ഇറാന് മേല്‍ ചുമത്തിയിട്ടുള്ള നാവിക ഉപരോധം ഉടൻ പിൻവലിക്കുമെന്ന് യുഎസ് പ്രസിഡന്റ് ഡോണള്‍ഡ് ട്രംപ് പ്രഖ്യാപിച്ചു. ഇതോടെ ഹോർമുസ് കടലിടുക്കില്‍ കുടുങ്ങിക്കിടക്കുന്ന അന്താരാഷ്ട്ര കപ്പലുകള്‍ക്ക് യാത്ര തുടരാനാകും.

എന്നാല്‍, കരാർ നടപ്പാക്കുന്നതില്‍ ഇരുരാജ്യങ്ങളും തമ്മില്‍ ഇപ്പോഴും കടുത്ത ഭിന്നത നിലനില്‍ക്കുന്നുണ്ടെന്നാണ് പുറത്തുവരുന്ന സൂചനകള്‍.

അമേരിക്കയുടെ നിബന്ധനകള്‍

ഹോർമുസ് കടലിടുക്കില്‍ സ്ഥാപിച്ചിട്ടുള്ള കടല്‍ മൈനുകള്‍ അടിയന്തരമായി നീക്കം ചെയ്യാനുള്ള ഉത്തരവാദിത്വം ഇറാൻ ഏറ്റെടുക്കണം.

യാതൊരുവിധ ഫീസോ തടസ്സങ്ങളോ ഇല്ലാതെ ഹോർമുസ് കടലിടുക്കിലൂടെയുള്ള കപ്പല്‍ ഗതാഗതം പൂർണ്ണമായും പുനഃസ്ഥാപിക്കണം.

ഇറാൻ ഒരിക്കലും ആണവായുധം നിർമ്മിക്കില്ലെന്ന് ഔദ്യോഗികമായി സമ്മതിക്കണം.

ധാരണാപത്രത്തില്‍ അന്തിമ തീരുമാനമെടുക്കുന്നതിനായി ഇന്ന് വൈറ്റ് ഹൗസില്‍ പ്രത്യേക യോഗം ചേരുമെന്നും ട്രംപ് വ്യക്തമാക്കിയിട്ടുണ്ട്.

ട്രംപിന്റേത് 'വ്യാജ അവകാശവാദം'; ഒത്തുതീർപ്പില്ലെന്ന് ഇറാൻ

അതേസമയം, ധാരണാപത്രത്തില്‍ ഇല്ലാത്ത കാര്യങ്ങള്‍ വിളിച്ചുപറഞ്ഞ് യുഎസ് പ്രസിഡന്റ് കൃത്രിമ വിജയം അവകാശപ്പെടാൻ ശ്രമിക്കുകയാണെന്ന് ഇറാൻ ആരോപിച്ചു. ആണവ ഉല്‍പന്നങ്ങള്‍ പൂർണ്ണമായി നശിപ്പിക്കുമെന്ന് കരാറില്‍ ഒരിടത്തും പറഞ്ഞിട്ടില്ലെന്ന് ഇറാൻ ഉദ്യോഗസ്ഥരെ ഉദ്ധരിച്ച്‌ ഫാർസ് ന്യൂസ് ഏജൻസി റിപ്പോർട്ട് ചെയ്തു.

"ലബനാനിലെ പൂർണ്ണമായ യുദ്ധവിരാമം, അമേരിക്ക തടഞ്ഞുവെച്ചിരിക്കുന്ന 12 ബില്യണ്‍ ഡോളറിന്റെ ഇറാനിയൻ സ്വത്തുക്കള്‍ വിട്ടുനല്‍കല്‍ എന്നിവയാണ് നിലവിലെ ധാരണാപത്രത്തിലുള്ളത്. ഇതില്‍ മാറ്റം വരുത്താൻ അനുവദിക്കില്ല." എന്ന് ഇറാൻ വ്യക്തമാക്കി.

ധാരണാപത്രത്തില്‍ വ്യക്തമാക്കിയ കാര്യങ്ങള്‍ കൃത്യമായി നടപ്പാക്കിയില്ലെങ്കില്‍ അമേരിക്കയുമായുള്ള തുടർചർച്ചകളില്‍ നിന്ന് പിന്മാറുമെന്നും ഇറാൻ മുന്നറിയിപ്പ് നല്‍കിയിട്ടുണ്ട്.

പ്രവർത്തനങ്ങളിലാണ് വിശ്വാസം: ഇറാൻ പാർലമെന്റ് സ്പീക്കർ

അമേരിക്കയുടെ വാഗ്ദാനങ്ങളിലോ വാക്കുകളിലോ തങ്ങള്‍ക്ക് ലേശവും വിശ്വാസമില്ലെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഖിർ ഖാലിബാഫ് തുറന്നടിച്ചു. അമേരിക്കയുടെ ഭാഗത്തുനിന്നുള്ള പ്രായോഗിക നടപടികളാണ് ഇറാന് വേണ്ടത്.

"ഏതൊരു കരാറിലെയും യഥാർത്ഥ വിജയി എന്നത്, ആ കരാറിന് തൊട്ടുപിന്നാലെ ഉണ്ടായേക്കാവുന്ന ഒരു യുദ്ധത്തിനായി ഏറ്റവും കൂടുതല്‍ സജ്ജമായിരിക്കുന്നവരാണ്," എന്നും അദ്ദേഹം കൂട്ടിച്ചേർത്തു. കരാറിന് ശേഷവും അമേരിക്കയെ വിശ്വസിക്കാതെ സൈനിക സജ്ജീകരണങ്ങളുമായി മുന്നോട്ടുപോകുമെന്ന സൂചനയാണ് ഇറാൻ നല്‍കുന്നത്.

Reports indicate that Iran and the United States are on the verge of signing a crucial memorandum of understanding, offering a temporary breather to Middle East tensions.