18) എന്നിവരാണ് ഈ ലോകകപ്പില്‍ ഉറ്റുനോക്കപ്പെടുന്ന മറ്റ് യുവതാരങ്ങള്‍.

വയോധികരുടെ നിരയില്‍ ഗോർഡനും റൊണാള്‍ഡോയും; ചരിത്രത്തിലേക്ക് ക്വിറോസ്

ഈ ലോകകപ്പിലെ ഏറ്റവും പ്രായം കൂടിയ കളിക്കാരൻ 43 വയസ്സും 162 ദിവസവും പ്രായമുള്ള സ്കോട്ട്ലൻഡ് ഗോള്‍കീപ്പർ ക്രെയ്ഗ് ഗോർഡൻ ആണ്. ടൂർണമെന്റില്‍ 40 വയസ്സിന് മുകളില്‍ പ്രായമുള്ള ഏഴ് കളിക്കാരാണുള്ളത്. അതില്‍ പ്രധാനി പോർച്ചുഗലിന്റെ ഇതിഹാസ നായകൻ 41 കാരനായ ക്രിസ്റ്റ്യാനോ റൊണാള്‍ഡോയാണ്. റൊണാള്‍ഡോയുടെ ആറാമത്തെ ലോകകപ്പാണിത്.

അതേസമയം, കളിക്കാർക്ക് പുറമേ പരിശീലകരുടെ നിരയിലും ഒരു വലിയ റെക്കോർഡ് പിറക്കുന്നുണ്ട്. ഘാനയുടെ പോർച്ചുഗീസ് പരിശീലകനായ കാർലോസ് ക്വിറോസ് (73) തുടർച്ചയായി അഞ്ച് ലോകകപ്പുകളില്‍ പങ്കെടുക്കുന്ന ചരിത്രത്തിലെ രണ്ടാമത്തെ പരിശീലകനാകും. മുൻപ് ബോറ മിലുട്ടിനോവിച്ച്‌ മാത്രമാണ് ഈ നേട്ടം കൈവരിച്ചിട്ടുള്ളത്. മുൻ മാഞ്ചസ്റ്റർ യുണൈറ്റഡ് മാനേജർ കൂടിയായ ക്വിറോസ് 2010 ല്‍ പോർച്ചുഗലിനെയും 2014, 2018, 2022 വർഷങ്ങളില്‍ ഇറാനെയും ലോകകപ്പില്‍ നയിച്ചിട്ടുണ്ട്.