അരുണ്‍ മാത്തേശ്വരൻ സംവിധാനം ചെയ്യുന്ന റൊമാന്റിക് ആക്ഷൻ ത്രില്ലറില്‍ ലോകേഷിന്റെ നായികയായി വാമിഖ ഗബ്ബിയാണ് എത്തുന്നത്. ഓഗസ്റ്റ് 7ന് ചിത്രം തിയേറ്ററുകളിലെത്തും. ഉത്തരേന്ത്യൻ ഹിന്ദി വിപണിയില്‍ ചിത്രം വിതരണം ചെയ്യുന്നത് ധർമ്മ പ്രൊഡക്ഷൻസാണ്.

രണ്ടര മിനിറ്റിലേറെ ദൈർഘ്യമുള്ള ട്രെയിലർ, കുറ്റകൃത്യങ്ങളും പ്രതികാരവും പ്രണയവും ഇഴചേർന്ന കഥയിലേക്കാണ് പ്രേക്ഷകരെ കൂട്ടിക്കൊണ്ടുപോകുന്നത്. ദേവദാസ് എന്ന കഥാപാത്രമായാണ് ലോകേഷ് എത്തുന്നത്. ഭൂതകാലത്തിന്റെ ഭാരവും പോലീസിന്റെ വേട്ടയും കുറ്റലോകത്തിന്റെ ഭീഷണിയും ഒരേസമയം നേരിടുന്ന ദേവദാസിന്റെ ജീവിതത്തിലേക്കാണ് ചന്ദ്രയായി വാമിഖ ഗബ്ബി കടന്നുവരുന്നത്.

ഒരു പൊലീസ് ഉദ്യോഗസ്ഥന്റെ കൊലപാതകത്തെ തുടർന്നുള്ള അന്വേഷണം, മോഷ്ടിക്കപ്പെട്ട ആയുധശേഖരം, അതുമായി ബന്ധപ്പെട്ട ക്രിമിനല്‍ സംഘങ്ങള്‍ എന്നിവയെ ചുറ്റിപ്പറ്റിയാണ് കഥ പുരോഗമിക്കുന്നത്. ഈ രണ്ട് കേസുകളുമായും ദേവദാസ് ബന്ധപ്പെടുന്നതോടെ സംഭവങ്ങള്‍ കൂടുതല്‍ സങ്കീർണമാകുന്നു. പ്രതികാരവും അതിജീവനവുമാണ് കഥയുടെ പ്രധാന പ്രമേയം.

ട്രെയിലറില്‍ സഞ്ജന കൃഷ്ണമൂർത്തി അവതരിപ്പിക്കുന്ന പാർവതി എന്ന കഥാപാത്രവും ശ്രദ്ധ നേടുന്നുണ്ട്. എന്നാല്‍ ചിത്രത്തിലെ ഓരോ ബന്ധവും അക്രമത്തിന്റെയും വഞ്ചനയുടെയും നിഴലിലൂടെയാണ് സഞ്ചരിക്കുന്നതെന്ന് ട്രെയിലർ വ്യക്തമാക്കുന്നു. എല്ലാ വശത്തുനിന്നും ശത്രുക്കള്‍ വളയുമ്പോള്‍ ദേവദാസും ചന്ദ്രയും പരസ്പരം ആശ്രയിച്ച്‌ മുന്നോട്ട് പോകേണ്ട സാഹചര്യമാണ് ചിത്രത്തിലുള്ളത്.

'റോക്കി', 'സാനി കായിതം', 'ക്യാപ്റ്റൻ മില്ലർ' എന്നീ ചിത്രങ്ങളിലൂടെ ശ്രദ്ധ നേടിയ അരുണ്‍ മാത്തേശ്വരന്റെ സ്റ്റൈലിഷ് മേക്കിങ് ട്രെയിലറിലും വ്യക്തമാണ്. തകർപ്പൻ ആക്ഷൻ രംഗങ്ങളും വൈകാരിക മുഹൂർത്തങ്ങളും സമന്വയിപ്പിച്ചാണ് ട്രെയിലർ ഒരുക്കിയിരിക്കുന്നത്.

ചിത്രത്തിന് സംഗീതം ഒരുക്കുന്നത് അനിരുദ്ധ് രവിചന്ദറാണ്. ഓർക്കസ്ട്രയും റോക്ക് സംഗീതവും ചേർന്ന പശ്ചാത്തല സംഗീതം ട്രെയിലറിന്റെ തീവ്രത വർധിപ്പിക്കുന്നുണ്ട്. 15 ഗാനങ്ങളടങ്ങിയ ആല്‍ബമാണ് ചിത്രത്തിനായി അനിരുദ്ധ് ഒരുക്കിയിരിക്കുന്നത്. ലോകേഷ് കനകരാജ് സംവിധാനം ചെയ്യാത്ത ഒരു അരുണ്‍ മാത്തേശ്വരൻ ചിത്രത്തിന് അനിരുദ്ധ് സംഗീതമൊരുക്കുന്നത് ഇതാദ്യമായാണ്.

മമിത-സൂര്യ പ്രണയം വിവാദമാകുമോ?; 20 വയസ്സിൻ്റെ പ്രായവ്യത്യാസം വേണമെന്ന് പറഞ്ഞത് സൂര്യ