കരിയർ, മാതൃത്വം, വീട്ടുജോലികള്‍, ഓഫീസ് സമ്മർദ്ദങ്ങള്‍ എന്നിവയെല്ലാം ഒരുമിച്ച്‌ കൈകാര്യം ചെയ്യുമ്പോഴും സ്ത്രീകള്‍ എല്ലാ എപ്പോഴും പെർഫെക്റ്റ് ആയിരിക്കണമെന്ന് സമൂഹം ആഗ്രഹിക്കുന്നതിലെ പ്രായവിവേചനത്തെക്കുറിച്ച്‌ മല്ലിക ഷെരാവത്ത് അടുത്തിടെ തുറന്നുപറയുകയുണ്ടായി.

ബാഹ്യരൂപത്തിലൂടെയും കഴിവിലൂടെയും പ്രകടനത്തിലൂടെയും മാത്രം സൗന്ദര്യത്തെ നിർവചിക്കുന്ന ഇന്നത്തെ ലോകത്ത്, യഥാർത്ഥ സൗന്ദര്യം എന്താണെന്ന് മറന്നുപോകാൻ എളുപ്പമാണെന്ന് സൈക്കോതെറാപ്പിസ്റ്റും ലൈഫ് കോച്ചുമായ ഡെല്‍ന രാജേഷ് പറയുന്നു.

"ഒരു സ്ത്രീയുടെ യഥാർത്ഥ സൗന്ദര്യം അവളുടെ മേക്കപ്പിലോ, വസ്ത്രങ്ങളിലോ, ഹെയർസ്റ്റൈലിലോ, അല്ലെങ്കില്‍ അവള്‍ ലോകത്തിന് മുന്നില്‍ കാണിക്കുന്ന ചിത്രത്തിലോ അല്ല ഉള്ളത്. ഇവയെല്ലാം അവളുടെ ബാഹ്യസൗന്ദര്യം കൂട്ടിയേക്കാമെങ്കിലും അവള്‍ ആരാണെന്ന് നിർവചിക്കുന്നില്ല. എല്ലാ ദിവസവും അവള്‍ ജീവിതത്തെ എങ്ങനെ അഭിമുഖീകരിക്കുന്നു എന്നതിലാണ് യഥാർത്ഥ സൗന്ദര്യം വെളിപ്പെടുന്നത്. സ്വയം പരിപാലിക്കുന്നതിനൊപ്പം താൻ സ്നേഹിക്കുന്നവരെക്കൂടി ചേർത്തുപിടിക്കുന്ന സ്ത്രീ, പ്രതിസന്ധികളും നിരാശകളും ക്ഷീണവും അനിശ്ചിതത്വങ്ങളും ഉണ്ടായിട്ടും തളരാതെ മുന്നോട്ട് പോകുന്ന സ്ത്രീ; അവളാണ് യഥാർത്ഥ സുന്ദരി," ഡെല്‍ന പറയുന്നു.

ഇത്തരം സൗന്ദര്യത്തിന്റെ എണ്ണമറ്റ ഉദാഹരണങ്ങള്‍ക്ക് താൻ സാക്ഷ്യം വഹിച്ചിട്ടുണ്ടെന്ന് ഡെല്‍ന സൂചിപ്പിച്ചു. "ഇത് മറ്റുള്ളവരുടെ ശ്രദ്ധ പിടിച്ചുപറ്റാൻ വേണ്ടിയുള്ളതല്ല. പലപ്പോഴും സാധാരണ നിമിഷങ്ങളില്‍ ജീവിക്കുന്നതുകൊണ്ട് ഇത് ആരുടെയും ശ്രദ്ധയില്‍ പെടാറില്ല. എത്രയൊക്കെ തളർന്നിരുന്നാലും മുന്നോട്ട് പോകുന്ന ഒരമ്മയിലോ, സ്വന്തം പ്രതിസന്ധികള്‍ക്കിടയിലും കുടുംബത്തെ താങ്ങിനിർത്തുന്ന ഒരു മകളിലുമൊക്കെ ഇത് കാണാം. മനശാസ്ത്രപരമായ വീക്ഷണത്തില്‍, മനുഷ്യന്റെ കരുത്തിന്റെ ഏറ്റവും ശക്തമായ ആവിഷ്കാരമാണ് പ്രതിരോധശേഷി. ജീവിതത്തിലെ പ്രതിസന്ധികള്‍ക്കിടയിലും തളരാതെ നില്‍ക്കാനും, സാഹചര്യങ്ങളോട് പൊരുത്തപ്പെടാനും, ഉത്തരവാദിത്തങ്ങള്‍ ഏറ്റെടുക്കാനും, മുന്നോട്ട് പോകാനുമുള്ള കഴിവ് വൈകാരിക പക്വതയുടെയും ആന്തരിക ധീരതയുടെയും പ്രതിഫലനമാണ്," ഡെല്‍ന പറഞ്ഞു.

സൗന്ദര്യത്തെക്കുറിച്ചുള്ള ഏറ്റവും വലിയ തെറ്റിദ്ധാരണകളിലൊന്ന് അത് നമ്മള്‍ കണ്ണുകൊണ്ട് കാണുന്ന ഒന്നാണ് എന്നതാണ്. "യഥാർത്ഥത്തില്‍, എക്കാലവും ഓർമ്മിക്കപ്പെടുന്ന സൗന്ദര്യം എന്നത് നമ്മള്‍ അനുഭവിക്കുന്ന ഒന്നാണ്. ഒരാളുടെ കാരുണ്യത്തിലോ, അവരുടെ കരുത്തിലോ, അവരുടെ സാന്നിധ്യത്തിലോ, വിശ്വസ്തതയിലോ ആണ് നമ്മള്‍ അത് അനുഭവിക്കുന്നത്," ഡെല്‍ന കൂട്ടിച്ചേർത്തു.

മുന്നോട്ട് കുതിക്കാനുള്ള അവളുടെ ധൈര്യത്തിലാണ് അവളുടെ സൗന്ദര്യം പ്രതിഫലിക്കുന്നത്. "കാരണം, ദിവസാവസാനം ഒരു സ്ത്രീയുടെ യഥാർത്ഥ സൗന്ദര്യം അവള്‍ എങ്ങനെ കാണപ്പെടുന്നു എന്നതിലല്ല, മറിച്ച്‌ അവള്‍ എങ്ങനെ ജീവിക്കുന്നു, ജീവിതത്തെ എങ്ങനെ നേരിടുന്നു എന്നതിലാണ്," ഡെല്‍ന രാജേഷ് പറഞ്ഞു.