കൊല്‍ക്കത്ത : പശ്ചിമ ബംഗാള്‍ നിയമസഭാ തിരഞ്ഞെടുപ്പിലേറ്റ ദയനീയമായ തോല്‍വിക്ക് പിന്നാലെ മുഖ്യമന്ത്രി മമത ബാനർജിയുടെ ഏകാധിപത്യ നിലപാടുകള്‍ക്കെതിരെ തൃണമൂല്‍ കോണ്‍ഗ്രസില്‍ ആഭ്യന്തര കലാഹം രൂക്ഷമാകുന്നു.
പാർട്ടിയിലെ ഭിന്നതയും വിമത നീക്കങ്ങളും അടിച്ചമർത്താനുള്ള മമതയുടെ തീവ്രശ്രമങ്ങളുടെ ഭാഗമായി പശ്ചിമ ബംഗാളിലെ എല്ലാ പാർട്ടി കമ്മിറ്റികളും പോഷക സംഘടനകളും അടിയന്തരമായി പിരിച്ചുവിട്ടതായി പാർട്ടി നേതൃത്വം അറിയിച്ചു. തോല്‍വിയുടെ ഉത്തരവാദിത്തം ഏറ്റെടുത്ത് സ്വയം ആത്മപരിശോധന നടത്തുന്നതിന് പകരം, താഴെത്തട്ടിലുള്ള കമ്മിറ്റികളെയും സംഘടനയെയും ബലികൊടുത്തുകൊണ്ട് സ്വന്തം അധികാരം നിലനിർത്താനാണ് മമത ബാനർജി ശ്രമിക്കുന്നതെന്ന കടുത്ത വിമർശനമാണ് രാഷ്ട്രീയ നിരീക്ഷകർ ഉയർത്തുന്നത്. പാർട്ടിയുടെ ചരിത്രത്തിലെ തന്നെ ഏറ്റവും വലിയ ഈ അഴിച്ചുപണി മമതയ്ക്ക് സംഘടനയിലുള്ള നിയന്ത്രണം പൂർണ്ണമായി നഷ്ടപ്പെടുന്നു എന്നതിന്റെ വ്യക്തമായ സൂചനയാണ്.
പാർട്ടിയില്‍ നിന്ന് പുറത്താക്കപ്പെട്ട മുതിർന്ന നേതാവും എം.എല്‍.എയുമായ ഋതബ്രത ബാനർജിയെ പിന്തുണച്ചുകൊണ്ട് 58 ടിഎംസി എംഎല്‍എമാർ നിയമസഭാ സ്പീക്കറെ സമീപിച്ചതാണ് മമതയെയും കൂട്ടരെയും പെട്ടെന്നുള്ള ഈ അപ്രതീക്ഷിത നടപടിക്ക് പ്രേരിപ്പിച്ചത്. ബുധനാഴ്ച, മമതയുടെ നേതൃത്വത്തോട് പരസ്യമായി ലഹള പ്രഖ്യാപിച്ച വിമത എംഎല്‍എമാർ സ്പീക്കറെ കാണുകയും ഋതബ്രത ബാനർജിയെ തങ്ങളുടെ നിയമസഭാ കക്ഷി നേതാവായി നാമനിർദ്ദേശം ചെയ്തുകൊണ്ട് കത്ത് നല്‍കുകയും ചെയ്തിരുന്നു. തനിക്കെതിരെ പാർട്ടിയില്‍ രൂപംകൊണ്ട ഈ വലിയ വിമത സഖ്യത്തെ നേരിടാൻ മറ്റ് വഴികളില്ലാതെ വന്നതോടെയാണ്, ജനാധിപത്യ മര്യാദകള്‍ പോലും ലംഘിച്ച്‌ സംസ്ഥാനത്തെ മുഴുവൻ സംഘടനാ സംവിധാനങ്ങളും റദ്ദാക്കാൻ മമത ബാനർജി തുനിഞ്ഞത്. തോല്‍വിക്ക് ശേഷം പാർട്ടിക്കുള്ളിലുണ്ടായ അഭിപ്രായവ്യത്യാസങ്ങള്‍ ചർച്ചകളിലൂടെ പരിഹരിക്കുന്നതില്‍ മമതയുടെ നേതൃത്വം പരാജയപ്പെട്ടുവെന്നാണ് ഇത് തെളിയിക്കുന്നത്.
സാമൂഹ മാദ്ധ്യമമായ 'എക്‌സി'ലൂടെ പങ്കുവെച്ച പ്രസ്താവനയിലൂടെയാണ് തൃണമൂല്‍ കോണ്‍ഗ്രസ് ഈ നിർണായക തീരുമാനം പുറത്തുവിട്ടത്. ശ്രദ്ധാപൂർവ്വമായ പരിഗണനയ്ക്ക് ശേഷം ഓള്‍ ഇന്ത്യ തൃണമൂല്‍ കോണ്‍ഗ്രസിന്റെ പശ്ചിമ ബംഗാളിലെ എല്ലാ കമ്മിറ്റികളും അടിയന്തരമായി പിരിച്ചുവിടുന്നു എന്ന് പറയുമ്പോഴും, ഈ കൂട്ടപ്പിരിച്ചുവിടലിന് പിന്നിലെ യഥാർത്ഥ കാരണങ്ങള്‍ വിശദീകരിക്കാൻ നേതൃത്വം തയ്യാറായിട്ടില്ല. എല്ലാ തലങ്ങളിലും സമഗ്രമായ പ്രകടന അവലോകനവും സംഘടനാപരമായ വിലയിരുത്തലും നടത്തിയ ശേഷമേ പുതിയ ഘടന പ്രഖ്യാപിക്കൂ എന്നാണ് പാർട്ടി അവകാശപ്പെടുന്നത്. എന്നാല്‍ പുതിയ ഊർജ്ജത്തോടെ ഭാവി വെല്ലുവിളികളെ നേരിടാനാണ് ഈ നീക്കമെന്ന് പ്രസ്താവനയില്‍ വ്യക്തമാക്കുമ്പോഴും, സമീപവർഷങ്ങളില്‍ മമത ബാനർജി നേരിടുന്ന ഏറ്റവും വലിയ ആഭ്യന്തര വെല്ലുവിളിയായാണ് ഇതിനെ രാഷ്ട്രീയ ലോകം കാണുന്നത്. തോല്‍വിയുടെ യഥാർത്ഥ കാരണങ്ങള്‍ കണ്ടെത്തി തിരുത്തുന്നതിന് പകരം ഇത്തരം ജനാധിപത്യവിരുദ്ധമായ അടിച്ചമർത്തലുകള്‍ പാർട്ടിയെ കൂടുതല്‍ തകർച്ചയിലേക്ക് മാത്രമേ നയിക്കൂ എന്നാണ് വിലയിരുത്തപ്പെടുന്നത്.