തിരുവനന്തപുരം:ഒരുകാലത്ത് കേരളത്തില് തന്നെ വലിയ ചർച്ചകള്ക്ക് വഴിവെച്ച നെയ്യാറ്റിൻകര ഗോപൻ സ്വാമിയുടെ മരണം ഒടുവില് മറ്റൊരു വഴിത്തിരിവിലേക്ക്.
കൊലപാതകമെന്ന സംശയം ഉയർത്തിയ മരണത്തില് ദുരൂഹതയില്ലെന്നാണ് പോലീസിന്റെ അന്തിമ കണ്ടെത്തല്. ഗോപൻ സ്വാമി മരിച്ചത് ഹൃദയാഘാതത്തെ തുടർന്നാണെന്നാണ് അന്തിമ റിപ്പോർട്ട്. ഇതോടെ മാസങ്ങളായി തുടരുന്ന അന്വേഷണത്തിനും കൊലപാതക സംശയങ്ങള്ക്കും പൊലീസ് ഔദ്യോഗികമായി വിരാമമിട്ടു.
നെയ്യാറ്റിൻകര കോടതിയില് അന്തിമ റിപ്പോർട്ട് സമർപ്പിച്ച പൊലീസ് കേസ് അവസാനിപ്പിക്കുകയും ചെയ്തു. ഗോപന്റേത് സ്വാഭാവിക മരണമാണോ, അതോ മരണത്തിന് പിന്നില് മറ്റെന്തെങ്കിലും കാരണമുണ്ടോ എന്ന സംശയമാണ് അന്വേഷണത്തിന്റെ തുടക്കത്തില് പ്രധാനമായും ഉയർന്നത്. എന്നാല് വിശദമായ അന്വേഷണത്തിനും ആന്തരിക അവയവങ്ങളുടെ പരിശോധന ഉള്പ്പെടെയുള്ള നടപടികള്ക്കും ശേഷം കൊലപാതക സാധ്യതയ്ക്ക് തെളിവുകളൊന്നും കണ്ടെത്താനായില്ലെന്നാണ് പോലീസ് വ്യക്തമാക്കുന്നത്.
2025 ജനുവരി ഒൻപതിനായിരുന്നു സംഭവങ്ങളുടെ തുടക്കം.'അച്ഛൻ സമാധിയായി' എന്ന് കാണിച്ച് മക്കള് വീടിന് സമീപം പോസ്റ്റർ പതിച്ചതോടെയാണ് പ്രദേശവാസികള്ക്കിടയില് സംശയം ശക്തമായത്.'ഓം കാവുവിളാകം ശ്രീ കൈലാസ നാഥ മഹാദേവ ക്ഷേത്രം ആചാര്യ ഗുരു ബ്രഹ്മ ശ്രീ ഗോപൻ സ്വാമി സമാധിയായി' എന്നായിരുന്നു പോസ്റ്ററിലെ വാക്കുകള്. ഒരു വ്യക്തിയുടെ മരണം ഔദ്യോഗികമായി സ്ഥിരീകരിക്കുന്നതിന് മുമ്പ് തന്നെ 'സമാധിയായി' എന്ന പ്രഖ്യാപനം നടത്തിയതാണ് നാട്ടുകാരില് സംശയത്തിന് പ്രധാന കാരണം. മരണത്തില് ദുരൂഹത ആരോപിച്ച് നാട്ടുകാർ രംഗത്തെത്തിയതോടെ പോലീസ് അന്വേഷണം ആരംഭിച്ചു.
എന്നാല് ഗോപന്റെ മരണം ഔദ്യോഗികമായി സ്ഥിരീകരിക്കപ്പെട്ടിരുന്നില്ല. അതിനാല് തുടക്കത്തില് പോലീസ് ഗോപനെ കാണാനില്ലെന്ന നിലയിലാണ് കേസ് രജിസ്റ്റർ ചെയ്തത്. രോഗബാധിതനായി കിടപ്പിലായിരുന്ന ഗോപൻ മരിച്ചെന്നും, അദ്ദേഹത്തെ വീടിന് സമീപം സമാധിയിരുത്തിയെന്നുമായിരുന്നു ഭാര്യ സുലോചനയും മക്കളായ രാജസേനനും സനന്തനും പലീസിനോട് പറഞ്ഞത്. മരണത്തിന് ശേഷം അച്ഛന്റെ ആഗ്രഹപ്രകാരമാണ് സമാധിയിരുത്തിയതെന്നായിരുന്നു കുടുംബത്തിന്റെ വിശദീകരണം. മരണശേഷം ദൈവത്തിന്റെ അടുക്കല് പോകണമെങ്കില് മൃതദേഹം വീട്ടുകാരല്ലാതെ മറ്റാരും കാണരുതെന്നും സമാധിയിരുത്തണമെന്നുമാണ് അച്ഛൻ നിർദ്ദേശിച്ചിരുന്നതെന്നും മക്കള് പറഞ്ഞിരുന്നു.
എന്നാല് ഈ വിശദീകരണങ്ങള്ക്കിടയിലും 'എന്തുകൊണ്ട് മൃതദേഹം പുറത്തെടുക്കാതെ സമാധിയിരുത്തി?' 'മരണത്തിന്റെ യഥാർത്ഥ കാരണം എന്താണ്?'** തുടങ്ങിയ ചോദ്യങ്ങളാണ് ഉയർന്നത്. സംശയങ്ങള് ശക്തമായതോടെ ഗോപനെ സമാധിയിരുത്തിയതായി പറയുന്ന സ്ഥലത്ത് നിർമ്മിച്ചിരുന്ന കോണ്ക്രീറ്റ് അറ പോലീസ് സീല് ചെയ്തു. തുടർന്ന് മരണവുമായി ബന്ധപ്പെട്ട വിവിധ സാധ്യതകള് പരിശോധിച്ചു. ആന്തരിക അവയവങ്ങളുടെ പരിശോധനാഫലങ്ങള് ഉള്പ്പെടെ ലഭിച്ച തെളിവുകള് പരിശോധിച്ച അന്വേഷണ സംഘം കൊലപാതകത്തിന്റെ സാധ്യത സ്ഥിരീകരിക്കുന്ന തെളിവുകളൊന്നും കണ്ടെത്തിയില്ലെന്നാണ് അന്തിമ നിലപാട്.
ഇതോടെയാണ് ഗോപന്റെ മരണത്തിന് പിന്നില് കൊലപാതകമില്ലെന്നും ഹൃദയാഘാതമാണ് മരണകാരണമെന്നും പോലീസ് കോടതിയില് സമർപ്പിച്ച അന്തിമ റിപ്പോർട്ടില് വ്യക്തമാക്കിയത്.ഗോപൻ സ്വാമിയുടെ മരണം ആദ്യം മുതല് തന്നെ സാധാരണ മരണമായി തോന്നിയിരുന്നില്ല. മരണവാർത്ത പുറത്തുവന്ന രീതി, 'സമാധി' പ്രഖ്യാപനം, മൃതദേഹം പുറത്തുള്ളവർക്ക് കാണിക്കാതിരുന്നത്, കോണ്ക്രീറ്റ് അറയില് സമാധിയിരുത്തിയത് ഇതെല്ലാം ചേർന്നാണ് സംശയങ്ങള്ക്ക് വഴിയൊരുക്കിയത്.
അതുകൊണ്ടുതന്നെ സംഭവത്തില് പോലീസ് വിശദമായ അന്വേഷണം നടത്തുകയും ശാസ്ത്രീയ പരിശോധനകള്ക്ക് വിധേയമാക്കുകയും ചെയ്തു.എന്നാല് അന്വേഷണത്തിന്റെ അവസാനം കൊലപാതകമെന്ന ആരോപണത്തെ പിന്തുണയ്ക്കുന്ന തെളിവുകളൊന്നും ലഭിച്ചില്ല. അങ്ങനെ ഏറെ വിവാദങ്ങള്ക്കും ചർച്ചകള്ക്കും ഇടയാക്കിയ 'ഗോപൻ സ്വാമിയുടെ മരണം കൊലപാതകമാണോ?' എന്ന പ്രധാന ചോദ്യത്തിന് പോലീസ് അന്വേഷണത്തിലൂടെ മറുപടി ലഭിച്ചിരിക്കുകയാണ്. ഇതോടെ ഗോപൻ സ്വാമിയുടെ മരണത്തെ ചുറ്റിപ്പറ്റിയ ദുരൂഹതകള്ക്ക് പോലീസ് അന്വേഷണത്തിന്റെ അടിസ്ഥാനത്തില് തിരശ്ശീല വീണിരിക്കുകയാണ്.