തെന്നിന്ത്യൻ സിനിമയിലെ പ്രിയപ്പെട്ട താരങ്ങളില് ഒരാളാണ് സ്നേഹ. തന്റെ മനോഹരമായ ചിരിയിലൂടെയും അഭിനയ മികവിലൂടെയും ലക്ഷക്കണക്കിന് ആരാധകരെ സ്വന്തമാക്കിയ താരം, മലയാളം, തമിഴ്, തെലുങ്ക് ഭാഷകളില് നിരവധി ശ്രദ്ധേയമായ കഥാപാത്രങ്ങളെ അവതരിപ്പിച്ചിട്ടുണ്ട്.
സ്ക്രീനില് തിളങ്ങി നില്ക്കുന്നതിനൊപ്പം തന്റെ ആരോഗ്യവും സൗന്ദര്യവും കൃത്യമായി പരിപാലിക്കുന്നതിലും താരം എപ്പോഴും മുൻപന്തിയിലാണ്.
"ഞാൻ എല്ലാവിധ വ്യായാമങ്ങളും ചെയ്തിട്ടുണ്ട്, യോഗ, എച്ച്.ഐ.ഐ.ടി, എയ്റോബിക്സ്. ഇപ്പോള് എന്റെ ശരീരം അതിനോട് പഴയതുപോലെ പ്രതികരിക്കുന്നില്ല. കഴിഞ്ഞ ഒരു വർഷമായി ഭാരം നിയന്ത്രിക്കാൻ എന്നെ വെയ്റ്റ് ട്രെയിനിങ് ആണ് സഹായിക്കുന്നത്," 43 കാരിയായ സ്നേഹ ഫിറ്റ്നസ് ഇൻഫ്ലുവൻസർ രമ്യ സുബ്രഹ്മണ്യത്തോട് പറഞ്ഞു.
വെയ്റ്റ് ട്രെയിനിംഗിന് ശേഷം തനിക്ക് കൂടുതല് കരുത്തുള്ളതായി തോന്നുന്നുവെന്ന് വ്യക്തമാക്കിയ സ്നേഹ, ഭക്ഷണക്രമത്തിലൂടെ അതിന് കൂടുതല് ഊർജ്ജം നല്കുന്നുണ്ടെന്നും പറഞ്ഞു.
"ഞാൻ എല്ലാം കഴിക്കാറുണ്ട്. ഒരു ദിവസം നിങ്ങള് എത്ര കലോറി കഴിക്കുന്നു എന്നത് പ്രധാനമാണ്. ഞാൻ മാക്രോ കൗണ്ടിംഗ് ചെയ്യാറുണ്ട്. മാസത്തിലൊരിക്കല് ഒഴിച്ചാല് ഞാൻ പഞ്ചസാര ഉപയോഗിക്കാറില്ല. പഞ്ചസാര പൂർണ്ണമായി ഒഴിവാക്കുന്നത് എനിക്ക് വളരെ ഗുണം ചെയ്യാറുണ്ട്. കാർബോഹൈഡ്രേറ്റ്, ധാതുക്കള്, നാരുകള്, പ്രോട്ടീൻ എന്നിവ അടങ്ങിയതാണ് എന്റെ ഡയറ്റ്. ഗ്രില് ചെയ്ത ഭക്ഷണങ്ങളാണ് കഴിക്കുന്നത്. ഞാൻ ധാരാളം വെള്ളം കുടിക്കും. എണ്ണയും മസാലയും ഉപ്പും കുറഞ്ഞ നല്ല ശുദ്ധമായ ഭക്ഷണമാണ് കഴിക്കുന്നത്," സ്നേഹ കൂട്ടിച്ചേർത്തു.
ഭക്ഷണത്തില് ചേർത്ത പഞ്ചസാര കുറയ്ക്കുകയോ പൂർണ്ണമായി ഒഴിവാക്കുകയോ ചെയ്യുന്നത് ശരീരഭാരം കുറയ്ക്കാൻ വലിയ രീതിയില് സഹായിക്കുമെന്നാണ് സാൻഡ്ര ഹെല്ത്ത് കെയറിലെ ഡയബറ്റോളജി ഹെഡും 'രംഗ് ദേ നീല' ഇനിഷ്യേറ്റീവിന്റെ സഹസ്ഥാപകനുമായ ഡോ. രാജീവ് കോവില് പറയുന്നത്.
"സംസ്കരിച്ച ഭക്ഷണങ്ങളിലും മധുരമുള്ള പാനീയങ്ങളിലും അടങ്ങിയിരിക്കുന്ന പഞ്ചസാര പോഷകങ്ങള് ഇല്ലാത്ത വെറും കലോറി മാത്രമാണ്. നിങ്ങള് പഞ്ചസാര ഒഴിവാക്കുമ്പോള്, സ്വാഭാവികമായും നിങ്ങളുടെ കലോറി ഉപഭോഗം കുറയുന്നു, ഇത് ശരീരഭാരം കുറയ്ക്കാൻ ആവശ്യമായ കലോറി ഡെഫിസിറ്റ് (calorie deficit) ഉണ്ടാക്കാൻ സഹായിക്കും," ഡോ. കോവില് പറഞ്ഞു.
മധുരമുള്ള ഭക്ഷണങ്ങള് രക്തത്തിലെ പഞ്ചസാരയുടെ അളവും ഇൻസുലിനും പെട്ടെന്ന് വർദ്ധിപ്പിക്കുകയും, കൊഴുപ്പ് സംഭരിക്കാനും കഴിച്ച ഉടൻ തന്നെ വിശപ്പ് തോന്നാനും ഇടയാക്കുകയും ചെയ്യും. "സോഡ, ഫ്ലേവേർഡ് കോഫികള്, പാക്കറ്റ് ഭക്ഷണങ്ങള് എന്നിവയില് നിന്നൊക്കെ പഞ്ചസാര ഒഴിവാക്കുന്നതിലൂടെ ആളുകളില് വിശപ്പ് കുറയുന്നതായും അമിതമായി ആഹാരം കഴിക്കുന്ന പ്രവണത മാറുന്നതായും കാണാറുണ്ട്," ഡോ. കോവില് കൂട്ടിച്ചേർത്തു.
ഡോ. കോവിലിന്റെ അഭിപ്രായത്തില്, പഞ്ചസാര ഒഴിവാക്കുന്നത് വഴി ദിവസേനയുള്ള കലോറി ഉപഭോഗം 200 മുതല് 500 വരെ കുറയ്ക്കാൻ സാധിക്കും. ഇത് വ്യക്തികളുടെ ശരീരപ്രകൃതി അനുസരിച്ച് ആഴ്ചയില് 0.5 മുതല് 1 കിലോഗ്രാം വരെ ഭാരം കുറയ്ക്കാൻ സഹായിക്കും. ചുരുക്കത്തില്, പഞ്ചസാര ഒഴിവാക്കുന്നത് ഒരു മികച്ച കാര്യമാണ്, എങ്കിലും ഇതൊരു സമഗ്രമായ ആരോഗ്യ സമീപനത്തോടൊപ്പം ചെയ്യുമ്പോഴാണ് കൂടുതല് ഫലം നല്കുന്നത്.
എന്നാല്, പഞ്ചസാര മാത്രം മാറ്റിയതുകൊണ്ട് കാര്യമില്ല. ആരോഗ്യകരമായ ഭക്ഷണശീലങ്ങള്, ശാരീരിക വ്യായാമം, നല്ല ഉറക്കം, മാനസിക സമ്മർദ്ദം കുറയ്ക്കല് എന്നിവയെല്ലാം സ്ഥിരമായ ഭാരം കുറയ്ക്കാൻ അത്യന്താപേക്ഷിതമാണ്. മറ്റ് ജീവിതശൈലി ഘടകങ്ങള് ശ്രദ്ധിക്കാതെ പഞ്ചസാര മാത്രം ഒഴിവാക്കുന്നത് ചെറിയ മാറ്റങ്ങള് മാത്രമേ നല്കുകയുള്ളൂ.
"ഭക്ഷണത്തില് എണ്ണയും ഉപ്പും മസാലകളും കുറയ്ക്കുന്നത് ദഹനം എളുപ്പമാക്കാനും, ശരീരത്തില് വെള്ളം കെട്ടിക്കിടക്കുന്ന അവസ്ഥയും വയർ വീർക്കുന്നതും കുറയ്ക്കാനും സഹായിക്കും," ഗ്ലെൻഈഗിള്സ് ഹോസ്പിറ്റലിലെ ഫിസിഷ്യനും ഡയബറ്റോളജിയുമായ ഡോ. ആരതി ഉല്ലാല് പറഞ്ഞു.
പഴങ്ങള്, പച്ചക്കറികള്, വീട്ടില് ഉണ്ടാക്കുന്ന ലളിതമായ ഭക്ഷണങ്ങള് എന്നിവ കഴിക്കുന്നത് അമിത കലോറിയില്ലാതെ ശരീരത്തിന് ആവശ്യമായ പോഷകങ്ങള് നല്കും. "ഇതോടൊപ്പം കൃത്യമായ വ്യായാമവും വെള്ളം കുടിക്കുന്ന ശീലവും ഉണ്ടെങ്കില്, കഠിനമായ ഡയറ്റുകളില്ലാതെ തന്നെ ശരീരത്തിലെ കൊഴുപ്പ് കുറയ്ക്കാനും മെറ്റബോളിസം മെച്ചപ്പെടുത്താനും സാധിക്കും," ഡോ. ഉല്ലാല് കൂട്ടിച്ചേർത്തു.
DISCLAIMER: മുകളിലുള്ള ലേഖനം അറിവ് നല്കുന്നതിന് മാത്രമുള്ളതാണ്, പ്രൊഫഷണല് മെഡിക്കല് നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങള്ക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.