കോർണല്: പ്രപഞ്ചത്തില് മനുഷ്യൻ ഒറ്റയ്ക്കാണോ എന്ന കാലങ്ങളായുള്ള ചോദ്യത്തിന് ഉത്തരം തേടിയുള്ള യാത്രയില് നിർണ്ണായകമായ ഒരു നാഴികക്കല്ല് കൂടി പിന്നിട്ടിരിക്കുകയാണ് ശാസ്ത്രലോകം.
നമ്മുടെ സൗരയൂഥത്തിന് പുറത്ത് ഭൂമിക്ക് സമാനമായ സാഹചര്യങ്ങളുള്ള 45 ഗ്രഹങ്ങളെ കോർണല് സർവ്വകലാശാലയിലെ കാള് സാഗൻ ഇൻസ്റ്റിറ്റ്യൂട്ടിലെ ഗവേഷകർ കണ്ടെത്തി. പ്രൊഫസർ ലിസ കാല്റ്റെനെഗറുടെ നേതൃത്വത്തിലുള്ള സംഘമാണ് ഈ വിപ്ലവാത്മകമായ പഠനത്തിന് പിന്നില്.
ആറായിരത്തിലധികം എക്സോപ്ലാനറ്റുകളെ (സൗരയൂഥത്തിന് പുറത്തുള്ള ഗ്രഹങ്ങള്) സൂക്ഷ്മമായി വിശകലനം ചെയ്ത ശേഷമാണ് ജീവന്റെ സാന്നിധ്യത്തിന് ഏറ്റവും സാധ്യതയുള്ള 45 എണ്ണത്തിനെ ഗവേഷകർ വേർതിരിച്ചെടുത്തത്.
കണ്ടെത്തല് ഇങ്ങനെ:
യൂറോപ്യൻ സ്പേസ് ഏജൻസിയുടെ (ESA) 'ഗയ' (Gaia) ദൗത്യത്തില് നിന്നുള്ള വിവരങ്ങളും നാസയുടെ എക്സോപ്ലാനറ്റ് ആർക്കൈവുമാണ് പഠനത്തിനായി ഉപയോഗിച്ചത്. ഒരു ഗ്രഹം അതിന്റെ മാതൃനക്ഷത്രത്തില് നിന്ന് എത്രത്തോളം അകലെയാണ് എന്നതിനെ അടിസ്ഥാനമാക്കിയാണ് 'ഹാബിറ്റബിള് സോണ്' അഥവാ ജീവയോഗ്യമായ മേഖല നിശ്ചയിക്കുന്നത്.
- ദ്രവജലം: ഗ്രഹോപരിതലത്തില് വെള്ളം ദ്രാവകാവസ്ഥയില് നിലനില്ക്കാൻ ആവശ്യമായ താപം ലഭിക്കുന്ന മേഖലയാണിത്.
- മാനദണ്ഡം: ഭൂമിയുമായി താരതമ്യം ചെയ്യുമ്ബോള്, വിപുലമായ ഹാബിറ്റബിള് സോണില് 45 ഗ്രഹങ്ങളും, അതീവ കർശനമായ മാനദണ്ഡങ്ങള് പാലിക്കുന്ന 24 ഗ്രഹങ്ങളും കണ്ടെത്താനായി.
ശ്രദ്ധേയമായ ഗ്രഹങ്ങള്:
ഭൂമിയില് നിന്ന് ഏകദേശം 40 പ്രകാശവർഷം അകലെയുള്ള TRAPPIST-1 എന്ന നക്ഷത്രസമൂഹമാണ് ഗവേഷകരുടെ പ്രധാന ശ്രദ്ധാകേന്ദ്രം. ഇതിലെ ഏഴ് ഗ്രഹങ്ങളില് പലതും ജീവനെ പിന്തുണയ്ക്കാൻ പ്രാപ്തിയുള്ളവയാണെന്ന് കരുതപ്പെടുന്നു.
- TOI-715 b: ഇതൊരു 'സൂപ്പർ എർത്ത്' (ഭൂമിയേക്കാള് വലിപ്പമുള്ള ഗ്രഹം) വിഭാഗത്തില്പ്പെടുന്നതാണ്. ഇതില് ജീവന്റെ അടയാളങ്ങള് ഉണ്ടോ എന്ന് ശാസ്ത്രജ്ഞർ സൂക്ഷ്മമായി നിരീക്ഷിക്കുന്നു.
- മറ്റ് ഗ്രഹങ്ങള്: പ്രോക്സിമ സെഞ്ച്വറി ബി (Proxima Centauri b), LHS 1140 b, TRAPPIST-1 e എന്നിവയാണ് ലിസ്റ്റിലെ മറ്റ് പ്രധാനികള്.
"ഒരു ഗ്രഹത്തെ കണ്ടെത്തുന്നത് പോലെ എളുപ്പമല്ല അത് ജീവയോഗ്യമാണോ എന്ന് തിരിച്ചറിയുന്നത്. ലഭിക്കുന്ന ഊർജ്ജത്തിന്റെ അളവും അന്തരീക്ഷ സാഹചര്യങ്ങളും ഇതില് നിർണ്ണായകമാണ്," എന്ന് ഗവേഷക സംഘത്തിലെ ഗില്ലിസ് ലൗറി വ്യക്തമാക്കി.
ജെയിംസ് വെബ് ദൂരദർശിനി ഉള്പ്പെടെയുള്ള ആധുനിക സംവിധാനങ്ങള് ഉപയോഗിച്ച് ഈ ഗ്രഹങ്ങളുടെ അന്തരീക്ഷത്തെക്കുറിച്ച് കൂടുതല് പഠിക്കാനൊരുങ്ങുകയാണ് നാസയും മറ്റ് ബഹിരാകാശ ഏജൻസികളും. വിദൂര ഭാവിയില് മനുഷ്യന് കുടിയേറാൻ കഴിയുന്ന മറ്റൊരു 'ഭൂമി' ഈ 45 എണ്ണത്തില് ഒന്നായിരിക്കുമെന്ന പ്രതീക്ഷയിലാണ് ശാസ്ത്രലോകം.