ദുബൈ: മജാൻ മേഖലയിലുണ്ടായ ഗുരുതര അപകടത്തില്‍ മോട്ടോർസൈക്കിള്‍ യാത്രികന് പരുക്കേറ്റു. ഇതിനെ തുടർന്ന്, റോഡില്‍ വിപരീത ദിശയില്‍ വാഹനം ഓടിക്കുന്നതിനെതിരെ ഡ്രൈവർമാർക്കും മോട്ടോർസൈക്കിള്‍ യാത്രികർക്കും ദുബൈ പൊലിസ് മുന്നറിയിപ്പ് നല്‍കി.

മോട്ടോർസൈക്കിള്‍ യാത്രികൻ തെറ്റായ ദിശയിലൂടെ സഞ്ചരിച്ചതിനെ തുടർന്ന് മജാനിലെ ഒരു പ്രാദേശിക റോഡില്‍ മോട്ടോർസൈക്കിളും മറ്റൊരു വാഹനവും തമ്മില്‍ കൂട്ടിയിടിക്കുകയായിരുന്നുവെന്ന് ദുബൈ പൊലിസ് അറിയിച്ചു. അപകടത്തില്‍ മോട്ടോർസൈക്കിള്‍ യാത്രികന് ഗുരുതരമായി പരുക്കേറ്റു. തുടർന്ന് അദ്ദേഹത്തെ ചികിത്സയ്ക്കായി ആശുപത്രിയിലേക്ക് മാറ്റിയതായും അധികൃതർ വ്യക്തമാക്കി.

ദുബൈ പൊലിസിലെ ജനറല്‍ ഡിപ്പാർട്ട്മെന്റ് ഓഫ് ട്രാഫിക് ഡയറക്ടർ ബ്രിഗേഡിയർ ജുമാ സലേം ബിൻ സുവൈദാൻ പറഞ്ഞു. റോഡില്‍ ദിശ തെറ്റിച്ച്‌ വാഹനമോടിക്കുന്നത് റോഡ് ഉപയോക്താക്കള്‍ക്ക് വലിയ ഭീഷണിയാണ് ഉയർത്തുന്നത്. കൂടാതെ മാരകമായ അപകടങ്ങളുടെ പ്രധാന കാരണങ്ങളിലൊന്നുമാണിത്.

സംഭവത്തെക്കുറിച്ച്‌ അധികൃതർക്ക് റിപ്പോർട്ട് ലഭിച്ചതിനെത്തുടർന്ന് ട്രാഫിക് പട്രോളിംഗ് സംഘവും ആംബുലൻസ് ടീമുകളും ഉടൻ സ്ഥലത്തേക്ക് അയച്ചതായും അദ്ദേഹം പറഞ്ഞു. തെറ്റായ വഴിയിലൂടെ വാഹനമോടിക്കുന്നത് ഗുരുതരമായ അപകടങ്ങളുണ്ടാകാനുള്ള സാധ്യത വർദ്ധിപ്പിക്കുമെന്നും വാഹനമോടിക്കുന്നവരെയും കാല്‍നടയാത്രക്കാരെയും അപകടത്തിലാക്കുമെന്നും ഗതാഗതം തടസ്സപ്പെടുത്തുമെന്നും ഗുരുതരമായ നാശത്തിനും ജീവഹാനിക്കും കാരണമാകുമെന്നും ദുബൈ പൊലിസ് ചൂണ്ടിക്കാട്ടി.

എല്ലാ റോഡ് ഉപയോക്താക്കളും നിയുക്ത പാതകളില്‍ തന്നെ തുടരണമെന്നും അവരുടെയും മറ്റുള്ളവരുടെയും സുരക്ഷ ഉറപ്പാക്കാൻ ഗതാഗത നിയമങ്ങള്‍ പാലിക്കണമെന്നും ബ്രിഗേഡിയർ ബിൻ സുവൈദാൻ അഭ്യർത്ഥിച്ചു. ഗതാഗതം തടസ്സപ്പെടുത്തുന്ന തരത്തില്‍ വാഹനമോടിക്കുന്നവർക്ക് 600 ദിർഹം പിഴയും നാല് ബ്ലാക്ക് പോയിന്റുകളും ചുമത്തുമെന്നും ഏഴ് ദിവസം വാഹനം കണ്ടുകെട്ടുമെന്നും അദ്ദേഹം മുന്നറിയിപ്പ് നല്‍കി.

ഗതാഗതം തടസ്സപ്പെടുത്തിയതിന് ഗതാഗത നിയമത്തിലെ ആർട്ടിക്കിള്‍ 98 പ്രകാരം കുറ്റവാളികള്‍ക്ക് 500 ദിർഹം കൂടി പിഴ ചുമത്താം. അത്തരം അപകടകരമായ പെരുമാറ്റം എല്ലാ റോഡ് ഉപയോക്താക്കള്‍ക്കും മനുഷ്യജീവനും സ്വത്ത് നാശവും ഉള്‍പ്പെടെ ഗുരുതരമായ പ്രത്യാഘാതങ്ങള്‍ ഉണ്ടാക്കുമെന്ന് ബ്രിഗേഡിയർ ബിൻ സുവൈദാൻ വ്യക്തമാക്കി. അപകടകരമായ ഡ്രൈവിംഗ് പ്രവണതകള്‍ കുറയ്ക്കുന്നതിനായി ദുബൈ പൊലിസ് ഗതാഗത ബോധവത്കരണ കാമ്പയിനുകള്‍ തുടരുമെന്നും റോഡ് സുരക്ഷ ശക്തിപ്പെടുത്തുന്നതിനും സമൂഹത്തിന്റെ ക്ഷേമം സംരക്ഷിക്കുന്നതിനുമുള്ള ശ്രമങ്ങളുടെ ഭാഗമായി നിയമലംഘകർക്കെതിരെ കർശന നിയമനടപടികള്‍ സ്വീകരിക്കുമെന്നും അദ്ദേഹം വ്യക്തമാക്കി.